ភ្នំពេញ៖ ជាថ្មីម្ដងទៀត លោក ចេង មុនីរ៉ា អភិបាលនៃគណៈអភិបាលខណ្ឌច្បារអំពៅបានចេញវិញ្ញាសាឲ្យលោកចៅសង្កាត់ព្រែកឯងដែលទើបប្រកាសចូលកាន់តំណែង ត្រូវខិតខំបំពេញការងារបំរើប្រជាពលរដ្ឋ ដែលបានគាំទ្រដល់លោកចៅសង្កាត់ ឲ្យឡើងចូលកាន់តំណែងជាចៅសង្កាត់ព្រែកឯង ជំនួសលោកចៅសង្កាត់ចាស់ ដែលបានដាក់ពាក្យលាឈប់ ដោយសារតែបញ្ហាសុខភាព ។

ពិធីប្រកាសផ្លាស់ប្តូរនិងទទួលស្គាល់ប្រធានក្រុមប្រឹក្សានិងជាចៅសង្កាត់ព្រែកឯង ចូលកាន់តំណែងជាផ្លូវការបានប្រព្រឹត្តទៅនៅរសៀលថ្ងៃពុធ ៣កើត ខែអស្សុជ ឆ្នាំខាល ចត្វាស័ក ព.ស ២៥៦៦ ត្រូវនិងថ្ងៃទី២៨ ខែកញ្ញា ឆ្នាំ២០២២ ក្រោមអធិបតីភាពលោក អ៊ំ ម៉ារ៉េត ប្រធានក្រុមប្រឹក្សាខណ្ឌ និងលោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅ ។

យោងតាមសេចក្តីសម្រេចរបស់ក្រសួងមហាផ្ទៃដែលចុះហត្ថលេខាដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេច តែងតាំងលោក សម សុធារី ជាចៅសង្កាត់ព្រែកឯង ជំនួសលោក នេត្រ សារ៉ែន ដែលបានដាក់ពាក្យឈប់សំរាកពីការងារដោយសារបញ្ហាសុខភាព ។

មានមតិសំណេះសំណាលនិងផ្តាំផ្ញើនៅក្នុងអង្គពិធីលោកចេង មុនីរ៉ាអភិបាលនៃគណៈអភិបាលខណ្ឌច្បារអំពៅ បានដាក់ចេញនូវញ្ញាសារចំនួន៧ចំនុចសំខាន់ៗ ដល់លោកសម សុធារី ចៅសង្កាត់ព្រែកឯងដែលទើបចូលកាន់តំណែង អោយខិតខំអនុវត្តក្នុងគោលដៅបំរើប្រជាពលរដ្ឋដោយមិនប្រកាន់និន្នាការនយោបាយអ្វីឡើយ ។

ចំណុចទី១-ដោះស្រាយបញ្ហាទឹកលិចនៅតាមចិញ្ចើមផ្លូវជាតិលេខ១ ក្នុងភូមិសាស្ត្រសង្កាត់ព្រែកឯងដោយរកវិធីដោះស្រាយអោយអស់ពីលទ្ធភាព ។

ចំណុចទី២-ដោះស្រាយបញ្ហាជំនន់ទឹកភ្លៀងនៅតំបន់ដែលមានការជន់លិចដូចជានៅចំនុចភូមិទួលតាចាន់ ភូមិចុងព្រែក ភូមិរបោះអង្កាញ់ និងតំបន់ផ្សេងទៀតដែលទទួលរងនូវការជនលិចដោយជំនន់ទឹកភ្លៀង ។

ចំណុចទី៣-លប់បំបាតល្បែងស៉ីសងគ្រប់ប្រភេទ ដូចជាល្បែងជល់មាន់ បៀ អាប៉ោង កន្ទុយលេខ ឡូតូ និងល្បែងតាមអនឡាញគ្រប់ប្រភេទ ។

ចំណុចទី៤-ត្រូវខិតខំលប់បំបាត់គ្រឿងញៀន មុខសញ្ញាចោរលួច ចោរឆក់ និងក្មេងទំនើង ដោយាក់វេនគ្នាប្រចាំការនិងចុះល្បាតក្នុងមូលដ្ឋានជាប្រចាំ ។

ចំណុចទី៥-ត្រូវផ្សព្វផ្សាយអោយបានទូលំទូលាយដើម្បីជំរុញអោយប្រជាពលរដ្ឋទៅចាក់វ៉ាក់សាំងការពារជំងឺកូវិដ-១៩ អោយបានគ្រប់គ្នាៗតាំងពីដុសមូលដ្ឋាននិងដុសជំរុញ ។

ចំណុចទី៦- ត្រូវខិតខំផ្សព្វផ្សាយអោយបានទូលំទូលាយក្នុងការផ្តលសេវ៉ាមូលដ្ឋានជូនប្រជាពលរដ្ឋ ដូចជាសៀវភៅស្នាក់នៅ សៀវភៅគ្រួសារ ធ្វើអត្តសញ្ញាប័ណ្ណសញ្ជាតិខ្មែរជូនប្រជាពលរដ្ឋដែលគ្រប់អាយុ និង ហួសកាលបរិច្ឆេទ រួមទាំងផ្តល់សេវ៉ាលើឯកសារអត្រានុកូលដ្ឋាន ។

ចំណុច៧-ត្រូវខិតខំពង្រឹងការងារសន្តិសុខនៅក្នុងមូលដ្ឋានអោយបានប្រសើឡើងថែមទៀត តាមរយៈការរួមគ្នាអនុវត្តគោលនយោបាយ ( ភូមិ សង្កាត់ មានសុវត្ថិភាព ) អោយ មានប្រសិទ្ធភាព ។ ការងារសន្តិសុខនេះជាកត្តាសំខាន់ណាស់ដែលមិនអាចខ្វះបាន ហើយមនុស្សគ្រប់គ្នា គ្រប់ស្រទាប់វណ្ណៈ មិនថាអ្នកមានឬអ្នកក្រនោះទេ គឺចង់បានមូលដ្ឋានមានសន្តិសុខល្អ រស់នៅក្នុងភាពសុដមរម្យនា ។

ចំណុចចុងក្រោយលោកអភិបាលថ្លែងសង្កត់ធ្ងន់ថា ពិតជាមានមោទនៈភាពណាស់ដែលប្រទេសជាតិយើងទទួលបានសុខសន្តិភាព ដោយសាតែមានសន្តិភាពនេះហើយទើបប្រទេសជាតិមានការអភិវឌ្ឍន៍រីកចម្រើនលើគ្រប់វិស័យទាំងផ្នែកពុទ្ធចក្រ និង អាណាចក្រ ។ ចាប់ពីពេលនេះតទៅសូមបងប្អូនប្រជាពលរដ្ឋចូលរួមទាំងអស់គ្នា ដើម្បីថែរក្សាសន្តិភាព ការពារសន្តិភាព និងអរគុណសន្តិភាព ដែលជាមូលដ្ឋានគ្រឹះនៃការអភិវឌ្ឍន៍ប្រទេសជាតិអោយកាន់តែរីកចម្រើនថែមទៀត ៕ សណ្តោស