ទំព័រដើមព័ត៌មានលោក បេន និងក្រុមគ្រួសារក្នុងបុព្វហេតុលៈបង់ និងជួយក្នុងកិច្ចការពារធនធានធម្មជាតិនៅកម្ពុជា បានទទួល សញ្ជ...

លោក បេន និងក្រុមគ្រួសារក្នុងបុព្វហេតុលៈបង់ និងជួយក្នុងកិច្ចការពារធនធានធម្មជាតិនៅកម្ពុជា បានទទួល សញ្ជាតិខ្មែរជាផ្លូវការ

ខេត្តព្រះវិហារ ៖ ចាប់តាំងពីព្រះមហាក្សត្រ ជាទីគោរពសក្ការៈនៃយើងឡាយព្រះហស្ថលេខាប្រោសព្រះរាជទានសញ្ជាតិខ្មែរជូនដល់លោកបេន និងក្រុមគ្រួសារកាលពីថ្ងៃទី២៦ ខែមករា ឆ្នាំ២០២២មក លោកបេន និងក្រុមគ្រួសារបានក្លាយជាពលរដ្ឋខ្មែរ និងមានសិទ្ធិដូចប្រជាពលរដ្ឋខ្មែរទូទៅដែរ ។ នេះគឺជាការថ្លែងរបស់ ឯកឧត្តមទេសរដ្ឋមន្ត្រី មាស សុភា ប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះវិហារ។

ថ្លែងក្នុងឱកាស ប្រគល់ព្រះរាជក្រឹត្យស្តីពីការផ្តល់សញ្ជាតិខ្មែរដោយសញ្ជាតូបនីយកម្មជាចង្កោមគ្រួសារដល់គ្រួសារលោក ដាវីដ បេន នៅរដ្ឋបាលខេត្តព្រះវិហារនៅរសៀល ថ្ងៃទី១៤ ខែឧសភា ឆ្នាំ២០២២ ឯកឧត្តមទេសរដ្ឋមន្ត្រីបានគូសបញ្ជាក់ថាពិតជាស័ក្តិសមបំផុតដែលក្រុមគ្រួសារ លោកបេនត្រូវទទួលបានព្រោះលោកនិងក្រុមគ្រួសារ បានសុខចិត្តចោលស្រុកទេសរបស់ខ្លួនមករស់នៅលើទឹកដីកម្ពុជាប្រមាណ ៣០ ឆ្នាំមកហើយ ដើម្បីចូលរួមជាមួយរាជរដ្ឋាភិបាល និងប្រជាជនកម្ពុជា ថែរក្សាការពារអភិរក្សធនធានធម្មជាតិ។

ឯកឧត្តមទេសរដ្ឋមន្ត្រី មាស សុភា បានមានប្រសាសន៍ថា៖ «នេះគឺជាលទ្ធផលដែលកើតចេញពីកិច្ចខិតខំប្រឹងប្រែងរបស់លោក បេន និងក្រុមគ្រួសារផ្ទាល់ផង និងចេញពីការយកចិត្តទុកដាក់របស់ព្រះមហាក្សត្រជាទីគោរពសក្ការៈ របស់ប្រមុខរាជរដ្ឋាភិបាល និងរបស់ឯកឧត្តមរដ្ឋមន្ត្រីក្រសួងបរិស្ថានចំពោះអ្វីដែលជាកិច្ចខិតខំប្រឹងប្រែងរបស់លោកបេន និងក្រុមគ្រួសារ និងក្រោមការយកចិត្តទុកដាក់របស់អាជ្ញាធរដែនដីជាពិសេសពីអភិបាលខេត្ត អភិបាលស្រុក និងភូមិឃុំផងដែរ»។ ឯកឧត្តមទេសរដ្ឋមន្ត្រីបានជំរុញនិងលើកទឹកចិត្តដល់លោកបេន និងក្រុមគ្រួសារ ព្រមទាំងអាជ្ញាធរពាក់ព័ន្ធបន្តសហការគ្នាល្អលើការការពារនិងអភិរក្សធនធានធម្មជាតិ ដោយបានកត់សម្គាល់ថា ជាមួយការអប់រំ បំភ្លឺផ្សព្វផ្សាយពន្យល់នាពេលកន្លងទៅ ប្រជាពលរដ្ឋមានការយល់ដឹងអំពីសារៈសំខាន់នៃការអភិរក្សធនធានធម្មជាតិ និងជីវៈចម្រុះ ហើយពួកគាត់បានចូលរួមក្នុងការអភិរក្ស។

ក្នុងពិធីនេះដែរ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថានបានថ្លែងថា៖ «កម្ពុជាបានក្លាយជាផ្ទះរបស់បេននិងក្រុមគ្រួសារ។ ថ្ងៃនេះជាថ្ងៃមួយដ៏វិសេសវិសាលសម្រាប់បេននិងក្រុមគ្រួសារ និងក្នុងនាមក្រសួងបរិស្ថានសូមគោរពដឹងគុណនិងថ្លែងអំណរគុណចំពោះសម្តេចតេជោនាយករដ្ឋមន្ត្រី និងសម្តេចគតិព្រឹទ្ធបណ្ឌិត ប៊ុនរ៉ានី ហ៊ុន សែន ដែលលោកទាំងពីរបានអនុញ្ញាតដ៏ខ្ពង់ខ្ពស់ឱ្យយើងខ្ញុំតាមសំណើរបស់ឯកឧត្តមទេសរដ្ឋមន្ត្រី មាស សុភា ប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះវិហារ បានធ្វើសំណើទៅសម្តេចតេជោនាយករដ្ឋមន្ត្រីដើម្បីស្នើសញ្ជាតិខ្មែរជូនដល់លោកបេន និងក្រុមគ្រួសារ។ សម្តេចតេជោក៏បានទូលថ្វាយព្រះមហាក្សត្រ ហើយព្រះមហាក្សត្រជាទីគោរពសក្ការៈនៃយើងក៏បានសព្វព្រះរាជហឬទ័យថ្វាយសញ្ជាតិខ្មែរជូនដល់លោកបេន និងក្រុមគ្រួសារ»។ ជាមួយគ្នានេះ ឯកឧត្តមរដ្ឋមន្ត្រីបានសូមថ្លែងអំណរគុណដល់រដ្ឋបាលខេត្ត និងអាជ្ញាធរស្រុកឃុំរបស់ខេត្តព្រះវិហារដែលបានចូលរួមជាមួយក្រសួងបរិស្ថានក្នុងការអភិរក្សធនធានធម្មជាតិ។

ឯកឧត្តមរដ្ឋមន្ត្រីបានគូសបញ្ជាក់ថា៖«លោកបេននិងក្រុមគ្រួសារស្ថិតក្នុងចំណោមមនុស្សជាច្រើនដែលបានមកបំពេញការងារនៅកម្ពុជាយូរដែលបានទទូលការលើកទឹកចិត្ត។ លោកបេននិងក្រុមគ្រួសារបានលះបង់កម្លាំងកាយកម្លាំងចិត្តជាមួយមន្ត្រីឧទ្យានុរក្សនៃមន្ទីរបរិស្ថាន ក្រសួងបរិស្ថាន ក៏ដូចជាបានចូលរួមរដ្ឋបាលខេត្តក្នុងការការពារនិងអភិរក្សធនធានធម្មជាតិនៅខេត្តព្រះវិហារ បានធ្វើឱ្យការការពារនិងអភិរក្សធនធានធម្មជាតិនៅខេត្តព្រះវិហារកាន់តែមានភាពល្អប្រសើរ»។

សូមបញ្ជាក់ថា លោក បេន ដាវីដ ជាសញ្ជាតិអាម៉េរិក និងភរិយាកូនៗមានសញ្ជាតិអូស្ត្រាលី ក៏គ្រួសារលោកបេន ពិតជាស័ក្តិសមបំផុតក្នុងការទទួលបាននូវសញ្ជាតិខ្មែរពីព្រោះលោកបេន បានមករស់នៅនិងបានធ្វើការនៅកម្ពុជាតាំងពីឆ្នាំ១៩៩២ មកម៉្លេះ ពោលគឺតាំងពីលោកបេន មានអាយុ ២៧ ឆ្នាំ គឺមានរយៈពេលជិត ៣០ឆ្នាំមកហើយ។ លោកបេន បានមកបំពេញការងារនៅខេត្តព្រះវិហាររយៈពេល ២០ ឆ្នាំហើយតាំងពីឆ្នាំ ២០០២។ ស្ថិតក្នុងរយៈពេលនេះ លោកបេន និងក្រុមគ្រួសារបាន លះបង់កម្លាំងកាយចិត្ត បញ្ញា និងធនធានផ្ទាល់ខ្លួនដើម្បីបុព្វហេតុមនុស្សធម៌លើកកម្ពស់ជីវភាពរស់នៅរបស់ប្រជាពលរដ្ឋ ការងារសង្គមផ្សេងៗ និងដើម្បីបុព្វហេតុការពារនិងអភិរក្សធនធានព្រៃឈើនិងសត្វព្រៃនៅក្នុងដែនជម្រកសត្វព្រៃភ្នំត្នោតភ្នំពក ស្ថិតក្នុងភូមិសាស្ត្រស្រុកសង្គមថ្មី និងស្រុកគូលែននៃខេត្តព្រះវិហារ និងស្រុកជីក្រែងខេត្តសៀម។ កាលដែលរូបលោកបេន និងគ្រួសារទទួលបានសញ្ជាតិខ្មែរពិតជារឿងដែលត្រឹមត្រូវ និងសក្តិសមជាទីបំផុត។ គ្រួសារលោកបេនតែងតែទទួលបាននូវការយកចិត្តទុកដាក់គាំទ្រពីរាជរដ្ឋាភិបាលកម្ពុជា និងការស្រឡាញ់រាប់អានពីប្រជាពលរដ្ឋខ្មែរជាទូទៅជាពិសេសមានការគាំទ្រឧបត្ថម្ភពីសំណាក់សម្តេចគតិព្រឹទ្ធបណ្ឌិត ប៊ុនរ៉ានី ហ៊ុន សែន នូវរថយន្ត និងម៉ូតូ និងថវិកាផងដែរ។ ក្រសួងបរិស្ថានបានផ្តល់នូបការគាំទ្រថវិកាបន្ថែម។

លោក បេន ដាវីស តំណាងក្រុមគ្រួសាររបស់ខ្លួនដែលមានសមាជិក ៤ រូប បានថ្លែងអំណរគុណ រាជរដ្ឋាភិបាលកម្ពុជាដែលបានផ្តល់ការគាំទ្រនិងលោកទឹកចិត្តលោក។ លោកបេន ដាវីស បានថ្លែងថា៖«
ខ្ញុំមិននឹកស្មានថាខ្ញុំទទួលបានសញ្ជាតិខ្មែរនេះទេ ខ្ញុំពិតជាមានសេចក្តីសប្បាយរីករាយនិងសូមគោរពថ្លែងអំណរគុណដល់រាជរដ្ឋាភិបាលកម្ពុជានិងអាជ្ញាធរគ្រប់ជាន់ថ្នាក់ដែលបានយកចិត្តទុកដាក់លើយើងខ្ញុំ។ យើងខ្ញុំមានភាពកក់ក្តៅ និងមានការលើកទឹកចិត្តយើងខ្ញុំនិងខ្ញុំមានការសប្បាយចិត្តកិច្ចសហការជាមួយអាជ្ញាធរក្នុងកិច្ចការអភិវឌ្ឍ និងបច្ចុប្បន្នក្នុងកិច្ចការពារអភិរក្សព្រៃឈើ»៕ ដោយ៖ម៉ាដេប៉ូ

- Advertisement -spot_img
spot_img
ជិន ម៉ាដេប៉ូ
ជិន ម៉ាដេប៉ូ
អ្នកយកព៏ត៌មាន ផ្នែក សង្គម និង សេដ្ឋកិច្ច ។លោកធ្លាប់ជាអ្នកយកព័ត៌មានប្រចាំឱ្យស្ថាប័នកាសែត និងទូរទស្សន៍ធំៗនៅកម្ពុជា។ក្រៅពីអ្នកយកព័ត៌មាន លោក ក៏ធ្លាប់ ជាអ្នកបកប្រែផ្នែកភាសាថៃ ប្រចាំឱ្យ កាសែត និងទស្សនាវដ្តីច្រើនឆ្នាំផងដែរ។បច្ចុប្បន្នលោកជាអ្នកយកព័ត៌មានឱ្យទូរទស្សន៍អប្សរាផ្នែកសេដ្ឋកិច្ច។

ព័ត៌មានជាប់ទាក់ទង

- Advertisement -spot_img

អត្ថបទវិភាគ

ព័ត៌មានថ្មី

- Advertisement -spot_imgspot_img

ព័ត៌មានពេញនិយម