ភ្នំពេញ៖«បំផុសសហគ្រិនភាពស្ត្រីនៅក្នុងអាស៊ាន​» ជាប្រធានបទ​សំខាន់មួយនៅក្នុងកិច្ចប្រជុំកំពូលស្ត្រីអាស៊ានលើកទី២​ (ឆ្នាំ២០២២) ដែលបានធ្វើឡើងនា​ថ្ងៃទី១៣​ ខែតុលាឆ្នាំ២០២២។វេទិកាមួយនេះ​ ផ្ដោតសំខាន់លើការជំរុញភាពស្មើគ្នានៃយេនឌ័រ​ តាមរយៈការលើកទឹកចិត្តស្ត្រីនៅក្នុងវិស័យជំនួញ​ឱ្យមានភាពប្រហាក់ប្រហែលគ្នាទៅនឹងបុរសដែរ​។

ស្ថិតក្រោមការរៀបចំរបស់ក្រសួងកិច្ចការនារី​ វេទិកានេះ​បានប្រមូលយកនូវជ័យលាភីពីប្រទេសនានាក្នុងអាស៊ាន​ ដែលបានឆ្លងកាត់ការជ្រើសរើសយ៉ាងហ្មត់ចត់ពីគណៈកម្មការ​វាយតម្លៃ​។តាមរយៈសមទ្ធិផលនេះដែរ​ ក្រសួងចង់លើកទឹកចិត្តទៅដល់សហគ្រិនជាស្ត្រីផ្សេងទៀតឱ្យបន្ថែមការខិតខំប្រើប្រាស់អាជីវកម្មរបស់ខ្លួនក្នុងការចូលរួមក្នុងកំណើនសេដ្ឋកិច្ចប្រទេសក្នុងតំបន់​។

អ្នកនាង Nicha Ratanachinda ដែលមកពីព្រះរាជាណាចក្រថៃ​ និងជាបុគ្គលម្នាក់ក្នុងចំណោមជ័យលាភីដទៃទៀត​ ដែលបានប្រើប្រាស់អាជីវកម្មរបស់ខ្លួនក្នុងការជួយលើកសេដ្ឋកិច្ចជាតិ​ បានបង្ហាញ​អារម្មណ៍រីករាយ​ និងរំភើបក្នុងការចូលរួមកម្មវិធី​។

អ្នកនាងនិយាយថា៖ «ខ្ញុំ ពិតជាមានកិត្តិយសណាស់​ដែលបានចូលរួមទទួលពានរង្វាន់សហគ្រិនស្ត្រីអាស៊ាន​នៅថ្ងៃនេះ​ ហើយក៏ជារឿងដ៏គួរឱ្យអំណរដែល​ខ្ញុំបានក្លាយជាគំរូទៅកាន់ស្ត្រីផ្សេងទៀត​ក្នុងដំណើរឆ្ពោះទៅរកភាព​ឯករាជ្យនៃហិរញ្ញវត្ថុ​»។

ចំណែកអ្នកស្រី Mailin Abiva ដែលជាជ័យលាភីមកពីប្រទេសហ្វីលីពីនឯណោះវិញយល់ថា​ ពានរង្វាន់ដែលអ្នកស្រីទទួលបាននេះ​ នឹងជួយជំរុញកម្លាំងចិត្តលោកស្រីបន្ថែមក្នុងការធ្វើអាជីវកម្មប្រកបដោយស្តង់ដារ និងផ្ដល់ប្រយោជន៍ដល់សង្គម ជាពិសេសគឺស្ត្រីតែម្ដង។

អ្នកស្រីបញ្ជាក់ថា៖ «ច្រើន​ឆ្នាំកន្លងមកនេះ ខ្ញុំបានប្រើប្រាស់អាជីវកម្មរបស់ខ្ញុំ​ក្នុងការជួយពង្រឹងចំណេះដឹងផ្នែកបច្ចេកទេស​ ដល់ស្ត្រីនៅក្នុងប្រទេសរបស់ខ្ញុំ ។ខ្ញុំពិតជាសប្បាយចិត្តនៅពេលបានឃើញការផ្លាស់ប្ដូរផ្នែកចំណេះដឹង​ និងលទ្ធភាពក្នុងការស្វែងរកការងារល្អប្រសើរជាងមុនរបស់ពួកគេ​»។

រីឯជ័យលាភីខ្មែរវិញគឺ​ អ្នកនាង ប៉ោ ជូ ដែលជាសហគ្រិនផ្នែកប្រឹក្សាយោបល់លើអាជីវកម្ម​ គណនី និងពន្ធដារក្នុងអាជីវកម្ម ព្រមទាំងជាជ័យលាភីម្នាក់ដែរផង​ បានកត់សម្គាល់ឃើញអំពីចំនួនស្ត្រីជាច្រើនដែលមិនមានឱកាសក្នុងការបំពេញការងារ ព្រោះមានភារកិច្ចជាមេផ្ទះ​។

អ្នកនាងបញ្ជាក់ថា​ ខ្លួនបានបង្កើតជាវេទិកាមួយដែលផ្ដល់ការងារដល់ស្ត្រីទាំងនោះឱ្យពួកគាត់មានឱកាសធ្វើការងារពីចម្ងាយ (Online)។ ដូច្នេះហើយ បើទោះបីជាក្នុងកាលទេសៈណាក៏ស្ត្រីនៅតែអាចរកចំណូលចូលគ្រួសារបាន​ និងជាពិសេសមិនបានបាត់បង់ឱកាសធ្វើការងារ ដោយសារតែបន្ទុកគ្រួសារ​។

ទាក់ទិននឹងបញ្ហានេះ​ លោកជំទាវ គង់ សូរីតា អនុរដ្ឋលេខាធិកាក្រសួងកិច្ចការនារី​​បានគូសបញ្ជាក់បន្ថែមថា​៖ «ស្ត្រី មានទំនួលខុសត្រូវជាច្រើននៅក្នុងដៃ​ ជាហេតុធ្វើឱ្យពួកគេងាយនឹងបាត់បង់ឱកាសរកចំណូល ហើយការបាត់បង់ចំណូលនេះទៀតសោតបានរារាំងការអភិវឌ្ឍរបស់ស្ត្រីនៅក្នុងសង្គម»។

ដោយមូលហេតុនេះ ក្រសួងបានជំរុញនូវយន្ដការជាច្រើនដែលរួមមានទាំងវេទិកាសហគ្រិនស្ត្រីអាស៊ាននេះផង​ ដើម្បីបង្ហាញជាសាធារណៈថា​ ស្ត្រីនៅតែទទួលបានការគាំពារ​ និងមិនទុកឱ្យស្ត្រីរងគ្រោះទៀតនោះទេ​។

គួររំលឹកថា វេទិកាសហគ្រិនស្ត្រីអាស៊ាន ត្រូវបានធ្វើឡើងក្រោមអធិបតីភាពរបស់លោកជំទាវ អ៊ឹង កន្ថាផាវី រដ្ឋមន្ត្រីនៃក្រសួងកិច្ចការនារី​ ដោយមានការចូលរួមបន្ថែមពីបណ្ដាញសហគ្រិនស្ត្រីកម្ពុជា​ (Cam-WEN) ក្រុមប្រឹក្សាសហគ្រិនវ័យក្មេងអាស៊ាន​ (AYEAC) និងសហគ្រិនស្ត្រីផ្សេងទៀតសរុបប្រមាណជា ២០០នាក់​៕

ដោយ៖ កែវ បុស្បា