ក្រុមអ្នកតស៊ូនៅក្នុងទីក្រុងយ៉ាំងហ្គោនអះអាងទទួលខុសត្រូវចំពោះការបំផ្ទុះគ្រាប់បែកក្នុងពន្ធនាគារ
មីយ៉ាន់ម៉ា៖ក្រុមអ្នកតស៊ូនៅទីក្រុងយ៉ាំងហ្គោន ដែលមានឈ្មោះថា ទីភ្នាក់ងារកិច្ចការពិសេសភូមា (Special Task Agency of Burma) បានអះអាងទទួលខុសត្រូវចំពោះការវាយប្រហារដោយបានបំផ្ទុះគ្រាប់បែកនៅពន្ធនាគារដ៏ធំបំផុតរបស់ទីក្រុងយ៉ាំងហ្គោន។
ក្រុមនេះបានបញ្ជាក់នៅក្នុងសេចក្តីថ្លែងការណ៍មួយថា ខ្លួនបានបំផ្ទុះគ្រាប់បែកនៅពន្ធនាគារអ៊ីនសេន (Insein Prison) ដែលបានបណ្តាលឱ្យជនស៊ីវិលប្រាំនាក់ និងមន្ត្រីពន្ធនាគារបីនាក់ បានស្លាប់ ខណៈ ១៨ នាក់ផ្សេងទៀតបានរងរបួស។
ក្រុមអ្នកតស៊ូ បានអះអាងថាជាអ្នកនៅពីក្រោយការវាយប្រហារនោះ ក្រុមដដែលនេះបានបដិសេធក្នុងការទទួលខុសត្រូវចំពោះការស្លាប់ និងរបួសរបស់ជនស៊ីវិល ដោយបានចង្អុលមុខទៅកាន់ទាហានមីយ៉ាន់ម៉ាឱ្យទទួលខុសត្រូវជំនួសវិញ។
នៅក្នុងសេចក្តីថ្លែងការណ៍របស់ខ្លួនដែលមានចំណងជើងថា “ការកាត់ទោសប្រហារជីវិតចំពោះមន្ត្រីពន្ធនាគារអ៊ីនសេន” ក្រុមទីភ្នាក់ងារកិច្ចការពិសេសភូមានេះ បាននិយាយថា ទាហានមីយ៉ាន់ម៉ាត្រូវទទួលខុសត្រូវចំពោះការបាញ់ប្រហារទៅលើហ្វូងមនុស្សទាំងអស់នោះ។
សម្រាប់សាក្សីដែលបានមើលឃើញផ្ទាល់ភ្នែកវិញ បានលើកឡើងថា បន្ទាប់ពីគ្រាប់បែកបានផ្ទុះនៅក្នុងពន្ធនាគារភ្លាមៗ ប្រជាជនបានភ័យស្លន់ស្លោ ហើយរត់ចេញទៅក្រៅទាំងអស់គ្នា។ នៅពេលនោះ ត្រូវបានគេឱ្យឃើញមន្ត្រីយោធាមីយ៉ាន់ម៉ាបានបាញ់ប្រហារសំដៅទៅកាន់ហ្វូងមនុស្សទាំងអស់នោះ។
រដ្ឋមន្ត្រីសិទ្ធិមនុស្សនៃរដ្ឋាភិបាលស្រមោល លោក Aung Myo Min ដែលជាសម្ព័ន្ធមិត្តនៃក្រុមប្រឆាំងរបបយោធាបានប្រាប់សារព័ត៌មាន CNA ថា លោកប្រកាសធ្វើការថ្កោលទោសអំពើហិង្សាមួយនេះ។
លោកបានមានប្រសាសន៍ថា៖ «យើងមានការសោកស្តាយដែលបានដឹងពីការបំផ្ទុះគ្រាប់បែកដែលបណ្តាលឲ្យជនស៊ីវិលស្លាប់ រួមទាំងម្តាយរបស់សកម្មជនរបស់យើងដែលកំពុងជាប់ក្នុងពន្ធនាគារក៏បានស្លាប់ផងដែរ»។
លោកបានបន្តថា៖ «ខណៈដែលកំពុងព្យាយាមវាយប្រហារទៅលើក្រុមយោធាភេរវករ សូមអ្នកទាំងអស់គ្នាប្រុងប្រយ័ត្នឱ្យបានម៉ឺងម៉ាត់ កុំឱ្យមានគ្រោះថ្នាក់ណាមួយកើតមានឡើងដល់ជនស្លូតត្រង់។ ការការពារប្រជាជនយើងជាកាតព្វកិច្ចចាំបាច់គ្រប់កាលៈទេសៈទាំងអស់»។
លើសពីនេះ ទីភ្នាក់ងារកិច្ចការពិសេសភូមា បានលើកឡើងថា កងទ័ពរបស់ខ្លួនមិនបានខូចខាតអ្វីនោះទេ ហើយបានសង្កត់ធ្ងន់ថា វាក៏មិនមានជាប់ពាក់ព័ន្ធនឹងស្ថាប័ននយោបាយណាមួយឡើយ។ ក្រុមភ្នាក់ងារនេះក៏បានព្រមានថា ខ្លួននឹងបន្តរៀបចំការវាយប្រហារបន្ថែមទៀតលើមន្ត្រីរបបយោធា និងមន្ត្រីក្រោមឱវាទជាច្រើនទៀត។
យោងតាមទីភ្នាក់ងារសារព័ត៌មានមីយ៉ាន់ម៉ា (Myanmar News Agency) កាលពីថ្ងៃពុធ ដែលជាថ្ងៃកើតហេតុ រដ្ឋមន្ត្រីក្រសួងកិច្ចការផ្ទៃក្នុងនៃរបបយោធា ឧត្តមសេនីយ៍ទោ លោក Soe Htut ក៏បានចុះត្រួតពិនិត្យពន្ធនាគារអ៊ីនសេនផងដែរបន្ទាប់ពីមានការផ្ទុះ។ លោកក៏បានចូលជួបគ្រួសារអ្នកស្លាប់ និងចូលរួមរំលែកទុក្ខដល់ពួកគេ និងបុគ្គលិកពន្ធនាគារ ហើយក៏បានផ្តល់ជំនួយជាសាច់ប្រាក់មួយចំនួនផងដែរ៕
ដោយ៖ធា សុខណា
