សម្ដេចតេជោនាយករដ្ឋមន្រ្តី ជំរុញឱ្យមានការយកចិត្តទុកដាក់បន្ថែមទៀតលើអនាម័យជនបទ
ភ្នំពេញ៖សម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានជំរុញឱ្យមានការយកចិត្តទុកដាក់បន្ថែមទៀតលើបញ្ហាអនាម័យជនបទ។ នេះបើតាមសារលិខិតរបស់ប្រមុខរាជរដ្ឋាភិបាល ដែលថ្លែងក្នុងទិវាជាតិលើកកម្ពស់អនាម័យជនបទលើកទី១៣នៅឆ្នាំនេះ។
ប្រមុខរាជរដ្ឋាភិបាលកម្ពុជាសម្ដេចហ៊ុន សែន បានអំពាវនាវនិងលើកទឹកចិត្តឱ្យគ្រប់ផ្នែកពាក់ព័ន្ធទាំងអស់ បន្តសហការគ្នាក្នុងការជំរុញការងារលើកកម្ពស់ អនាម័យជនបទឱ្យកាន់តែប្រសើរឡើងនិងខ្លាំងក្លាបន្ថែមទៀត។
សម្ដេចតេជោ ហ៊ុន សែន បានថ្លែងថា ៖ «ក្រសួងអភិវឌ្ឍន៍ជនបទ ក៏ដូចជាក្រសួងស្ថាប័នពាក់ព័ន្ធទាំងអស់ ត្រូវបង្កើនការចូលរួមគ្រប់រូបភាព ក្នុងការកៀរគរធនធានបន្ថែមទៀត ដើម្បីបន្តជំរុញការលើកកម្ពស់អនាម័យជនបទ ឈានទៅ សម្រេចអត្រាគ្របដណ្តប់អនាម័យ ៩០% ស្របតាមផែនការសកម្មភាពជាតិជំហានទី២ ស្តីពីការផ្គត់ផ្គង់ទឹក ការសំអាត និងអនាម័យជនបទនៅឆ្នាំ២០២៣»។
សម្ដេចតេជោក៏បានបន្តជំរុញលើកទឹកចិត្ត និងគាំទ្រដល់ខេត្ត ក្រុង ស្រុក ខណ្ឌ ឃុំ សង្កាត់ និងភូមិ ដែលមានអត្រា អនាម័យខ្ពស់ឱ្យសម្រេចបានជាខេត្តបញ្ចប់ការបន្ទោរបង់ពាសវាលពាសកាល។លោកក៏បានអំពាវនាវឱ្យបន្តយកចិត្តទុកដាក់បន្ថែមទៀតទៅលើអត្រាអនាម័យនៅតំបន់ប្រឈម ប្រជាជនក្រីក្រ ជនងាយរងគ្រោះ ជនជាតិដើមភាគតិច ស្ត្រីមេម៉ាយ ដើម្បីឱ្យពួកគាត់ទទួលបានសេវាអនាម័យកាន់តែប្រសើរឡើង និងប្រកបដោយសមធម៌។
សម្ដេចតេជោនាយករដ្ឋមន្រ្តីកម្ពុជាតាមរយៈសារលិខិតអបអរសាទរទិវាជាតិលើកកម្ពស់អនាម័យជនបទលើកទី១៣ នាថ្ងៃទី១៣ ខែវិច្ឆិកា ឆ្នាំ២០២២ បានលើកឡើងថា ៖ «ឆ្នាំ២០២២នេះ គឺជាឆ្នាំទី១៣ ដែលកម្ពុជាយើង បានប្រារព្ធទិវាជាតិលើកកម្ពស់ អនាម័យជនបទ ដែលជាព្រឹត្តិការណ៍ប្រចាំឆ្នាំមួយដ៏សំខាន់ដើម្បីឱ្យយើងទាំងអស់គ្នាត្រូវតែយកចិត្តទុកដាក់បន្ថែមទៀត ដើម្បីបង្កើននិងពនឿនអត្រាគ្របដណ្តប់អនាម័យនៅប្រទេសកម្ពុជាយើងឱ្យមានភាពល្អប្រសើរ»។
សម្ដេចតេជោបានបន្តថា រាជរដ្ឋាភិបាលបានកំណត់ឈានទៅសម្រេចឱ្យបាននូវចក្ខុវិស័យរបស់ខ្លួនដែលបានបញ្ជាក់យ៉ាងច្បាស់ថា៖ «ប្រជាជនគ្រប់រូបនៅសហគមន៍ជនបទ ត្រូវទទួលសេវាផ្គត់ផ្គង់ទឹកស្អាតនិងអនាម័យប្រកបដោយសមធម៌ និងមាននិរន្តរភាពនៅ ឆ្នាំ២០២៥»។
បើតាមសម្ដេចតេជោនាយករដ្ឋមន្រ្តី ខេត្តដែលនឹងសម្រេចបានជាខេត្តបញ្ចប់ការបន្ទោបង់ពាសវាលពាសកាលនាពេលឆាប់ៗខាងមុខទៀតនេះរួមមាន៖ ខេត្តកណ្តាល ខេត្តកំពង់ស្ពឺ ខេត្តកែប និងខេត្តកំពង់ឆ្នាំង ហើយដោយឡែកភូមិចំនួន ៥ ២៩៨, ឃុំ-សង្កាត់ចំនួន ៣៩៣, ក្រុង ស្រុក ខណ្ឌ ចំនួន៣១ ក៏សម្រេចបានជាភូមិ ឃុំ សង្កាត់ និងក្រុង ស្រុក ខណ្ឌបញ្ចប់ការបន្ទោបង់ ពាសវាលពាសកាលផងដែរ។
សម្តេចតេជោ ហ៊ុន សែន បានគូសបញ្ជាក់ថា ៖ « វឌ្ឍនភាពជាវិជ្ជមាននៃស្ថានភាពអនាម័យជនបទ គឺជាមោទនភាពរបស់ជាតិ ដែលធ្លាប់តែមានស្ថានភាពអនាម័យទាប បានក្លាយទៅជាប្រទេសមានបរិស្ថានស្អាតជាបណ្តើរៗផងដែរ»។
យោងតាមក្រសួងអភិវឌ្ឍន៍ជនបទ បានឱ្យដឹងថា រាជរដ្ឋាភិបាលបានធ្វើផែនការកំណត់ទិសដៅនៃការផ្ដល់សេវាទឹកស្អាត និងអនាម័យឱ្យបានសម្រេច ១០០ ភាគរយនៅឆ្នាំ ២០២៥ ដែលផែនការយុទ្ធសាស្ត្រជាតិនោះគឺដើម្បីធ្វើឱ្យសេវាទឹកស្អាត សុខភាព និងអនាម័យនៅជនបទមានភាពប្រសើរឡើង និងលើកកម្ពស់សុខភាព និងអាហារូបត្ថម្ភផងដែរ។យោងតាមក្រសួងអភិវឌ្ឍន៍ជនបទ ក្នុងរយៈពេលត្រីមាសទី ១ ឆ្នាំ ២០២២ អត្រាគ្របដណ្តប់លើការទទួលបានសេវាទឹកស្អាត និងអនាម័យជនបទសម្រេចបានកើនឡើងរហូតដល់ជាង ៨០ភាគរយ។
ទាក់ទងនឹងបញ្ហាទឹកស្អាត និងអនាម័យនេះដែរ អង្គការយូនីសេហ្វប្រចាំកម្ពុជាធ្លាប់បានលើកឡើងថា ប្រទេសកម្ពុជា កំពុងសម្រេចបាននូវវឌ្ឍនភាពជាបណ្តើរៗ ប៉ុន្តែវឌ្ឍនភាពទាំងនេះពុំទាន់គ្រប់គ្រាន់ ដើម្បីបំពេញទៅតាមចំណុចគោលដៅផ្នែកអនាម័យ និងទឹកស្អាតឡើយ។ បើទោះបីជាប្រព័ន្ធទឹកស្អាត និងអនាម័យ និងទម្លាប់ប្រើប្រាស់ទឹកស្អាត និងអនាម័យមានភាពល្អប្រសើរជាងមុនក៏ដោយ ប្រទេសកម្ពុជា គឺជាប្រទេសដែលមានអត្រាបន្ទោរបង់ពាសវាលពាសកាលខ្ពស់ជាងគេនៅក្នុងតំបន់ គឺក្នុងចំណោមពលរដ្ឋកម្ពុជារស់នៅជនបទនៅមានជីវភាពក្រីក្រជាងគេ ១០នាក់ មានប្រមាណ ៨នាក់ទៅហើយ។
អង្គការយូនីសេហ្វ បានបញ្ជាក់ថា ៖ «មានតែការផ្លាស់ប្តូរឥរិយាបថតែប៉ុណ្ណោះទេ ដែលអាចធ្វើឲ្យទម្លាប់អនាម័យ និងទឹកស្អាតនៅជាប់ឋិតថេរជានិរន្តរពិតប្រាកដ។ ការអប់រំផ្សព្វផ្សាយ ដើម្បីឲ្យប្រជាពលរដ្ឋយល់ពីសារៈសំខាន់នៃការប្រើប្រាស់ទម្លាប់អនាម័យ និងទឹកស្អាត និងកាត់បន្ថយគម្លាតរវាងការសាងសង់បង្គន់ និងកន្លែងលាងសម្អាតដៃ និងពេលដែលមានមនុស្សប្រើប្រាស់បរិក្ខារទាំងនេះពិតប្រាកដ»។
បច្ចុប្បន្ននេះកម្ពុជាសម្រេចបាននូវខេត្តចំនួន ២ដែលជាខេត្តបញ្ចប់ការបន្ទោរបង់ពាសវាលពាស កាលដំបូងគេនៅក្នុងប្រទេស គឺខេត្តស្វាយរៀងនិងខេត្តព្រៃវែង ហើយនឹងមានខេត្តជាបន្តបន្ទាប់ទៀតដែលនឹងសម្រេចបានជាខេត្តបញ្ចប់ការបន្ទោរបង់ពាសវាលពាសកាលនាពេលឆាប់ៗខាងមុខផងដែរ។ របាយការណ៍របស់រាជរដ្ឋាភិបាលបង្ហាញថា ត្រឹមឆ្នាំ២០២២នេះ អត្រាគ្របដណ្តប់អនាម័យរបស់សហគមន៍ជនបទនៅកម្ពុជា បានកើនដល់ជាង៨០ភាគរយ ខណៈអត្រានៃខ្នងផ្ទះជនបទ មានកន្លែងលាងសម្អាតដៃបានកើនឡើងដល់៩៦ភាគរយ៕
ដោយ៖នាង សុគន្ធា