អតីតប្រធានាធិបតីស្រីលង្កាចាកចេញពីម៉ាល់ឌីវ ទៅសិង្ហបុរី
អតីតប្រធានាធិបតីស្រីលង្កា លោក Gotabaya Rajapaksa ដែលប្រកាសចុះចេញពីអំណាច និងបានភៀសខ្លួនទៅកាន់ប្រទេសម៉ាល់ឌីវកាលពីថ្ងៃពុធ នៅថ្ងៃព្រហស្បតិ៍ បានចាកចេញទៅកាន់ប្រទេសសិង្ហបុរី តាមយន្តហោះរបស់អាកាសចរណ៍ Saudi Airlines។ នេះយោងតាម The Times of India ដែលទើបចេញផ្សាយនៅមុននេះ។
បណ្តាញសារព័ត៌មាននោះ បានដកស្រង់ប្រភពដែលបាននិយាយថា ការរត់គេចខ្លួនរបស់គាត់ទៅកាន់ប្រទេសម៉ាល់ឌីវ ត្រូវបានចរចាដោយអតីតប្រធានាធិបតីម៉ាល់ឌីវ លោក Mohamed Nasheed។
ទន្ទឹមនឹងនេះ ប្រជាជនស្រីលង្កាកំពុងរង់ចាំការលាលែងពីតំណែងរបស់គាត់មួយថ្ងៃបន្ទាប់ពីគាត់បានភៀសខ្លួនដើម្បីគេចពីការបះបោរប្រឆាំងនឹងវិបត្តិសេដ្ឋកិច្ចដែលត្រូវបានស្តីបន្ទោសលើការគ្រប់គ្រងមិនត្រឹមត្រូវរបស់រដ្ឋាភិបាលរបស់គាត់។
កាលពីថ្ងៃពុធ បន្ទាប់ពីការចាកចេញពីប្រទេសទៅកាន់ប្រទេសម៉ាល់ឌីវ លោក ហ្កូតាបាយ៉ា រ៉ាចាប៉ាក្សា (Gotabaya Rajapaksa) អាយុយ៧៣ឆ្នាំ បានស្វះស្វែងរកប្រទេសទី៣ទៀតដើម្បីជ្រកកោន បន្ទាប់ពីការចាកចេញពីប្រទេសតាមយន្តហោះទ័ពអាកាស។ នេះបើផ្អែកតាម BBC។
យោងតាម BBC ដដែល អតីតរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុដែលត្រូវជាប្អូនប្រុសប្រធានាធិបតី ក៏បានចាកចេញពីប្រទេសស្រីលង្កា នឹងត្រូវបានគេនិយាយថា ទៅកាន់សហរដ្ឋអាមេរិក។
មនុស្សរាប់រាប់ម៉ឺននាក់ បានដើរចេញតវ៉ាសំដៅនិវេសនដ្ឋានរបស់ប្រធានាធិបតី និងនាយករដ្ឋមន្ត្រីស្រីលង្កាចាប់តាំងពីថ្ងៃសៅរ៍ចុងសប្តាហ៍កន្លងមក ដើម្បីបង្ខំឲ្យប្រធានាធិបតីលោក ហ្កូតាបាយ៉ា រ៉ាចាប៉ាក្សា និងនាយករដ្ឋមន្ត្រី រ៉ានីល វីកក្រេម៉េស៊ីងហេ (Ranil Wickremesinghe) ចុះចេញពីដំណែង។ រហូតមកដល់ពេលនេះ លោកប្រធានាធិបតីបានចាកចេញពីប្រទេស ខណៈនាយករដ្ឋមន្ត្រីស្រីលង្កា បន្តវត្តមាននៅក្នុងប្រទេស។
នាយករដ្ឋមន្ត្រី រ៉ានីល វីកក្រេម៉េស៊ីងហេ ដែលសន្យាចុះចេញពីដំណែងកាលពីថ្ងៃចុងសប្តាហ៍ បានប្រកាសដាក់ប្រទេសក្នុងគ្រាអាសន្ន នៅទូទាំងប្រទេស ហើយបម្រាមគោចរត្រូវបានដាក់នៅខេត្តភាគខាងលិចប្រទេស។ នេះតាមការផ្សាយរបស់ BBC ដោយយោងតាមការិយាល័យនាយករដ្ឋមន្រ្តី៕
ប្រភព៖ The Times of India
