ហាណូយ៖ អាជ្ញាធរអាកាសចរណ៍ស៊ីវិលវៀតណាម (CAAV) បានស្នើ សុំ ឲ្យរៀបចំបញ្ជីឈ្មោះអ្នកបង្កបញ្ហា ដែលបំពានលើបទប្បញ្ញត្តិ ដូច្នេះ ពួកគេអាចត្រូវបានហាមឃាត់មិនឱ្យហោះហើរ។ នៅក្នុងសារាចរណែនាំស្តីពីសុវត្ថិភាព និងសន្តិសុខអាកាសចរណ៍ដែល ទើបចេញថ្មីៗនេះ ប្រធាន CAAV លោក Dinh Viet Thang បាន និយាយ ថា ការគ្រប់គ្រងអាកាសយានដ្ឋានគួរតែរកមើលអ្នក ដំណើរ ដែល បំពានច្បាប់អាកាសចរណ៍ដោយចេតនា និងដោះស្រាយ ករណី បែបនេះយ៉ាងតឹងរ៉ឹង។

អាកាសយានដ្ឋានគួរតែបង្កើនការត្រួតពិនិត្យលើតំបន់ដែលមានសកម្មភាពយន្តហោះខ្ពស់ ក៏ដូចជាតំបន់ហាមឃាត់ ដើម្បីការពារអ្នកដំណើរ ពីការចូលរួមក្នុងអាកប្បកិរិយាដែលប៉ះពាល់ដល់សន្តិសុខ និង សុវត្ថិភាព។

សេចក្តីណែនាំបានឲ្យដឹងថា “បុគ្គលិកនៅលើយន្តហោះត្រូវស្វែងរក យ៉ាងសកម្មនូវអ្នកដំណើរដែលមិនគោរពតាមច្បាប់ ហើយរាយការណ៍ ទៅអាជ្ញាធរអាកាសចរណ៍ដើម្បីឱ្យពួកគេអាចដោះស្រាយតាមតម្រូវការ”។

ការណែនាំនេះធ្វើឡើង បន្ទាប់ពីមានឧប្បត្តិហេតុបង្កឡើង ដោយ អ្នកដំណើរជាច្រើននាក់ នាំឱ្យអន្តរាយនៅអាកាសយានដ្ឋាន ថ្មីៗនេះ ក្នុងនោះ រួមមានទាំងករណីអ្នកដំណើរម្នាក់ ដាក់ទូរស័ព្ទដៃទល់ នឹង បង្អួចយន្តហោះ ដើម្បីថតរូបភាពពពកហើយនារីម្នាក់រាំលេងធ្វើជាវីដេអូ តីក តុក (TikTok )នៅអាកាសយានដ្ឋានមួយនៅ Phu Quoc ក្បែរ យន្តហោះ ដែលកំពុងរត់។

នៅពេលដែលទូរស័ព្ទដាក់ទល់នឹងបង្អួចយន្តហោះ ពន្លឺព្រះអាទិត្យអាច កម្តៅវាឡើង ហើយបណ្តាលឱ្យវាផ្ទុះ ជាពិសេស សម្រាប់ទូរស័ព្ទដែល ថតជាប់ជានិច្ចខណៈពេលដែលមនុស្សម្នាក់ដែលឈរនៅក្បែរយន្តហោះដែលកំពុងរត់អាចនឹងត្រូវបានស្រូបចូលទៅក្នុងម៉ាស៊ីន។

អ្នកដែលបំពានច្បាប់អាកាសចរណ៍ ជាធម្មតាត្រូវបានផាក ពិន័យ ជាមុន សិន ហើយប្រសិនបើពួកគេមិនព្រមបង់ការផាកពិន័យ នោះត្រូវបាន ហាមឃាត់មិនឱ្យហោះហើរក្នុងរយៈពេលជាក់លាក់ណាមួយ៕ ប្រភពពី VNexpress , ប្រែសម្រួលដោយ៖ សារ៉ាត