នៅរសៀលថ្ងៃទី២៥ ខែកក្កដា ឆ្នាំ២០២២ ប្រតិភូកងទ័ពជើងទឹកប៉ាគីស្ថាន ដឹកនាំដោយលោកវនាវីឯក Muhammad Yasir Tahir មេបញ្ជាការនាវា PNS TAIMUR (F-262) និងសហការីចំនួន ០៧រូប អមដំណើរដោយសេនានុព័ន្ធយោធាប៉ាគីស្ថាន បានចូលជួបសម្តែងការគួរសមជាមួយលោកមេបញ្ជាការមូលដ្ឋានសមុទ្រ។

ក្នុងឱកាសនោះ លោកឧត្តមនាវីឯក អ៊ុក សីហា មេបញ្ជាការរងកងទ័ពជើងទឹក មេបញ្ជាការមូលដ្ឋានសមុទ្រ បានសម្តែងនូវការស្វាគមន៍ចំពោះវត្តមាន នាវាកងទ័ពជើងទឹកប៉ាគីស្ថាន PNS TAIMUR (F-262) ដែលបានមកបំពេញទស្សនកិច្ចនៅកម្ពុជា ក្នុងគោលបំណងពង្រឹង និងពង្រីកកិច្ចសហប្រតិបត្តិការល្អ រវាងកងទ័ពជើងទឹកប្រទេសទាំងពីរ ។

លោកមេបញ្ជាការមូលដ្ឋានសមុទ្រ មានសេចក្តីសង្ឃឹម និងជឿជាក់ថា ក្រោយដំណើរទស្សនកិច្ចរបស់នាវាកងទ័ពជើងទឹកប៉ាគីស្ថានលើកនេះ កិច្ចសហប្រតិបត្តិការល្អរវាងកងទ័ពជើងទឹកប្រទេសទាំងពីរ កាន់តែត្រូវបានពង្រឹង និងពង្រីកឱ្យកាន់តែស៊ីជម្រៅស្អិតរមួតបន្ថែមទៀត។

ជាការឆ្លើយតប លោកវនាវីឯក Muhammad Yasir Tahir មេបញ្ជាការនាវា PNS TAIMUR (F-262) ជំនួសមុខឱ្យកងទ័ពជើងទឹកប៉ាគីស្ថាន ពិតជាមានកិត្តិយស និងក្តីសប្បាយរីករាយក្រៃលែង ដោយទទួលបានការអនុញ្ញាតពីលោកមេបញ្ជាការមូលដ្ឋានសមុទ្រ ឱ្យចូលជួបសម្តែងការគួរសម។

សូមបញ្ជាក់ថា នៅព្រឹកថ្ងៃទី២៥ ខែកក្កដា ឆ្នាំ២០២២ នាវាចម្បាំងកងទ័ពជើងទឹកប៉ាគីស្ថាន ចំនួន១គ្រឿង ឈ្មោះ PNS TAIMUR Warship (F-262) បានចូលចតនៅកំពង់ផែស្វយ័ត ក្រុង-ខេត្តព្រះសីហនុ។

នាវានេះមានបណ្តោយ ១៣៤.១ម៉ែត្រ ទទឹង១៦ម៉ែត្រ ជម្រៅទឹក៧ម៉ែត្រ មានទម្ងន់ផ្ទុក ៤,០៤៦តោន និងមាននាវិកសរុបចំនួន១៦៩នាក់ ដឹកនាំដោយ លោកវរនាវីឯក MUHAMMAD YARSIR TAHIR មេបញ្ជាការនាវា ក្នុងគោលបំណងដើម្បីធ្វើទស្សនកិច្ចនៅកម្ពុជា ចាប់ពីថ្ងៃទី២៥ ដល់ថ្ងៃទី២៨ ខែកក្កដា ឆ្នាំ២០២២ ដែលមានរយៈពេល៤ថ្ងៃ៕ ដោយ៖ សេឌី