ភ្នំពេញ ៖ លោកវរសេនីយ៍ឯក សុខ ហេង អធិការនគរបាលខណ្ឌទួលគោក នៅព្រឹកថ្ងៃព្រហស្បតិ៍ ទី១៨ ខែសីហា ឆ្នាំ២០២២ បានដឹកនាំកិច្ចប្រជុំផ្សព្វផ្សាយសេចក្តីសម្រេចរបស់ស្នងការដ្ឋាននគរបាលរាជធានីភ្នំពេញ ស្តីពីការបង្កើតក្រុមការងារប្រតិបត្តិការ ទប់ស្កាត់ និងបង្រ្កាបក្រុមធ្វើសកម្មភាពចាប់ឃាត់ខ្លួន ប្រជាពលរដ្ឋបែបអនាធិបតេយ្យ។

លោកអធិការនគរបាលខណ្ឌ បានឱ្យដឹងថា ដោយទទួលបានការអនុញ្ញាតពីឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ទើបនៅព្រឹកថ្ងៃទី១៨ ខែសីហា ឆ្នាំ២០២២នេះ លោកបានដឹកនាំកិច្ចប្រជុំនេះឡើង ដោយមានការចូលរួមពីលោកនាយរងការិយាយល័យទទួលផែនការងារជំនាញ លោកអធិការរងទទួលផែនការងារជំនាញ លោកនាយផ្នែក លោកនាយរងផ្នែក និងមន្រ្តីពាក់ព័ន្ធមួយចំនួន។

លោកអធិការខណ្ឌ បានបន្តឱ្យដឹងទៀតថា ក្នុងកិច្ចប្រជុំនេះ ក្នុងគោលបំណងផ្សព្វផ្សាយសេចក្តីសម្រេចរបស់ស្នងការដ្ឋាននគរបាលរាជធានីភ្នំពេញ ស្តីពីការបង្កើតក្រុមការងារប្រតិបត្តិការ ទប់ស្កាត់ និងបង្រ្កាបក្រុមធ្វើសកម្មភាពចាប់ឃាត់ខ្លួន ប្រជាពលរដ្ឋបែបអនាធិបតេយ្យ៕ ដោយ៖ ឆៃហួត