កូរ៉េខាងជើងចោទអាមេរិកពីបំណងបង្កើតណាតូនៅតំបន់អាស៊ី ខណៈ ណាតូបានជុំជាមួយប្រទេសក្នុងតំបន់ប៉ាស៊ីហ្វិកលើកដំបូង
ទីភ្នាក់ងារសារព័ត៌មានរដ្ឋកូរ៉េខាងជើង KCNA បាននិយាយកាលពីថ្ងៃពុធថា ការធ្វើសមយុទ្ធរួមគ្នាត្រីភាគីដែលមាន សហរដ្ឋអាមេរិក កូរ៉េខាងត្បូង និងជប៉ុនមាន «គោលបំណងទុច្ចរិក» ឆ្ពោះទៅរកកូរ៉េខាងជើង ហើយជាផ្នែកមួយនៃការនាំមុខដ៏គ្រោះថ្នាក់ដល់ការបង្កើត «ទម្រង់ណាតូអាស៊ី» ខណៈពេលដែលអង្គការណាតូបានពង្រឹងទំនាក់ទំនងភាពជាដៃគូនៅអាស៊ី-ប៉ាស៊ីហ្វិក។
សេចក្តីរាយការណ៍របស់ KCNA បានកើតឡើងប៉ុន្មានម៉ោងមុនពេលមេដឹកនាំកូរ៉េខាងត្បូង និងជប៉ុនត្រូវចូលរួមកិច្ចប្រជុំកំពូលប្រចាំឆ្នាំរបស់ណាតូក្នុងនាមជាអ្នកសង្កេតការណ៍ជាលើកដំបូង។ ពួកគេក៏នឹងជួបជាមួយប្រធានាធិបតីអាមេរិក លោក ចូ បៃដិន ដើម្បីពិភាក្សាអំពីកូរ៉េខាងជើង ដែលជាកិច្ចប្រជុំកំពូលត្រីភាគីលើកដំបូងចាប់តាំងពីឆ្នាំ២០១៧មក។ នេះតាមការចេញផ្សាយរបស់សារព័ត៌មាន រ៉យទ័រ។
យោងតាមគេហទំព័ររបស់អង្គការណាតូដែលផ្សព្វផ្សាយកាលពីថ្ងៃទី១៧ខែមិថុនា ណាតូកំពុងពង្រឹងទំនាក់ទំនងភាពជាដៃគូអាស៊ី-ប៉ាស៊ីហ្វិក ដេលមានប្រទេស អូស្ត្រាលី ជប៉ុន កូរ៉េខាងត្បូង និង នូវែលសេឡង់។ ណាតូ បានលើកឡើងថា ក្នុងបរិបទសន្តិសុខដ៏ស្មុគស្មាញនាពេលបច្ចុប្បន្ន ទំនាក់ទំនងជាមយយដៃគូដែលមានចិត្តគំនិតប្រហាក់ប្រហែលនៅទូទាំងសាកលលោកកាន់តែសំខាន់ដើម្បីដោះស្រាយបញ្ហាសន្តិសុខឆ្លងដែន និង ការប្រឈមជាសកល ព្រមទាំងការពារសណ្តាប់ធ្នាប់អន្តរជាតិផ្នែកលើច្បាប់។ នេះជាមូលហេតុដែលការពង្រឹងទំនាក់ទំនងជាមួយដៃគូអាស៊ី-ប៉ាស៊ីហ្វិកបង្កើតទិដ្ឋភាពសំខាន់នៃរបៀបវារៈណាតូដល់ឆ្នាំ២០៣០។
ប្រទេសទាំងបីក៏នឹងធ្វើសមយុទ្ធបាញ់កាំជ្រួច និងតាមដានរួមគ្នានៅជិតកោះហាវ៉ៃក្នុងខែសីហា ដែលមានឈ្មោះថា «នាគប៉ាស៊ីហ្វិក (Pacific Dragon)»។
KCNA បាននិយាយថា «សហរដ្ឋអាមេរិកកំពុងបង្ហាញកិច្ចសហប្រតិបត្តិការយោធាជាមួយពួកទំនាស់របស់ខ្លួន ដោយមិនគិតលើតម្រូវការសន្តិសុខ និងការព្រួយបារម្ភជាចម្បងរបស់បណ្តាប្រទេសអាស៊ីប៉ាស៊ីហ្វិក»។
នៅក្នុងសេចក្តីថ្លែងការណ៍ស្រដៀងគ្នាមួយកាលពីចុងសប្តាហ៍ ក្រសួងការបរទេសកូរ៉េខាងជើងបាននិយាយថា សមយុទ្ធនេះបានបង្ហាញពីការលាក់ពុតនៃការផ្តល់ជូនរបស់សហរដ្ឋអាមេរិកចំពោះការចូលរួមការទូត និងការសន្ទនាដោយគ្មានលក្ខខណ្ឌជាមុន។
ប្រទេសកូរ៉េខាងជើងបានធ្វើការសាកល្បងកាំជ្រួចជាច្រើនក្នុងឆ្នាំនេះ រួមទាំងមីស៊ីលផ្លោងអន្តរទ្វីបដ៏ធំបំផុតរបស់ខ្លួន ហើយមានការព្រួយបារម្ភថា ខ្លួនអាចនឹងត្រៀមធ្វើតេស្តអាវុធនុយក្លេអ៊ែរជាលើកដំបូងចាប់តាំងពីឆ្នាំ ២០១៧មក។
កូរ៉េខាងត្បូង និងជប៉ុនគឺជាសម្ព័ន្ធមិត្តរបស់សហរដ្ឋអាមេរិកទាំងពីរ ប៉ុន្តែទំនាក់ទំនងរបស់ពួកគេជាមួយគ្នាទៅវិញទៅមកត្រូវបានតានតឹងដោយភាពតានតឹងជាប្រវត្តិសាស្ត្រជុំវិញការកាន់កាប់របស់ជប៉ុនលើប្រទេសកូរ៉េពីឆ្នាំ ១៩១០-១៩៤៥។
ទីក្រុងវ៉ាស៊ីនតោនបានជំរុញទីក្រុងសេអ៊ូល និងតូក្យូឱ្យសហការគ្នាបន្ថែមទៀត ក្នុងការប្រឈមមុខនឹងការគំរាមកំហែងពីប្រទេសកូរ៉េខាងជើង ក៏ដូចជាដើម្បីទប់ទល់នឹងការកើនឡើងនៃឥទ្ធិពលរបស់ប្រទេសចិន។
រដ្ឋបាលថ្មីរបស់កូរ៉េខាងត្បូងដែលកើតចេញចំពេលវិបត្តិសង្គ្រាមអ៊ុយក្រែនដែលលុកលុយពីប្រទេសមហាអំណាចរុស្ស៊ី និងរងការគម្រាមផ្នែកសម្ពាធពីសំណាក់ប្រទេសកូរ៉េខាងជើង កំពុងបង្កើនកិច្ចខិតខំប្រឹងប្រែងដើម្បីពង្រឹងទំនាក់ទំនងត្រីភាគីជាមួយសហរដ្ឋអាមេរិក និងជប៉ុន ដោយសើរើផ្តល់តម្លៃលើកិច្ចព្រមព្រៀងសន្តិសុខទូទៅនៃព័ត៌មានយោធា (GSOMIA)។
ប្រទេសកូរ៉េខាងត្បូងនិងជប៉ុនបានបង្កើតកិច្ចព្រមព្រៀងចែករំលែកព័ត៌មានសម្ងាត់ជាលើកដំបូងក្នុងឆ្នាំ២០១៦ ដោយបើកបណ្តាញសម្រាប់ការផ្លាស់ប្តូរព័ត៌មានយោធាដោយផ្ទាល់ជាលើកដំបូង។ ពីមុន ពួកគេម្នាក់ៗនឹងចែករំលែកព័ត៌មានសំខាន់ៗទាក់ទងនឹងសន្តិសុខតាមរយៈអាជ្ញាធរសហរដ្ឋអាមេរិក ដែលជាសម្ព័ន្ធមិត្តរួមរបស់ពួកគេ។ នេះបើយោងតាម ព័ត៌មាន Korea Herald ដែលមានមូលដ្ឋាននៅកូរ៉េខាងត្បូង៕