តូក្យូ៖ រាជរដ្ឋាភិបាលជប៉ុននិយាយថា ការចំណាយជាក់ស្តែង លើ ការរៀបចំពិធីបុណ្យសពរដ្ឋ របស់អតីតនាយករដ្ឋមន្ត្រី អាបេ ស៊ីនហ្សូ(Abe Shinzo) កាលពីខែមុន គឺជាង ១.២ ពាន់លានយ៉េន ឬជាងប្រាំបីលានដុល្លារ។

រដ្ឋមន្ត្រីទទួលបន្ទុកគណៈរដ្ឋមន្ត្រី លោក មាត្សូស៊ូណូ ហ៊ីរ៉ូកាស៊ូ (Matsuno Hirokazu) បាននិយាយ នាថ្ងៃទី១៤ ខែតុលានេះថា ការចំណាយជាក់ស្តែងគឺ ទាបជាងការប៉ាន់ប្រមាណពីមុន ប្រហែល ៤០០ លានយ៉េន ដោយគម្រោងចំណាយមុន មានរហូតដល់ចំនួន ១.៦៦ ពាន់លានយ៉េនឯណោះ។

លោក Matsuno បាននិយាយថា ការចំណាយសម្រាប់ ការ ស្វាគមន៍ ឥស្សរជនបរទេសគឺប្រហែល ៥១០ លានយ៉េន ឬប្រហែល ៣.៥ លានដុល្លារ ហើយការចំណាយលើការពង្រាយបុគ្គលិក សន្តិសុខ មានចំនួន ៤៨០ លានយ៉េន ឬប្រហែល ៣.៣ លានដុល្លារ៕
ប្រភពពី NHK , ប្រែសម្រួល៖ សារ៉ាត