សម្តេចតេជោ ហ៊ុន សែន បានបកស្រាយនូវមូលហេតុអ្វីបានជាសម្តេចគាំទ្រលោក ហ៊ុន ម៉ាណែត ក្នុងការធ្វើជាបេក្ខភាពនាយករដ្ឋមន្ត្រីរបស់គណបក្សប្រជាជនកម្ពុជា។ លោក ហ៊ុន ម៉ាណែត ត្រូវបានសន្និបាតគណបក្សប្រជាជនកម្ពុជា បានឯកភាពគាំទ្រជាបេក្ខភាពនាយករដ្ឋមន្ត្រី សម្រាប់ពេលអនាគត ដែលការសម្រេចចិត្តនោះ បានផ្អែកលើលក្ខណៈសម្បត្តិ, សមត្ថភាព និងចំណេះដឹង, បទពិសោធន៍ការងារ និងចក្ខុវិស័យវែងឆ្ងាយរួមទាំងស្នាដៃជាច្រើន ក្នុងវិស័យការពារជាតិ, កិច្ចការសេដ្ឋកិច្ចសង្គម, ការងារយុវជននិងជាពិសេសស្នាដៃដែលលេចធ្លោក្នុងការចូលរួមប្រយុទ្ធប្រឆាំងជំងឺកូវីដ១៩។

ប៉ុន្តែក្រុមប្រឆាំងបានចោទថាថាការតែងតាំង លោកជាអនាគតនាយករដ្ឋមន្ត្រីនោះ គឺដោយសារតែលោកជាកូនប្រុសរបស់សម្តេចតេជោ ហ៊ុន សែន។ សម្តេចនាយករដ្ឋមន្ត្រី បានថ្លែងបកស្រាយបញ្ជាក់នៅថ្ងៃទី១៣ កញ្ញានេះ នូវមូលហេតុដែលលោកបានគាំទ្រលោក ហ៊ុន ម៉ាណែត ក្នុងការធ្វើជាបេក្ខភាពនាយករដ្ឋមន្ត្រី របស់គណបក្សប្រជាជនកម្ពុជា។