អ៊ីរ៉ង់ប្រកាសអំពីជោគជ័យនៃការផលិតមីស៊ីលអ៊ីពែរសូនិក
អ៊ីរ៉ង់៖មេបញ្ជាការអង្គភាពអវកាសឆ្មាំបដិវត្តន៍របស់អ៊ីរ៉ង់ លោកឧត្តមសេនីយ Amirali Hajizadeh បានប្រកាសនៅថ្ងៃព្រហស្បតិ៍ ទី១០ ខែវិច្ឆិកានេះថា អ៊ីរ៉ង់បានផលិតមីស៊ីលអ៊ីពែរសូនិក (Hypersonic) ជាប្រភេទមីស៊ីលដែលមានល្បឿនលឿនជាងសំឡេង និងមានសមត្ថភាពវាយប្រហារគ្រប់ប្រព័ន្ធការពារទាំងអស់។
មីស៊ីលអ៊ីពែរសូនិក Hypersonic គឺជាមីស៊ីលដែលអាចផ្ទុកអាវុធនុយក្លេអ៊ែរ និងអាចហោះបានលឿនជាងសំឡេងដល់ទៅ៥ដងឯណោះ ពោលគឺ ចាប់ពីប្រាំមួយពាន់គីឡូម៉ែត្រក្នុងមួយម៉ោងឡើងទៅ។ ទីភ្នាក់ងារសារព័ត៌មានរដ្ឋរបស់អ៊ីរ៉ង់ Fars បានស្រង់សម្ដីលោកឧត្តមសេនីយ Hajizadeh ថា មីស៊ីលអ៊ីពែរសូនិកដែលអ៊ីរ៉ង់ផលិតនេះ ធ្វើឡើងដើម្បីទប់ទល់នឹងប្រព័ន្ធការពារដែនអាកាស និងប្រព័ន្ធការពារប្រឆាំងមីស៊ីលទាំងអស់។
លោក Haijizadeh បានថ្លែងដោយអំនួតនិងភាពជឿជាក់ថា ប្រទេសដទៃត្រូវប្រើពេលយូរទៀត គឺជាច្រើនទសវត្សរ៍ទៀត មុនពេលអាចផលិតប្រព័ន្ធការពារឬប្រព័ន្ធចាប់ស្ទាក់មីស៊ីលអ៊ីពែរសូនិកដែលអ៊ីរ៉ង់ទើបតែផលិតបាននេះ។ សម្រាប់ឧត្តមសេនីយ Haijizadeh មីស៊ីលអ៊ីពែរសូនិករបស់អ៊ីរ៉ង់នេះ ឆ្លុះបញ្ចាំងឱ្យឃើញពីការលោតផ្លោះដ៏អស្ចារ្យនៅក្នុងវិស័យផលិតមីស៊ីលរបស់អ៊ីរ៉ង់។
គួរកត់សម្គាល់ថា ការប្រកាសនេះធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីអ៊ីរ៉ង់បានទទួលស្គាល់ថា ខ្លួនបានបញ្ជូនយន្តហោះគ្មានមនុស្សបើកទៅរុស្ស៊ី។ ចំណែកកាសែត Washington Post បានរាយការណ៍កាលពីថ្ងៃទី១៦ ខែតុលាថា អ៊ីរ៉ង់កំពុងរៀបចំបញ្ជូនមីស៊ីលទៅកាន់ប្រទេសរុស្ស៊ី ប៉ុន្តែទីក្រុងតេអេរ៉ង់បានច្រានចោលរបាយការណ៍នេះថា មិនមែនជារឿងពិតនោះឡើយ។
ទាំងអ៊ីរ៉ង់ និងរុស្ស៊ី សុទ្ធតែជាគោលដៅដោយការដាក់ទណ្ឌកម្មយ៉ាងតឹងរ៉ឹង។ អ៊ីរ៉ង់រងការដាក់ទណ្ឌកម្មដោយសារតែប្រទេសនេះ រឹងទទឹងមិនព្រមបន្ទន់ជំហរដើម្បីស្ដារកិច្ចព្រមព្រៀងនុយក្លេអ៊ែរឆ្នាំ ២០១៥ ឡើងវិញ។ ចំណែករុស្ស៊ីវិញ រងទណ្ឌកម្ម ចាប់តាំងពីប្រទេសនេះបានចូលឈ្លានពានអ៊ុយក្រែនតាំងពីខែកុម្ភៈ។
ប្រទេសទាំងពីរ គឺអ៊ីរ៉ង់និងរុស្ស៊ី បានឆ្លើយតបទៅនឹងការដាក់ទណ្ឌកម្មទាំងនេះ ដោយជំរុញកិច្ចសហប្រតិបត្តិការលើវិស័យសំខាន់ៗ ដើម្បីជួយជំរុញសេដ្ឋកិច្ចរបស់ពួកគេ។
កាលពីខែមីនា រដ្ឋបាលអាមេរិករបស់លោក ចូ បៃដិន បានសម្រេចដាក់ទណ្ឌកម្មលើអ៊ីរ៉ង់ ទាក់ទងនឹងសកម្មភាពមីស៊ីលរបស់ប្រទេសនេះ។ អាមេរិកបានបញ្ជាក់នៅក្នុងសេចក្តីថ្លែងការណ៍ក្នុងខែមីនានោះថា វិធានការដាក់ទណ្ឌកម្មនេះ ធ្វើឡើងជាការឆ្លើយតបនឹងការវាយប្រហារដោយមីស៊ីលរបស់អ៊ីរ៉ង់ ទៅលើទីក្រុង Arbil ប្រទេសអ៊ីរ៉ាក់ ក៏ដូចជាការវាយប្រហារមីស៊ីលសំណាក់ភ្នាក់ងារអ៊ីរ៉ង់ ប្រឆាំងនឹងអារ៉ាប៊ីសាអូឌីតនិងអេមីរ៉ាតអារ៉ាប់រួម។
សហរដ្ឋអាមេរិក ចាត់ទុកការអភិវឌ្ឍន៍ និងការរីកសាយភាយនៃមីស៊ីលរបស់ប្រទេសអ៊ីរ៉ង់ថាជាកំពុងតែបង្កការគំរាមកំហែងយ៉ាងធ្ងន់ធ្ងរដល់សន្តិសុខក្នុងតំបន់ និងអន្តរជាតិ៕
ដោយ៖កែវ កិរិយា
