ភ្នំពេញ៖ ក្រុមចោរ ០៣នាក់ ក្នុងនោះ ក៏ជាមុខសញ្ញាចោរឆក់ យ៉ាងសកម្មនៅលើស្ពានអាកាសស្ទឹងមានជ័យ នាពេលកន្លងមក ខណៈពេលនេះ អស់លក្ខណ៍ ត្រូវបានកម្លាំងសមត្ថកិច្ចជំនាញ ការិយាល័យព្រហ្មទណ្ឌកម្រិតស្រាល ល្បាតដេញចាប់ខ្លួនបាន ខណៈធ្វើសកម្មភាពឆក់ទូរស័ព្ទដៃពីនារីរងគ្រោះ ដែលកំពុងជិះម៉ូតូកង់បីឥណ្ឌា បានសម្រេច កាលពីវេលាម៉ោង៩ និង៤០នាទី ថ្ងៃទី០១ ខែសីហា ឆ្នាំ២០២២ ស្ថិតនៅចំណុចផ្លូវ៦០៨ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ប្រដេញរហូតដល់ចំណុចផ្លូវលេខ៩៣ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ ទើបឃាត់ខ្លួនបាន ។

សមត្ថកិច្ចបានឱ្យដឹងនៅរសៀលថ្ងៃទី០៤ ខែសីហា ឆ្នាំ២០២២នេះ ជនសង្ស័យខាងលើទាំង ០៣នាក់ រូបនេះ រួមមាន៖ ទី១: ឈ្មោះ ឡូត ដារ៉ា ភេទប្រុស អាយុ ១៦ឆ្នាំ មុខរបរ ជាងពិដាន ស្នាក់នៅផ្ទះលេខ០៤A ផ្លូវ លេខ៧៧៧ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ។ ទី២: ឈ្មោះ ឃិត វីសាល ភេទប្រុស អាយុ ១៧ឆ្នាំ មុខរបរដឹកអីវ៉ាន់ ស្នាក់នៅផ្ទះលេខ១៧៣ ផ្លូវ៩៣ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។ និងទី៣: ឈ្មោះ ផន រស្មី អាយុ ១៦ឆ្នាំ មុខរបរដឹកជញ្ជូន ស្នាក់នៅផ្ទះលេខជួល ផ្លូវលំ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។ ក្នុងនោះ សមត្ថកិច្ចធ្វើការ ដកហូតបាន៖ ម៉ូតូមួយគ្រឿង ម៉ាកហុងដាស្តុបពី ពណ៌ស ពាក់ស្លាក លេខ ភ្នំពេញ 1GS-1155 (បិទគូទ)។ និងម៉ូតូទៀត ម៉ាកហុងដាឌ្រីម C125 ពណ៌ខ្មៅ ពាក់ស្លាកលេខ ភ្នំពេញ 1JO-4361 (ដៃដល់)។

បច្ចុប្បន្ន ជនសង្ស័យខាងលើនេះ ត្រូវបានកម្លាំងសមត្ថកិច្ចជំនាញ ការិយាល័យបាននាំខ្លួន យកទៅធ្វើការសាកសួរ និងកសាងសំណុំរឿង បញ្ជូនទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធី ៕ ដោយ៖ ឆៃហួត