ភ្នំពេញ ៖ យោង តាមប្រភពព័ត៌មានពីការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ នៅព្រឹកថ្ងៃ ចន្ទ ទី ២៩ ខែសីហា ឆ្នាំ ២០២២នេះ បានចេញ សេចក្តីបកស្រាយបំភ្លឺ និងបដិសេធរបស់ក្រុមការងារព័ត៌មាននិងប្រតិកម្មរហ័ស របស់ខ្លួន លើករណីដែលហ្វេសប៊ុកមួយឈ្មោះថា អុក ចន្ថា ដែលបានសរសេរខមិនក្នុងការឡាយថា «ឱ្យ លុយ តិចពេក ឡានទឹកវាមិនមកទេ» ក្នុងករណីអគ្គិភ័យ ឆាបឆេះឃ្លាំងលក់-ទិញរថយន្តមួយកន្លែង ដែលស្ថិតតាមបណ្តោយផ្លូវលេខ២៧៣ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ នាថ្ងៃទី២៧ ខែកក្កដា កន្លងទៅ ។

ជាមួយគ្នានោះ ការិយាល័យនគរបាលបង្ការពន្លត់អគ្គិភ័យនិងសង្គ្រោះ សូមធ្វើការបកស្រាយបំភ្លឺ និងបដិសេធចំពោះ
ហ្វេសបុ៊ក អុក ចន្ថា ដែលបានសរសេរបែបនេះ ធ្វេីឱ្យប្រជាពលរដ្ឋមានការយល់ច្រឡំ ជាពិសេសមានបំណងអាក្រក់បំពុលបរិយាកាសដល់សង្គមជាតិ។

សូមបញ្ជាក់ជូនសាធារណជនមេត្តាជ្រាប ថា ក្រោយពីទទួលព័ត៌មានពីប្រជាពលរដ្ឋដែលបានរាយការណ៍មកកាន់លេខ Hotline របស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ របស់យេីងតាមរយៈលេខ 666 / 097 7 3333 55 ភ្លាមៗនោះ យេីងបានបញ្ចេញរថយន្តពន្លត់អគ្គិភ័យគ្រប់គោលដៅ ដេីម្បីជួយធ្វើអន្តរាគមន៍សង្គ្រោះតែម្តង។ នៅពេលដែលក្រុមមន្ត្រីជំនាញមកដល់ទីតាំងកេីតហេតុ ភ្លាមៗ គឺដោយសារតែចរន្តអគ្គិសនីមិនទាន់បានបិទ ដូច្នេះ យេីងរង់ចាំឱ្យខាងមន្ត្រីជំនាញអគ្គិសនីធ្វេីការបិទរួចរាល់ ទេីបក្រុមជំនាញធ្វេីការបាញ់ទឹកពន្លត់។

ដូច្នេះ សូមម្ចាស់ហ្វេសប៊ុកឈ្មោះ អុក ចន្ថា ខាងលេីនេះ ចូលខ្លួនមកបំភ្លឺនៅការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ជាបន្ទាន់ បើពុំដូច្នោះទេ កងកម្លាំងសមត្ថកិច្ចនគរបាលជំនាញនឹងចាត់វិធានការតាមផ្លូវច្បាប់ផងដែរ ៕ ដោយ ៖ភារ៉ា និងប៊ុនធី