ពិធីបុណ្យអុំទូកនៅក្រុងតាខ្មៅខេត្តកណ្ដាលត្រូវលើកពេលទៅចុងខែតុលាវិញ
ភ្នំពេញ៖ ពិធីបុណ្យអុំទូកនៅក្រុងតាខ្មៅខេត្តកណ្ដាលដែលគ្រោងធ្វើនៅថ្ងៃទី២២និង២៣ខែតុលា ត្រូវលើកពេលទៅធ្វើនៅចុងខែ។ នេះបើតាមសេខក្ដីប្រកាសព័ត៌មានរបស់រដ្ឋបាលខេត្តកណ្តាលដែលជូនដំណឹងស្តីពីការលើកពេលការរៀបចំពិធីប្រណាំងទូកនៅទន្លេបាសាក់ ក្រុងតាខ្មៅ ។
រដ្ឋបាលខេត្តបញ្ជាក់ថាត្បិតតែលើកថ្ងៃប៉ុន្តែ កម្មវិធីអុំទូកនឹងនៅតែរក្សាដដែលខណៈកម្មវិធីកម្សាន្តសប្បាយនានាក៏មិនផ្លាស់ប្ដូរដែរ។អភិបាលខេត្ត កណ្ដាលឯកឧត្តម គង់ សុភ័ណ្ឌ មានប្រសាសន៍ថាបញ្ហាអាកាសធាតុបណ្ដាលឱ្យពិធីទាំងមូលត្រូវលើកពេល។
ឯកឧត្តមមានប្រសាសន៍ថា ៖ « អាកាសធាតុមិនសូវអំណោយផលដល់យើង ។ ការពន្យានេះមិនមានខាតអ្វីនោះទេ។ យើងពន្យាបន្តិចសិនទៅដើម្បីបង្ករភាពងាយស្រួលសប្បាយទាំងអស់គ្នា។ យើងក៏បានរៀបចំកម្មវិធីនៅថ្ងៃសៅរិ៍ អាទិត្យផងដែរ ដើម្បីឱ្យសប្បាយទាំងអស់គ្នា។ ចុងខែទឹកអាចស្រកបន្តិចទៅបងប្អូនអ្នកស្រែចម្ការក៏អាចមកលេងបានដែរ ។ »
ឯកឧត្តមអភិបាល ក៏បានរំពឹងថានឹងមានភ្ញៀវទេសចរច្រើនកុះករមកចូលរួម ព្រោះមានតន្រ្តី តារាកំប្លែង តារាចំរៀងមកចូលរួមសម្ដែងច្រើនកុះករ ។ លោកថា ការប្រណាំងទូកមានទៅដល់ជាង៨០ ។ មិនតែប៉ុណ្ណោះក៏មានការរៀបចំចរាចរណ៍ សន្តិសុខ បានល្អមានរបៀបរៀបរយទៀតផង។
ឯកឧត្តម គង់ សុភ័ណ្ឌ បញ្ជាក់ថា៖ « យើងការពារអ្វីដែលជារបស់យើង ការពារប្រពៃណីទំនៀមទំលាប់ពិធីបុណ្យអុំទូកទោះមានការខ្វះខាតយ៉ាងម៉េចក៏ដោយក៏យើងនៅតែខិតខំប្រឹងប្រែង»។
ពិធីបុណ្យអុំទូកតាមបណ្ដាខេត្តនេះបានបង្ហាញពីការចូលរួមរបស់ប្រជាពលរដ្ឋដើម្បី អបអរយើងបានបញ្ចប់រដូវវស្សាហើយ ។
ឯកឧត្តមអភិបាលខេត្តបានបញ្ជាក់ទៀតថា ៖ «ពិធីបុណ្យអុំទូកបង្ហាញពីយើងចេះសាមគ្គីគ្នា បង្ហាញថាយើងមានភាពអភិវឌ្ឍ បង្ហាញថាយើងអាចទប់ស្កាត់កូវីដ បានហើយ«។
ម្ចាស់ហាងម្លប់ស្វាយខេត្តកណ្ដាលបាននិយាយថា៖«នៅពិធីបុណ្យអុំទូកខាងមុខនេះខ្ញុំមិនហ៊ាននិយាយទេ ថាអាចនឹងទទួលបានអតិថិជនច្រើនឬយ៉ាងណានោះឡើយ ប៉ុន្តែមួយរយៈចុងក្រោយនេះគឺមិនសូវមានភ្ញៀវ ចំណូលធ្លាក់ចុះ ៥០ភាគរយ។ខ្ញុំ រងគ្រោះដោយសារកូវីដផង ឥឡូវទឹកជំនន់ទៀត។ ដូច្នេះមានតែចាំមើលសិនថាតើនឹងទទួលបានភ្ញៀវច្រើនឬក៏អត់។
ពិធីបុណ្យអុំទូកខេត្តកណ្ដាលឆ្នាំនេះនឹងមានទូកចូលរួមប្រណាំងប្រមាណជាង៨០គូ។ក្នុងនោះក្រុមកីឡាករប្រណាំងទូកតាមបណ្ដាស្រុកនានាក៏កំពុងដុតដៃដុតជើងហ្វឹកហាត់ដើម្បីត្រៀមចូលសមរភូមិប្រកួត។នៅឆ្នាំ២០២២នេះកម្ពុជាមិនមានរៀបចំពិធីអុំទូកនៅថ្នាក់ជាតិឡើយដោយសារតែភ្នំពេញជាប់រវល់ទទួលភ្ញៀវប្រជុំអាស៊ាន៕ ដោយ៖ ហោ សុវិទ្យា
