សមត្ថកិច្ចឃាត់ខ្លួន បុរសម្នាក់ ដែលជាមេការ និងនារីរងគ្រោះចំនួន ០៤នាក់ ពាក់ព័ន្ធករណីប្រព្រឹត្តិ អំពើសញ្ចារកម្ម
ភ្នំពេញ៖ កម្លាំងសមត្ថកិច្ចជំនាយ ការិយាល័យប្រឆាំងការជួញដូរមនុស្ស និងការពារអនីតិជន សហការជាមួយសមត្ថកិច្ចមូលដ្ឋាន ចុះបង្ក្រាបជាក់ស្តែង ករណីប្រព្រឹត្តិអំពើសញ្ចារកម្ម មានស្ថានទម្ងន់ទោស បើកហាងម៉ាស្សាបង្កប់បម្រើសេវាផ្លូវភេទ ដោយបានឃាត់ខ្លួន បុរសម្នាក់ ដែលជាមេការ និងនារីរងគ្រោះចំនួន ០៤នាក់ ក្នុងនោះ មានអនីតិជន ចំនួន ០២នាក់ និងវត្ថុតាងស្រោមប្រើប្រាស់រួចមួយចំនួន និងមិនទាន់ប្រើប្រាស់មួយចំនួន។
![](https://asset.ams.com.kh/central/media/2022/09/photo_2022-09-17_12-42-14-2-1024x578.jpg)
ដោយមានការចង្អុលបង្ហាញពី លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ទោ ចាន់ កិត្តិខុម ស្នងការរងទទួលដឹកនាំការងារការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជាធានីភ្នំពេញ ដឹកនាំប្រតិបត្តិការផ្ទាល់ដោយលោក ឆាយ ហុង ព្រះរាជអាជ្ញារង និងលោក វរសេនីយ៍ទោ ហាក់ លី នាយរងការិយាល័យ បានធ្វើការឃាត់បុរសម្នាក់ ដែលជាអ្នកគ្រប់គ្រង និងនារីរងគ្រោះ ក្មេងៗចំនួន ០៤នាក់ នៅវេលាម៉ោង ០៩យប់ ថ្ងៃទី១៦ ខែកញ្ញា ឆ្នាំ២០២២ ស្ថិតនៅចំណុចហាងម៉ាស្សាយីហោ «សម្រស់ម្លិះ» នៅផ្ទះលេខ៣៥ ផ្លូវលំ សង្កាត់កន្ទោក ខណ្ឌកំបូល រាជធានីភ្នំពេញ។
![](https://asset.ams.com.kh/central/media/2022/09/photo_2022-09-17_12-42-14-3-1024x568.jpg)
បើយោងតាមប្រភព បានឱ្យដឹងថា ទីតាំងហាងម៉ាស្សា ដែលមានផ្លាកយីហោ «សម្រស់ម្លិះ» មានថៅកែប្រុសម្នាក់គឺជាអ្នកមើលការខុសត្រូវ នៅក្នុងហាងនេះមានស្រីៗរង់ចាំទទួលភ្ញៀវម៉ាស្សា និងរួមភេទចំនួន ០៤នាក់(សង្ស័យអនីតិជន ០២នាក់) និងមានបន្ទប់សម្រាប់រួមភេទចំនួន ០២បន្ទប់ តម្លៃម៉ាស្សាធម្មតា ២០.០០០រៀល ក្នុងមួយម៉ោង និងតម្លៃ នៃការរួមភេទ ក្នុងមួយដងចាប់ពី ២០$ ទៅ ២៥$ ហើយលុយ ដែលបានមកពីការ រួមភេទ គឺថៅកែហាងចែកស្មើគ្នា ជាមួយស្រីៗម៉ាស្សាទាំងនោះ។ ប្រភពដដែល បានឱ្យដឹងទៀតថា ហាងម៉ាស្សានេះ បើកដំណើរការរកស៊ីទទួលភ្ញៀវចាប់ពីម៉ោង ០៨ព្រឹក រហូតដល់យប់អធ្រាត្រ ទើបបិទទ្វារ រីឯ នារីសង្ស័យ ជាអនីតិជនចំនួន ០២នាក់ គឺចូលមកបម្រើការងារចាប់ពីម៉ោង ០៧យប់ រហូតដល់ម៉ោង១០យប់។
![](https://asset.ams.com.kh/central/media/2022/09/photo_2022-09-17_12-42-14-1024x564.jpg)
សូមបញ្ជាក់ថា ក្រោយពេលប្រតិបត្តិការ កម្លាំងសមត្ថកិច្ចជំនាញ ក៏បាននាំខ្លួន បុរស ដែលមេការរូបនេះ យកទៅកាន់ការិយាល័យប្រឆាំងអំពើរការជួញដូរមនុស្ស និងការពារអនីតិជន និងធ្វើការសួរនាំ កសាងសំណុំរឿង ដើម្បីចាត់ការទៅតាមនីតិវិធី ។ ចំណែកឯ នារីរងគ្រោះទាំង ០៤នាក់ ត្រូវបានប្រគល់ជូនទៅផ្នែកមន្ទីរសង្គមកិច្ច រាជធានីភ្នំពេញ និងធ្វើការអប់រំផងដែរ ៕ ដោយ៖ ឆៃហួត និងប៊ុនធី
![](https://asset.ams.com.kh/central/media/2022/09/photo_2022-09-17_12-42-17-1024x763.jpg)
![](https://asset.ams.com.kh/central/media/2022/09/photo_2022-09-17_12-42-20-1024x578.jpg)