មណ្ឌលគិរី៖ឯកឧត្ដមនាយឧត្ដមសេនីយ៍ ប៉ែន វិបុល អគ្គស្នងការ រងនគរបាលជាតិ និងជាប្រធាននាយកដ្ឋានបុគ្គលិក បានអញ្ជើញ ចូលរួមក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ ឋានន្តរស័ក្តិជូនមន្រ្តីនគរបាលជាតិ នៃស្នងការដ្ឋាននគរបាល ខេត្តមណ្ឌលគិរីនាព្រឹកថ្ងៃទី១៩ ខែតុលា ។

ក្នុងឱកាសនេះឯកឧត្ដម នាយឧត្ដមសេនីយ៍ ប៉ែន វិបុល បាន ថ្លែង កោតសរសើរ ដល់កងកម្លាំងនគរបាលខេត្តមណ្ឌលគិរីទាំងមូល ដែលបានខិតខំយកចិត្តទុកដាក់ ក្នុងការរក្សាការពារសន្តិសុខ សណ្តាប់ធ្នាប់ សុវត្ថិភាព ក្នុងដំណើរការបោះឆ្នោតជ្រើសរើសក្រុម ប្រឹក្សាឃុំ/សង្កាត់ នាពេលកន្លងមក ក៏ដូចជា ខិតខំប្រឹងប្រែង ទប់ស្កាត់ និងបង្រ្កាបបទល្មើស នៅក្នុងមូលដ្ឋាន បានយ៉ាង ល្អប្រសើរ។

ឯកឧត្តម ក៏បានណែនាំដល់មន្រ្តីនគរបាលតាមការិយាល័យនីមួយៗ ត្រូវយកចិត្តទុកដាក់សិក្សាស្រាវជ្រាវ និងពង្រឹងសមត្ថភាពរបស់ខ្លួន ដើម្បីធ្វើយ៉ាងណាបម្រើសេវាសាធារណៈជូនប្រជាពលរដ្ឋឱ្យមានតម្លាភាព និងប្រសិទ្ធភាព ជាពិសេស ការងារសន្តិសុខត្រូវក្តាប់ ព័ត៌មាន ស្តីពីសន្តិសុខសណ្តាប់ធ្នាប់ នៅតាមបណ្តាមូលដ្ឋាន ក្នុងយុទ្ឋនាការ បោះឆ្នោតឃុំ/សង្កាត់ អាណត្តិទី០៥ នាពេលខាងមុខនេះ ត្រូវ ការពារ ជាតិ សាសនា ព្រះមហាក្សត្រ ការពាររដ្ឋធម្មនុញ្ញ នៃ ព្រះរាជាណាចក្រកម្ពុជា និងការពារ ឱ្យបាននូវរាជរដ្ឋាភិបាល ស្របច្បាប់ ដែលកើតចេញពីឆន្ទះរបស់ប្រជាពលរដ្ឋ តាមរយៈ ការបោះឆ្នោត។

លោក ស៊ន សារុន អភិបាលរងខេត្តមណ្ឌលគិរី បានចូលរួម អបអរ សាទរ ដែលមន្រ្តីនៃស្នងការដ្ឋាននគរបាលខេត្ត ត្រូវបាន ប្រកាស ផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្តិនាពេលនេះ ដើម្បីជាការលើកទឹកចិត្ត។

សូមបញ្ជាក់ថា មន្ត្រីនគបាលជាតិ នៃស្នងការដ្ឋាននគបាលខេត្តមណ្ឌលគិរី ដែលត្រូវប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្តិ មានចំនួន ៨៤រូប ក្នុងនោះ ថ្នាក់ស្នងការរង នាយការិយាល័យ នាយរងការិយាល័យ ថ្នាក់អធិការរង ព្រមទាំងតម្លើងឋានន្តរស័ក្តិជូនមន្ត្រីនគរបាល៕ ដោយ៖ ពលៈ