អតីតអ្នកកាសែតវិទ្យុអាស៊ីសេរី អរគុណតុលាការកំពូលដែលប្រគល់លិខិតឆ្លងដែនមកលោកវិញ
ភ្នំពេញ៖«នៅទីបំផុត ខ្ញុំទទួលបានលិខិតឆ្លងដែនពីតុលាការវិញហើយ ។ វាជាការផ្តល់លទ្ធភាពឱ្យខ្ញុំធ្វើដំណើរទៅជួបឪពុកម្តាយ សាច់ញាតិ ជាពិសេសគឺបងស្រីរបស់ខ្ញុំដែលកំពុងមានជំងឺមហារីកថ្លើមធ្ងន់ធ្ងរ»។ នេះជាសំណេរបស់លោក យាង សុធារិន្ទ ហៅ យាង សុជាមេត្តា អតីតអ្នកកាសែតនៃវិទ្យុអាស៊ីសេរី បន្ទាប់ពីលោកបានទទួលលិខិតឆ្លងដែនពីតុលាការកំពូលកាលពីរសៀលថ្ងៃទី២៨ ខែតុលា ឆ្នាំ២០២២។
កាលពីថ្ងៃទី២៦ ខែតុលា តុលាការកំពូលបានបើកសវនាការលើបណ្តឹងសាទុក្ខរបស់លោក យាង សុធារិន្ទ ហៅ យាង សុជាមេត្តា ដើម្បីសុំដកលិខិតឆ្លងដែនទៅប្រើប្រាស់វិញ។ នៅក្នុងអង្គសវនាការនោះ លោក យាង សុធារិន្ទ បានស្នើសុំចៅក្រមសម្រេចផ្តល់លិខិតឆ្លងដែនដល់រូបលោក ដើម្បីឱ្យលោកអាចធ្វើដំណើរទៅសួរសុខទុក្ខក្រុមគ្រួសារនៅកម្ពុជាក្រោម ដែលជាស្រុកកំណើតរបស់លោក និងខណៈពេលដែលបងស្រីបង្កើតរបស់លោកកំពុងធ្លាក់ខ្លួនឈឺធ្ងន់។
នៅចំពោះមុខ ប្រធានក្រុមប្រឹក្សាជំនុំជម្រះ លោក គង់ ស្រ៊ីម លោក យាង សុធារិន្ទ បានបញ្ជាក់អះអាងថា លោកនឹងមិនរត់ចេញពីទឹកដីកម្ពុជាក្រោម ដែលជាទឹកដីកំណើតរបស់លោកនោះទេ ហើយដើម្បីឱ្យតុលាការទុកចិត្ត លោកក៏បានស្នើចៅក្រមដាក់លក្ខខណ្ឌកំណត់លើលិខិតឆ្លងដែនរបស់លោក ដោយហាមប្រាមមិនឱ្យរូបលោកចាកចេញពីកម្ពុជាក្រោមទៅក្រៅប្រទេស។ លោក យាង សុធារិន្ទ ប្រាប់ចៅក្រមបន្ថែមថា លោកមិនបានចាកចេញទៅទឹកដីកំណើតជាង ៥ ឆ្នាំមកហើយ។
បន្ទាប់ពីបានពិនិត្យពិចារណាលើសំណើរបស់លោក យាង សុធារិន្ទ ប្រធានក្រុមប្រឹក្សាជំនុំជម្រះ លោក គង់ ស្រ៊ីម នៅ ក្នុងសវនាការនាព្រឹកថ្ងៃសុក្រ ទី២៨ ខែតុលា បានសម្រេចប្រគល់លិខិតឆ្លងដែនឱ្យទៅឱ្យលោក យាង សុធារិន្ទ កាន់កាប់វិញ ដោយសំអាងថា ជនជាប់ចោទរូបនេះតែងចូលរួមសហការជាមួយតុលាការនៅគ្រប់នីតិវិធី និងបងស្រីឈឺធ្ងន់នៅស្រុកកំណើត [ទឹកដីកម្ពុជាក្រោម] ហើយសន្យាថា នឹងបង្ហាញខ្លួននៅចំពោះមុខតុលាការគ្រប់ពេលកោះហៅ។ ប៉ុន្តែ លោក គង់ ស្រ៊ីម ព្រមានផងដែរ ក្នុងករណីដែលជនជាប់ចោទ គេចវេសមិនចូលខ្លួនធ្វើតាមការសន្យានៅពេលតុលាការកោះហៅ នោះជនជាប់ចោទអាចប្រឈមនឹងការចាប់ខ្លួនដាក់ពន្ធនាគារជាថ្មីទៀត។
លិខិតឆ្លងដែនរបស់លោក យាង សុធារិន្ទ ត្រូវតុលាការប្រគល់មកឱ្យវិញនៅរសៀលថ្ងៃទី២៨ ខែតុលា។ នាយប់ថ្ងៃដដែល លោក យាង សុធារិន្ទ បានសរសេរសារនៅលើបណ្ដាញសង្គមហ្វេសប៊ុករបស់លោក ថ្លែងអំណរគុណដល់សម្តេចតេជោនាយករដ្ឋមន្ដ្រី ហ៊ុន សែន បានជួយណែនាំដល់រូបលោក ដាក់លិខិតស្នើសុំទៅកាន់រដ្ឋមន្ដ្រីក្រសួងយុត្តិធម៌ឱ្យជួយអន្តរាគមន៍ទៅតុលាការកំពូល ដើម្បីប្រគល់លិខិតឆ្លងដែនដល់លោកវិញ ផ្អែកតាមគោលការណ៍មនុស្សធម៌។
ការថ្លែងអំណរគុណរបស់អតីតអ្នកកាសែតអាស៊ីសេរីរូបនេះក៏មានផងដែរ ចំពោះអង្គការការពារសិទ្ធិមនុស្ស និងអង្គការ សមាគមន៍អ្នកសារព័ត៌មានជាតិនិងអន្ដរជាតិ ដែលកន្លងមក តែងតែទទូចឱ្យតុលាការប្រគល់លិខិតឆ្លងដែនដល់លោកវិញ ដើម្បីអាចធ្វើដំណើរទៅជួបគ្រួសារនៅឯកម្ពុជាក្រោម។
ថ្លែងប្រាប់សារព័ត៌មាន CPA នៅព្រឹកថ្ងៃសៅរ៍ ទី២៩ ខែតុលានេះ លោក យាង សុធារិន្ទ ប្រាប់ឱ្យដឹងថា លោកកំពុងតែស្ថិតនៅលើឡានក្រុង ធ្វើដំណើរទៅកាន់ស្រុកកំណើតនៅកម្ពុជាក្រោម ដោយរំពឹងថានឹងទៅដល់ផ្ទះនៅវេលាប្រមាណ៤រសៀល។ រឿងអាទិភាពដំបូងបង្អស់របស់លោក គឺចំណាយពេលជាមួយក្រុមគ្រួសារ ដែលខកខានមិនបានជួបមុខគ្នាដោយផ្ទាល់អស់រយៈពេល៥ឆ្នាំមកហើយ និងជាពិសេសគឺមើលថែរបងស្រីដែលកំពុងតែមានជំងឺធ្ងន់។
បើតាមលោក យាង សុធារិន្ទ លោកគ្រោងស្នាក់នៅស្រុកកំណើតឯកម្ពុជាក្រោមរយៈពេលមួយខែ ដើម្បីដើរសួរសុខទុក្ខញាតិមិត្តបងប្អូន ដែលទន្ទឹងរង់ចាំជួបលោក ក៏ដូចជាដើរធ្វើបុណ្យទាននៅតាមវត្តអារាមនានានៅកម្ពុជាក្រោម នាឱកាសពិធីបុណ្យកឋិននេះ។ បន្ថែមពីលើនេះ លោកក៏មានគម្រោងទៅកាន់ទីតាំងដើមឈើទាល របស់ឧកញ៉ា សឺន គុយ។ លោក ឧកញ៉ា សឺន គុយ ជាអតីតអភិបាលខេត្តព្រះត្រពាំង មុនពេលខេត្តនេះធ្លាក់ទៅក្រោមការគ្រប់គ្រងរបស់វៀតណាម។
ទាក់ទងទៅនឹងការសម្រេចរបស់តុលាការកំពូល ប្រគល់លិខិតឆ្លងដែនជូនទៅអតីតអ្នកសារព័ត៌មានអាស៊ីសេរី គឺលោក យាង សុធារិន្ទ វិញនេះ លោកស្រី ចក់ សុភាព នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា បានសម្ដែងការអបអរសាទរ ព្រោះវានឹងអាចបើកផ្លូវឱ្យលោក យាង សុធារិន្ទ អាចធ្វើដំណើរទៅសួរសុខទុក្ខបងស្រីដែលមានជំងឺធ្ងន់ធ្ងរ និងម្តាយឪពុកចាស់ជរារបស់លោក។ លោកស្រី ចក់ សុភាពសង្ឃឹមថា តុលាការ នាពេលខាងមុខ នឹងទម្លាក់បទចោទប្រកាន់ដែលបានអូសបន្លាយជាយូរជាង៥ឆ្នាំលើរូបលោក យាង សុធារិន្ទ និងសហការី គឺលោក អ៊ួន ឈិន ផងដែរ។
សូមជម្រាបថា លោក យាង សុធារិន្ទ ហៅ យាង សុជាមេត្តា និងលោក អ៊ួន ឈិន អតីតអ្នករាយការណ៍ព័ត៌មានវិទ្យុអាស៊ីសេរី ត្រូវបានសមត្ថកិច្ចចាប់ខ្លួនកាលពីថ្ងៃទី១៤ ខែវិច្ឆិកា ឆ្នាំ២០១៧ នៅផ្ទះសំណាក់ ម៉ារឌី ក្នុងខណ្ឌមានជ័យ រាជធានីភ្នំពេញ និងបានដកហូតលិខិតឆ្លងដែនរបស់អ្នកទាំង២។ អ្នកទាំងពីរ រងការចោទប្រកាន់ពីបទ «ប្រគល់ឱ្យរដ្ឋបរទេសនូវព័ត៌មានជាអាទិ៍ ដែលអាចឱ្យអន្តរាយការការពារជាតិ»។ គិតពីថ្ងៃដែលសមត្ថកិច្ចចាប់ខ្លួនមកដល់ពេលនេះ សំណុំរឿងព្រហ្មទណ្ឌរបស់អតីតអ្នកកាសែតនៃវិទ្យុអាស៊ីសេរីទាំងពីរបានអូសបន្លាយអស់រយៈពេលជិត៥ឆ្នាំមកហើយហើយ៕
ដោយ៖កែវ កិរិយា
