ណាតូពង្រឹងខ្លួនកាន់តែខ្លាំង ខណៈបស្ចិមលោកតទល់នឹងរុស្ស៊ី និងចិន
ស្របពេលដែលការឈ្លានពានអ៊ុយក្រែនរបស់រុស្ស៊ី ធ្វើឱ្យកក្រើកសន្តិភាពនៅអឺរ៉ុបក្រុមមេដឹកនាំនៃអង្គការណាតូកាលពីថ្ងៃពុធគូសបញ្ជាក់អំពីចក្ខុវិស័យថ្មីដ៏រឹងមាំដែលដាក់ឈ្មោះទីក្រុងម៉ូស្គូថាជាសត្រូវចម្បងរបស់ខ្លួនក្រោយប្រកាសហៅចិនថាជា «បញ្ហាប្រឈម»យុទ្ធសាស្ត្រ។
ក្រុមមេដឹកនាំនិយាយក្នុងសេចក្តីថ្លែងការណ៍ពីបេសកម្មថ្មីមួយចេញផ្សាយក្នុងអំឡុងកិច្ចប្រជុំកំពូលនៅទីក្រុងម៉ាឌ្រីដថា៖ «ភាពជាដៃគូយុទ្ធសាស្ត្រកាន់តែស៊ីជម្រៅរវាងសាធារណៈរដ្ឋប្រជាមានិតចិន និងសហព័ន្ធរុស្ស៊ី និងការព្យាយាមពង្រឹងគ្នាទៅវិញទៅមករបស់ពួកគេប៉ុនប៉ងដើម្បីកាត់បន្ថយនូវសណ្តាប់ធ្នាប់អន្តរជាតិដែលផ្អែកលើច្បាប់ប្រឆាំងនឹងតម្លៃ និងផលប្រយោជន៍របស់យើង»។
ក្នុងជំហានដ៏ច្របូកច្របល់នៅឯកិច្ចប្រជុំកំពូលក្រុងម៉ាឌ្រីដ ដែលបញ្ចប់នៅថ្ងៃព្រហស្បតិ៍នេះ លោកប្រធានាធិបតីចូ បៃដិននិងមេដឹកនាំអង្គការណាតូផ្សេងទៀតបានស្វែងរកការឆ្លើយតបទៅនឹងរុស្ស៊ី និងលោកប្រធានាធិបតី វ៉្លាឌីមៀរ ពូទីន។ មុនចេញផ្សាយសេចក្តីថ្លែងការណ៍បេសកកម្មក្រុមមេដឹកនាំបានអញ្ជើញហ្វាំងឡង់ និងស៊ុយអែតឱ្យចូលរួមជាមួយខ្លួន ខណ
ៈប្រទេសណរឌិកទាំង២ត្រៀមចូលជាសមាជិកនៃសម្ព័ន្ធយោធា។
លោក បៃដិន និយាយថា៖ «ក្នុងពេលដែលលោកពូទីនបំផ្លាញសន្តិភាពនៅអឺរ៉ុប និងវាយប្រហារទៅលើគោលជំហរនៃសណ្តាប់ធ្នាប់ដែលផ្អែកលើច្បាប់ សហរដ្ឋអាមេរិក និងសម្ព័ន្ធមិត្តរបស់យើង នឹងឈានទៅមុខ»។
អគ្គលេខាធិការអង្គការណាតូ លោកJens Stoltenberg ប្រកាសថា កងទ័ពថ្មីរាប់ពាន់នាក់ នឹងត្រូវដាក់ពង្រាយនៅក្នុងប្រទេសចំនួន៨ នៅប៉ែកខាងកើតរបស់អង្គការណាតូ ខណៈលោកបៃដិនថា សហរដ្ឋអាមេរិកក៏នឹងបង្កើតទីបញ្ជាការកងទ័ពអចិន្ត្រៃយ៍ថ្មីមួយនៅប៉ូឡូញ។
ជំហានថ្មីៗចុងក្រោយរបស់ណាតូរួមទាំងគម្រោងពង្រឹងទំនាក់ទំនងដៃគូនៅតំបន់អាស៊ី-បាស៊ីហ្វិកបានទាក់ទាញប្រតិកម្មពីចិនដែលលើកឡើងពីការព្រួយបារម្ភនៅក្នុងតំបន់អាស៊ី-បាស៊ីហ្វិកដែលខ្លួនកំពុងព្យាយាមពង្រីកឥទ្ធិពលសេដ្ឋកិច្ច និងយោធា។
ឯកអគ្គរដ្ឋទូតចិនប្រចាំអង្គការសហប្រជាជាតិ លោកZhang Jun និយាយកាលពីថ្ងៃអង្គារថាការពង្រីកខ្លួនទៅភាគខាងកើតរបស់ណាតូបន្ទាប់ពីសង្គ្រាមត្រជាក់ មិនត្រឹមតែបរាជ័យក្នុងការធ្វើឱ្យអឺរ៉ុបមានសន្តិសុខប៉ុណ្ណោះទេ ថែមទាំងសាបព្រោះគ្រាប់ពូជនៃជម្លោះទៀតផង។
លោកJunនិយាយថា៖«យើងប្រឆាំងនឹងធាតុមួយចំនួនដែលទាមទារឱ្យមានការចូលរួមរបស់ណាតូនៅអាស៊ីប៉ាស៊ីហ្វិក ឬទម្រង់អាស៊ីប៉ាស៊ីហ្វិករបស់ណាតូផ្អែកលើសម្ព័ន្ធភាពយោធា។ ភាពចលាចលនៅផ្នែកខ្លះនៃពិភពលោកមិនត្រូវអនុញ្ញាតឱ្យមាននៅអាស៊ីប៉ាស៊ីហ្វិកឡើយ»។
ឯកអគ្គរដ្ឋទូតនៃប្រទេសដែលបដិសេធមិនថ្កោលទោសរុស្ស៊ីចំពោះការឈ្លានពានប្រទេសឯករាជ្យអ៊ុយក្រែនដដែលនិយាយថា៖ «សុវត្ថិភាពគឺមិនអាចបំបែកបាន។ការពង្រីកសម្ព័ន្ធភាពយោធា និងការស្វែងរកសន្តិសុខផ្ទាល់ខ្លួនដោយចំណាយភាពអសន្តិសុខនៃប្រទេសដ៏ទៃនឹងនាំឱ្យមានបញ្ហាសន្តិសុខដោយជៀសមិនរួច»។
មិនខុសគ្នាពីចិន រុស្ស៊ីក៏មានប្រតិកម្មចំពោះណាតូ ដែលខ្លួនចាត់ទុកថាមេគំរាមកំហែងអសន្តិសុខដល់ប្រទេស ដោយហៅណាតូថាកំពុងទាញយក «ឧត្តមភាព» របស់ខ្លួនពីសង្រ្គាមនៅអ៊ុយក្រែន។ ខណៈដែលកងទ័ពរបស់ខ្លួនប្រឹងសម្រុកប្រយុទ្ធគ្នានៅតំបន់ដុនបាស លោក ពូទីន បានធ្វើដំណើរចូលរួមកិច្ចប្រជុំកំពូលមួយនៅប្រទេសតួកម៉េនីស្ថាន ជាមួយបណ្ដាប្រទេសជាប់សមុទ្រកាសព្យែនចំនួន៤ផ្សេងទៀត។
ក្នុងសុន្ទរកថាខ្លីមួយទៅកាន់ប្រធានាធិបតីតួកម៉េនីស្ថានកាហ្សាក់ស្ថាន អ៊ីរ៉ង់ និងអាស៊ែបៃហ្សង់ លោក ពូទីនបាននិយាយអំពីបញ្ហាពាណិជ្ជកម្ម ទេសចរណ៍ ជលផល និងបរិស្ថានជាដើមតែមិននិយាយអ្វីមួយម៉ាត់អំពីណាតូ ឬអ៊ុយក្រែននោះទេ។ នេះបើតាមការសរសេររៀបរាប់របស់កាសែតញូវយ៉កថែមស៍។
ប៉ុន្តែបន្ទាប់មក ក្នុងសន្និសីទកាសែតក្រោយកិច្ចប្រជុំកំពូលដដែល លោក ពូទីន បាននិយាយគំរាមហ្វាំងឡង់ និងស៊ុយអែតជុំវិញព័ត៌មានចុងក្រោយស្ដីពីជំហានចូលជាសមាជិកអង្គការណាតូក្រោយតួកគីព្រមព្រៀងទម្លាក់ចោលការវេតូរបស់ខ្លួន។
លោក ពូទីន និយាយថា៖ «សម្រាប់ស៊ុយអែត និងហ្វាំងឡង់ យើងគ្មានបញ្ហាជាមួយដូចដែលយើងមានជាមួយអ៊ុយក្រែនទេ។បើពួកគេចង់ចូលរួមជាមួយណាតូឱ្យពួកគេធ្វើទៅ»។ លោកបន្តថា៖ «ប៉ុន្តែពួកគេត្រូវតែយល់ថា គ្មានការគំរាមកំហែងពីមុនមកទេ ខណៈដែលឥឡូវនេះប្រសិនបើណាតូដាក់ពង្រាយយោធា និងហេដ្ឋារចនាសម្ព័ន្ធនៅទីនោះ(ហ្វាំងឡង់ និងស៊ុយអែត)យើងនឹងឆ្លើយតប និងបង្កើតការគំរាមកំហែងក្នុងរូបភាពដូចគ្នាដែលគេធ្វើមកលើយើង។វាជាការពិត។ តើពួកគេមិនយល់ឬយ៉ាងណា?»។
ជំហានរបស់ណាតូ ទទួលការស្វាគមន៍ពីអ៊ុយក្រែន។រដ្ឋមន្ត្រីការបរទេសអ៊ុយក្រែន លោក ឌ្មីទ្រី គូឡេបា និយាយនៅលើធ្វីតធឺរថា៖ «យើងស្វាគមន៍ចំពោះគោលជំហរច្បាស់លាស់លើរុស្ស៊ី ក៏ដូចជាការចូលជាសមាជិក[ណាតូ]របស់ហ្វាំងឡង់ និងស៊ុយអែត។ ជំហររឹងមាំ និងសកម្មស្មើភាពគ្នាលើអ៊ុយក្រែន នឹងជួយការពារសន្តិសុខ និងស្ថិរភាពរបស់អឺរ៉ូ-អាត្លង់ទិក។
យ៉ាងណាមិញ វាមិនបានរាំងខ្ទប់រុស្ស៊ីពីកិច្ចប្រឹងប្រែងរបស់ខ្លួននៅអ៊ុយក្រែនដែលខ្វះសព្វាវុធ ហើយត្រូវពឹងផ្អែកលើការផ្គត់ផ្គង់របស់លោកខាងលិចនោះទេ។ លោកពូទីនក៏ហាក់ដូចជាមិនរំជើបរំជួលចំពោះការថ្កោលទោស និងការដាក់ទណ្ឌកម្មពីបរទេសខណៈកងកម្លាំងរបស់លោកបន្តប្រើប្រាស់កាំភ្លើងធំកម្រិតខ្ពស់ដើម្បីទម្លាក់គ្រាប់បែកលើទីក្រុងនានារបស់អ៊ុយក្រែន ក្នុងគោលបំណងវាយយកតំបន់ដុនបាស។
ប៉ុន្តែវាគឺជាជំហានមួយដ៏ធំ ដែលលោកប្រធានាធិបតី បៃដិន ថាសហរដ្ឋអាមេរិកនឹងបន្ថែមកងកម្លាំងរហូតដល់ ១០០ ០០០នាក់នៅទ្វីបអឺរ៉ុបខណៈមេដឹកនាំណាតូយល់ព្រមលើការឆ្ពោះទៅរកការពង្រាយកម្លាំងទ័ពប្រុងជើងការខ្ពស់ជាង៣០០ ០០០ នាក់ដើម្បីឆ្លើយតបទៅនឹងការវាយប្រហារណាមួយរបស់រុស្ស៊ី។
អគ្គលេខាធិការអង្គការណាតូលោក Stoltenberg និយាយក្នុងកិច្ចប្រជុំនាទីក្រុងម៉ាឌ្រីដថាសង្រ្គាមរបស់លោកពូទីន ប្រឆាំងនឹងអ៊ុយក្រែន«បានបំផ្លាញសន្តិភាពនៅអឺរ៉ុប និងបង្កើតវិបត្តិសន្តិសុខដ៏ធំបំផុតនៅអឺរ៉ុប ចាប់តាំងពីសង្រ្គាមលោកលើកទី២។ ណាតូបានឆ្លើយតបដោយកម្លាំង និងការឯកភាព»។
ក្រុមអ្នកវិភាគនិយាយថា ការដាក់ពង្រាយកងទ័ពថ្មីជំរុញទស្សនៈដែលអូសបន្លាយជាយូរមកហើយនៅក្នុងប្រទេសប៉ូឡូញ និងបណ្ដារដ្ឋបាល់ទិកដែលថា ណាតូចាំបាច់ត្រូវធ្វើបន្ថែមទៀតដើម្បីធានាតំបន់នេះ។
លើសពីនោះ អ្នកស្រីRachel Rizzo អ្នកជំនាញជាន់ខ្ពស់នៅក្រុមប្រឹក្សាអាត្លង់ទិក និយាយប្រាប់កាសែត Financial Times ថា៖ «សហរដ្ឋអាមេរិក រួមជាមួយនឹងសម្ព័ន្ធមិត្តអឺរ៉ុប ពិតជាកំពុងព្យាយាមរកវិធីមិនត្រឹមតែធានាដល់សម្ព័ន្ធមិត្តភាគខាងកើតរបស់អង្គការណាតូប៉ុណ្ណោះទេ ប៉ុន្តែក៏ធ្វើឱ្យប្រាកដថា វត្តមានទៅមុខ និងវិធានការទប់ស្កាត់តំបន់នោះខ្លាំងគ្រប់គ្រាន់ ដែលអាចទប់ទល់លោកពូទីនដោយគ្រប់គ្រាន់ និងជោគជ័យ»។
ប្រភព៖ New York Times
