ជប៉ុនផ្ដល់ជំនួយលើគម្រោងគាំទ្រថ្មីមួយសម្រាប់ជួសជុលប្រាសាទបាយ័ន
ភ្នំពេញ៖រដ្ឋាភិបាលជប៉ុនបានផ្ដល់ជំនួយលើគម្រោងគាំទ្រថ្មីមួយដែលមានចំនួនទឹកប្រាក់៥២០,៨៤៧ដុល្លារ សម្រាប់ជួសជុលប្រាសាទបាយ័នក្នុងតំបន់រមណីយដ្ឋានប្រវត្តិសាស្ត្រអង្គរ។
គម្រោងគាំទ្រថ្មីនេះមានឈ្មោះថា «គម្រោងគាំទ្រការទិញ និងថែទាំយានយន្ត និងម៉ាស៊ីនធុនធ្ងន់ ព្រមទាំងការទិញសម្ភារសម្រាប់ការងាររក្សាលំនឹងតួប៉មកណ្ដាលនៃប្រាសាទបាយ័នដែលទាក់ទងនឹងគម្រោ JASA»។ នេះបើតាមសេចក្ដីប្រកាសព័ត៌មានក្រសួងវប្បធម៌ និងវិចិត្រសិល្បៈ និងស្ថានទូតជប៉ុនប្រចាំកម្ពុជា ចុះថ្ងៃទី១៩ ខែតុលា ឆ្នាំ២០២២។
យោងតាមសេចក្ដីប្រកាសព័ត៌មានដដែលបានបន្តថា គម្រោងគាំទ្រថ្មីនេះ នឹងរួមចំណែកដល់ការអនុវត្តការងារអភិរក្ស និងជួសជុលប្រាសាទបាយ័ន ដែលជាប្រាសាទដ៏សំខាន់បំផុតមួយនៅក្នុងរមណីយដ្ឋានអង្គរ។
ជុំវិញរឿងនេះ ឯកឧត្តម ឡុង ប៉ុណ្ណាស៊ីរីវត្ថ រដ្ឋលេខាធិការ និងជាអ្នកនាំពាក្យក្រសួងវប្បធម៌ និងវិចិត្រសិល្បៈបានប្រាប់ថា រដ្ឋាភិបាលជប៉ុនបានផ្ដល់ជំនួយនេះគឺមិនមែនត្រឹមឥឡូវនេះទេប៉ុន្តែបានផ្ដល់ជំនួយនេះតាំងពីយូរមកហើយ។
ឯកឧត្តមរដ្ឋលេខាធិការបានបន្តទៀតថា៖«សូមទាក់ទងទៅអាជ្ញាធរអប្សរាវិញ ព្រោះអីគាត់ជំនាញ ហើយធ្វើការផ្ទាល់ វាបានលទ្ធផលជាងសម្រាប់អ្នកសារព័ត៌មាន ជៀសស្អីក៏មកក្រសួង»។
ចំណែកលោក ឡុង កុសល អ្នកនាំពាក្យអាជ្ញាធរជាតិអប្សារា បានប្រាប់ថា គម្រោងជួសជុលប្រាសាទបាយ័ន គឺចាប់ផ្ដើមតាំងពីឆ្នាំ១៩៩០មក ហើយវាក៏បង្ហាញថាជាការងារមួយដែលមានការយកចិត្តទុកដាក់ពីរាជរដ្ឋាភិបាលកម្ពុជា ក៏ដូចជាដៃគូរអន្តរជាតិ ជាពិសេសប្រទេសជប៉ុនដែលជាប្រធាននៃគណៈកម្មាការប្រាសាទអង្គរ មកលើការងារបេតិកភណ្ឌពិភពលោក។
លោក ឡុង កុសល បានបញ្ជាក់ថា៖ «កិច្ចការនេះចាប់ផ្ដើមតាំងពីឆ្នាំ១៩៩៣ រហូតមកដល់ឆ្នាំ២០២២ ហើយក៏បន្តទៅរហូតរយៈពេល១០ឆ្នាំបន្តទៀត ចឹងអានេះវាជាមោទនភាព និងការជោគជ័យគំរូមួយ សម្រាប់កិច្ចសហប្រតិបត្តិការអន្តរជាតិ»។
លោកបន្ថែមថា ក្នុងនាមជាម្ចាស់ផ្ទះ ទៅលើកិច្ចការងារថែរក្សា លើកតម្លៃ លើកតម្កើងនៃបេតិកភណ្ឌវប្បធម៌ជាតិ ដែលជាបេតិកភណ្ឌអន្តរជាតិ និងពិភពលោក។
សូមបញ្ជាក់ថា នៅឆ្នាំ១៩៩៤ រដ្ឋាភិបាលជប៉ុនបានបង្កើតក្រុមរដ្ឋាភិបាលជប៉ុន សម្រាប់ការថែរក្សាការពារប្រាសាទអង្គរ(JSA) ហើយJSA ត្រូវបានដឹកនាំដោយ លោកបណ្ឌិត តាកិស៊ិ ណាកាហ្គាវ៉ា សាស្ត្រាចារ្យនៃសាកលវិទ្យាល័យវាយិដា ដែលជាគម្រោងមួយតាមរយៈអង្គការយូណេស្កូ Japan Funds in Trust សម្រាប់ការអភិរក្សវប្បធម៌ បេតិកភណ្ឌពិភពលោក។ JSA បានចំណាយថវិកាសរុបប្រមាណ២៧លានដុល្លារ ចាប់ពីជំហានទី១ ដល់ជំហានទី៥ ដើម្បីអនុវត្តសកម្មភាពអភិរក្ស និងជួសជុលប្រាសាទអង្គរវត្ត និងប្រាសាទបាយ័ន។
លើសពីនេះទៀត ចាប់តាំងពីឆ្នាំ២០០៥ ក្នុងជំហានទី៣ JSA និងអាជ្ញាធរជាតិអប្សរា បាននិងកំពុងចូលរួមក្នុងគម្រោងរួមគ្នា ដែលហៅថា ជប៉ុន-អប្សរាការពារ ប្រាសាទអង្គរ(JASA)។ នៅខែមេសាឆ្នាំនេះ ជំហានទី៦ បានចាប់ផ្ដើមធ្វើការស្រាវជ្រាវនិងធ្វើការលើការរក្សាលំនឹងតួប៉មកណ្ដាលនៃប្រាសាទបាយ័នជាចម្បង៕
ដោយ៖ជា សុខនី
