រុស្ស៊ីស្នើបង្កើតមជ្ឈមណ្ឌលចែកចាយឧស្ម័ននៅតួកគី សម្រាប់ការចែកចាយបន្តទៅកាន់ទឹកដីអឺរ៉ុប
រុស្ស៊ី៖ប្រធានាធិបតីរុស្ស៊ីលោក វ្ល៉ាឌីមៀរ ពូទីន នៅថ្ងៃទី១៣ ខែតុលា ឆ្នាំ២០២២ បានស្នើប្រធានាធិបតីតួកគីលោក រេសេប តាយីប អ៊ែរដូហ្កាន បង្កើតមជ្ឈមណ្ឌលចែកចាយឧស្ម័ននៅក្នុងទឹកដីតួកគី សម្រាប់ការផ្គត់ផ្គង់ការចែកចាយឧស្ម័នទៅកាន់អឺរ៉ុប។ ការចែកចាយឧស្ម័នរុស្ស៊ីទៅកាន់អឺរ៉ុប ដែលធ្លាប់មានប្រមាណ ៤០ភាគរយ នៅពេលនេះកំពុងតែជួបភាពរអាក់រអួល ដោយសារការដាក់ទណ្ឌកម្មសេដ្ឋកិច្ចពីលោកខាងលិច និងការលេចធ្លាយបំពង់បង្ហូរឧស្ម័ន Nord Stream ក្នុងសមុទ្របាល់ទិក។
ក្នុងជំនួបទ្វេភាគីនៅក្រៅក្របខ័ណ្ឌសន្និសីទស្តីពីអន្តរកម្មនិងវិធានការជំនឿទុកចិត្តនៅអាស៊ី ដែលធ្វើឡើងក្នុងប្រទេសកាហ្សាក់ស្ថាន ប្រធានាធិបតីរុស្ស៊ីលោក ពូទីន បានលើកឡើងពីគម្រោងរបស់រុស្ស៊ី ទៅកាន់ប្រធានាធិបតីតួកគី ក្នុងការស្នើបង្កើតមជ្ឈមណ្ឌលផ្គត់ផ្គង់ឧស្ម័ននៅក្នុងទឹកដីតួកគី សម្រាប់ការចែកចាយបន្តទៅកាន់ទឹកដីអឺរ៉ុប។
លោកពូទីន បានគូសបញ្ជាក់ពីតម្រូវការនិងភាពចាំបាច់នៃមជ្ឈមណ្ឌលផ្គត់ផ្គង់ឧស្ម័ននេះ សម្រាប់អឺរ៉ុបទាំងមូល។ លោកពូទីន បានប្រាប់លោក អ៊ែរដូហ្កាន ថា តួកគីគឺជាច្រកផ្លូវដ៏គួរឱ្យជឿជាក់មួយ ក្នុងការនាំចេញទៅកាន់ប្រទេសអឺរ៉ុប និងជាពិសេសមជ្ឈមណ្ឌលនេះនឹងជួយកំណត់តម្លៃឧស្ម័ន ដែលកំពុងហក់ឡើងខ្ពស់នៅលើទីផ្សារអន្តរជាតិបច្ចុប្បន្ន។
ប្រធានាធិបតីតួកគី មិនបានឆ្លើយតបជាផ្លូវការចេញពីជំនួបនោះទេ ប៉ុន្តែអ្នកនាំពាក្យវិមានក្រឹមឡាំងដែលបានដកស្រង់ដោយទីភ្នាក់ងារសារព័ត៌មានរុស្ស៊ី RIA ឱ្យដឹងថា មេដឹកនាំនៃប្រទេសទាំងពីរបានបញ្ជាឱ្យមានការពិនិត្យសិក្សាជាបន្ទាន់នូវការបង្កើតមជ្ឈមណ្ឌលឧស្ម័ននេះ។
គួរជម្រាបថា តួកគីជាសមាជិកអូតង់ ដែលនៅតែបន្តទិញប្រេងឧស្ម័នពីរុស្ស៊ី បញ្ច្រាសពីការដាក់ទណ្ឌកម្មនិងសម្ពាធរបស់លោកខាងលិច ដោយសារសកម្មភាពឈ្លានពានអ៊ុយក្រែនរបស់រុស្ស៊ី។ តួកគីបានអះអាងថា តួកគី ចង់រក្សាជំហរអព្យាក្រឹត ក្នុងសំណុំរឿងសង្គ្រាមរុស្ស៊ី-អ៊ុយក្រែន ដើម្បីទុកផ្លូវចរចារជាមួយរុស្ស៊ី។
សម្រាប់ប្រធានាធិបតីតួកគី អ៊ែរដូហ្កាន ទំនាក់ទំនងតួកគីនិងរុស្ស៊ីនឹងអាចរំខានមនុស្សមួយចំនួន ប៉ុន្តែទំនាក់ទំនងនេះក៏នឹងអាចធ្វើឱ្យប្រទេសកំពុងអភិវឌ្ឍសប្បាយចិត្តទៅវិញ។
ក្នុងកិច្ចចរចារកសន្តិភាពអ៊ុយក្រែននិងរុស្ស៊ី តួកគីបានដើរតួនាទីក្នុងការសម្របសម្រួលព្រមព្រៀងជំរុញការនាំចេញស្រូវសាលីអ៊ុយក្រែន ជាមួយអង្គការសហប្រជាជាតិ កាលពីខែកក្កដាកន្លងទៅ។
នៅមុនជំនួបខាងលើនេះធ្វើឡើង អ្នកនាំពាក្យក្រឹមឡាំង បានអះអាងថា រុស្ស៊ីបានបើកចំហត្រៀមស្តាប់ការសម្របសម្រួលពីភាគីតួកគី ។ ប៉ុន្តែក្រោយមក លោកបានប្រាប់ទីភ្នាក់ងារព័ត៌មានរុស្ស៊ី RIA ថាមេដឹកនាំតួកគី និងរុស្ស៊ី មិនបាននិយាយអ្វីទាំងអស់ទាក់ទងនឹងដំណោះស្រាយ ដើម្បីបិទបញ្ចប់ជម្លោះនៅអ៊ុយក្រែនក្នុងជំនួបកាលពីថ្ងៃព្រហស្បតិ៍នោះ។
គួរដឹងដែរថា ដើម្បីទប់នឹងការខ្វះខាត និងការឡើងតម្លៃថាមពលប្រេងនិងឧស្ម័ន ពិសេសនៅរដូវរងាខាងមុខ អឺរ៉ុបទាំង២៧ប្រទេស កាលពីចុងខែកញ្ញា បានព្រមព្រៀងគ្នា លើសំណើរបស់គណៈកម្មការអឺរ៉ុប ដែលគ្រោងកាត់យកប្រាក់ចំណេញរបស់ក្រុមហ៊ុនផលិតថាមពល មកចែកចាយឱ្យអតិថិជន និងគ្រោងបន្ថយតម្រូវការផ្នែកថាមពលជាដើម៕
ដោយ៖បណ្ដូលពេជ្រ
