កៀវ៖ ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី នៅក្នុងបទសម្ភាសន៍ផ្តាច់មុខជាមួយទូរទស្សន៍ជប៉ុន NHK នៅថ្ងៃអង្គារសប្តាហ៍នេះបានបញ្ជាក់ថា ពិភពលោកបានគិតដំបូងថា អ៊ុយក្រែននឹងមានរយៈពេលត្រឹមតែ ៣ថ្ងៃប៉ុណ្ណោះបន្ទាប់ពីរុស្ស៊ីបានឈ្លានពាន។ ប៉ុន្តែអ្វីដែលគួរឱ្យភ្ញាក់ផ្អើលដល់ពិភពលោកនោះ យើងបានប្រយុទ្ធមិនមែនបីថ្ងៃ មិនមែន ៣០ថ្ងៃទេ តែ០៣ខែរួចទៅហើយ។

បទសម្ភាសន៍ខាងលើនេះធ្វើឡើងនៅក្នុងទីក្រុងកៀវ ប្រទេសអ៊ុយក្រែន។ នាឱកាសនោះ លោក ហ្សេលេនស្គី បានស្នើឱ្យសន្តិភាពនៅអ៊ុយក្រែន ត្រូវតែកើតឡើង ដោយមិនមានការប្រគល់ទឹកដីណាមួយឡើយ។

លោកថា សម្រាប់ប្រជាជនអ៊ុយក្រែនទាំងអស់ ជ័យជំនះមានន័យថា ការដណ្តើមយកទឹកដីរបស់យើងមកវិញ រួមទាំងតំបន់ដុនបាស់ និងឧបទ្វីបគ្រីមៀ។ ប៉ុន្តែជាដំបូង យើងកំពុងប្រយុទ្ធដើម្បីទទួលបានទឹកដីរបស់យើងត្រឡប់ទៅដូចដែលវានៅមុនថ្ងៃទី២៤ខែកុម្ភៈ។ បន្ទាប់មកយើងនឹងស្នើឱ្យរុស្ស៊ីចូលមកកាន់តុចរចា ដើម្បីបញ្ចប់សង្គ្រាមនេះ។

ប្រធានាធិបតីអ៊ុយក្រែនរូបនេះបានសង្កត់ធ្ងន់ថា ការទទួលបាននូវការគ្រប់គ្រងមកវិញ នៃតំបន់នៅតាមបណ្តោយសមុទ្រខ្មៅ និងសមុទ្រអាហ្សូវ នឹងជួយទប់ស្កាត់វិបត្តិស្បៀងអាហារពិភពលោកដែលកំពុងកើតមាន។ លោកថា អ៊ុយក្រែននឹងអាចបញ្ជូនស្រូវសាលី និងពោតចេញទៅកាន់ទីផ្សារអឺរ៉ុប អាស៊ី និងអាហ្រ្វិក ដើម្បីសម្រាលការខ្វះខាតនៅចំពោះមុខ៕ ប្រភព៖ NHK ប្រែសម្រួល៖ ទីណា និងបុត្រា