ភ្នំពេញ ៖ តុលាការកំពូល កាលពីថ្ងៃទី១៣ ខែតុលា ឆ្នាំ២០២២ ម្សិលមិញនេះ បានតម្កល់ទោស ជនជាប់ចោទ មនុស្សប្រុសស្រី ជាជនជាតិវៀតណាម ចំនួន ៤នាក់ ជាប់គុក ក្នុងម្នាក់ៗ កំណត់ចាប់ពី ៣០ឆ្នាំ ទៅមួយជីវិត ដោយជាប់ពាក់ព័ន្ធនឹងការផលិតរក្សាទុក ដឹកជញ្ជូនជួញដូរគ្រឿងញៀន ជិត ១០០គីឡូក្រាម ប្រព្រឹត្តនៅចំណុចផ្សេងៗគ្នា ក្នុងរាជធានីភំ្នពេញ កាលពីអំឡុងឆ្នាំ២០១៩ នាពេលកន្លងទៅ។

សូមជម្រាប់ថា ក្នុងនោះ គោលដៅទី១: ស្ថិតនៅចំណុចផ្ទះជួលគ្មានលេខ ផ្លូវ១១៣ ក្រុម២៣ នៅភូមិ០៣ សង្កាត់ បឹងកេងកងទី២ ខណ្ឌបឹងកេងកង រាជធានីភ្នំពេញ។ និងគោលដៅទី២: ផ្ទះលេខ៤៧ ផ្លូវលេខ ១១២ ភូមិរបោះអង្កាញ់១ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។

លោក ជីវ កេង ជាប្រធានចៅក្រមប្រឹក្សាជំនុំជម្រះ នៃ តុលាការកំពូល បានឱ្យដឹងថា ទណ្ឌិតទាំង ៤នាក់ខាងលើមាន ទី១-ឈ្មោះ ង្វៀងទួន អាញ់ ភេទប្រុស អាយុ ២៤ឆ្នាំ ជនជាតិវៀតណាម។ ទី២-ឈ្មោះ ឡាំ យៀកជុង ភេទប្រុស អាយុ ២២ឆ្នាំ ជនជាតិវៀតណាម។ ទី៣-ឈ្មោះ ង្វៀង ធីង៉ុក ភេទស្រី អាយុ ២១ឆ្នាំ ជនជា តិវៀតណាម។ និងទី៤-ឈ្មោះ ង្វៀង ធី ងីន ភេទស្រី អាយុ ៣០ឆ្នាំ ជនជាតិវៀតណាម។ អ្នកទាំង ៤នាក់ ស្នាក់នៅផ្ទះជួលគ្មានលេខ ផ្លូវ១១៣ ក្រុម២៣ នៅភូមិ០៣ សង្កាត់បឹងកេងកង២ ខណ្ឌបឹងកេងកង រាជធានីភ្នំពេញ។

សូបញ្ជាក់ថា ក្នុងសំណុំរឿងក្តីនេះ ជនជាប់ចោទទាំង ៤នាក់ ត្រូវបានសាលាដំបូងរាជធានីភ្នំពេញ កាលពីអំឡុងឆ្នាំ២០២០ កាត់ទោស ទី១: ឈ្មោះ ឡាំ យៀកជុង ២: ឈ្មោះ ង្វៀង ធីង៉ុក ដាក់ពន្ធនាគាកំណត់ ម្នាក់អស់មួយជីវិត ពិន័យ ៨០លានរៀល។ ចំណែកឯ ២នាក់ទៀត ៣: ឈ្មោះ ង្វៀង ទួន អាញ់ និង ទី៤: ឈ្មោះ ង្វៀង ធី ងីន ដាក់ពន្ធនាគារ កំណត់ ម្នាក់ ៣០ឆ្នាំ និង ពិន័យ ៥០លានរៀល។ សម្រាប់បង់ចូលថវិការដ្ឋ ពីបទ: “ផលិតរក្សាទុក និងជួញដូរដោយខុសច្បាប់ នូវសារធាតុញៀន តាមមាត្រា៤០ នៃច្បាប់ ស្តីពីការត្រួតពិនិត្យគ្រឿងញៀន។ ពួកគេ ត្រូវបានចាប់ឃាត់ខ្លួន កាលពីថ្ងៃទី៣ ខែធ្នូ ឆ្នាំ២០១៩។

ក្រោយពីធ្វើការឃាត់ខ្លួន សមត្ថកិច្ចជំនាញ ដកហូតបាន រួមមាន៖ គ្រឿងញៀន ជាប្រភេទមេតំហ្វេតាមីន ICE ទម្ងន់ ១០គីឡូក្រាម, ២-គ្រឿងញៀន ប្រភេទអិចស្តាស៊ី ទម្ងន់ ២២គីឡូក្រាម, ៣-គ្រឿងញៀន ប្រភេទអិចស្តាស៊ី (រាវ) ពាក់កណ្ដាលសម្រេចចំនួន ៥៤គីឡូ ៤៦៤ក្រាម, និង៤-សម្ភារៈកែច្នៃ និងឧបករណ៍ផលិតគ្រឿងញៀន មួយចំនួនទៀត៕ ដោយ៖ ឆៃហួត និងប៊ុនធី