អ៊ុយក្រែនកាត់ផ្តាច់ទំនាក់ទំនងជាមួយកូរ៉េខាងជើងជុំវិញការទទួលស្គាល់ពួកបំបែកខ្លួន
អ៊ុយក្រែនកាត់ផ្តាច់ទំនាក់ទំនងជាមួយកូរ៉េខាងជើងក្រោយក្រុងព្យុងយ៉ាងទទួលស្គាល់ឯករាជ្យភាពរបស់ «សាធារណរដ្ឋប្រជាមានិត» របស់ពួកឧទ្ទាមផ្ដាច់ខ្លួនគាំទ្រដោយរុស្ស៊ីនៅលើភាគខាងកើតនៃទឹកដីរបស់អ៊ុយក្រែន។
ជំហានរបស់ក្រុងកៀវប្រកាសឡើងភ្លាមៗកាលពីថ្ងៃពុធ បន្ទាប់ពីលេចចេញព័ត៌មានពីការប្រកាសរបស់កូរ៉េខាងជើង ដោយក្រសួងការបរទេសអ៊ុយក្រែននិយាយក្នុងសេចក្តីថ្លែងការណ៍នៅលើគេហទំព័ររបស់ខ្លួនថា៖«យើងចាត់ទុកការសម្រេចចិត្តនេះថាជាការប៉ុនប៉ងរបស់ទីក្រុងព្យុងយ៉ាងដើម្បីធ្វើឱ្យខូចដល់អធិបតេយ្យភាព និងបូរណភាពទឹកដីរបស់អ៊ុយក្រែន។ជាការឆ្លើយតប អ៊ុយក្រែនប្រកាសថាខ្លួននឹងកាត់ផ្តាច់ទំនាក់ទំនងការទូតជាមួយសាធារណរដ្ឋប្រជាធិបតេយ្យប្រជាមានិតកូរ៉េ»។
រដ្ឋមន្ត្រីការបរទេសអ៊ុយក្រែន លោក ឌ្មីដ្រូ គូឡេបានិយាយថា៖ «រុស្ស៊ីលែងមានសម្ព័ន្ធមិត្តនៅក្នុងពិភពលោកទៀតហើយ លើកលែងតែប្រទេសណាដែលពឹងផ្អែកលើខ្លួនទាំងផ្នែកហិរញ្ញវត្ថុ និងនយោបាយប៉ុណ្ណោះ»។ លោកនិយាយថា រុស្ស៊ីបានអំពាវនាវដល់កូរ៉េខាងជើង ឱ្យទទួលស្គាល់ឯករាជ្យរបស់ពួកផ្ដាច់ខ្លួនក្នុងសកម្មភាពដែល «ក្រុងម៉ូស្គូតុកហ្សិកជាងទីក្រុងព្យុងយ៉ាង»។
បន្ទាប់ពីរុស្ស៊ី និងស៊ីរី កូរ៉េខាងជើងជាប្រទេសទី៣ហើយ ដែលទទួលស្គាល់សាធារណរដ្ឋប្រជាមានិតដុនណិតស្ក៍(DPR) និងសាធារណៈរដ្ឋលូហានស្ក៍(LPR) របស់ពួកបះបោរក្នុងតំបន់ដុនបាស ថាជារដ្ឋឯករាជ្យ។
ទីភ្នាក់ងារសារព័ត៌មានមជ្ឈិមកូរ៉េ (KCNA) និយាយថា រដ្ឋមន្ត្រីការបរទេសកូរ៉េខាងជើងអ្នកស្រីChoe Son-hui បានផ្ញើលិខិតទៅកាន់«សមភាគីរបស់អ្នកស្រី»ក្នុងតំបន់ទាំង២ ដោយទទួលស្គាល់ការកាន់កាប់របស់ពួកគេ។ KCNA រាយការណ៍នាព្រឹកថ្ងៃព្រហស្បតិ៍ថាអ្នកស្រី Choe «បានបង្ហាញពីឆន្ទៈក្នុងការអភិវឌ្ឍទំនាក់ទំនងរដ្ឋនិងរដ្ឋជាមួយគ្នាក្នុងគំនិតនៃឯករាជ្យភាពសន្តិភាពនិងមិត្តភាព»។
ពេលរុស្ស៊ីកាត់ទឹកដីគ្រីមៀររបស់អ៊ុយក្រែនថាជារបស់ខ្លួននៅឆ្នាំ ២០១៤ កូរ៉េខាងជើងបានសម្តែងការគាំទ្រចំពោះទង្វើនោះ និងសង្កត់ធ្ងន់លើទំនាក់ទំនងជិតស្និទ្ធរបស់ខ្លួនជាមួយរុស្ស៊ី ដោយស្តីបន្ទោសវិបត្តិអ៊ុយក្រែនលើ«គោលនយោបាយអនុត្តរភាព»របស់សហរដ្ឋអាមេរិក និងប្រទេសលោកខាងលិចផ្សេងទៀត។
ចំណែងរុស្ស៊ីវិញបានគាំទ្រពួកឧទ្ទាមបំបែកខ្លួនតាំងពីឆ្នាំ ២០១៤ដោយទទួលស្គាល់ឯករាជ្យរបស់សាធារណរដ្ឋទាំងដុនណិតស្ក៍ និងលូហានស្ក៍ មុនបើកការឈ្លានពានអ៊ុយក្រែននៅចុងខែកុម្ភៈ។ រុស្ស៊ីបានយកអ្វីដែលខ្លួនអះអាងថាជាការការពារអ្នកនិយាយភាសារុស្ស៊ីនៅដុនបាសពី «អំពើប្រល័យពូជសាសន៍» ក្នុងការបើកប្រតិបត្តិការឈ្លានពាន ខណៈក្រុងកៀវ និងលោកខាងលិចនិយាយថា នោះគ្រាន់តែជាលេស និងការឃោសនារបស់រុស្ស៊ីដើម្បីបង្កាត់សង្រ្គាមឈ្លានពានប៉ុណ្ណោះ។
ប្រភព៖ Aljazeera
