បាងកក៖ អគ្គស្នងការនគរបាលជាតិថៃ បាននិយាយនៅថ្ងៃព្រហស្បតិ៍ថា ប្រព័ន្ធដាក់ពិន្ទុថ្មីសម្រាប់អ្នកបើកបរ ដែលមានបំណងលើកកម្ពស់សុវត្ថិភាពចរាចរណ៍ និងកាត់បន្ថយគ្រោះថ្នាក់ចរាចរណ៍ នឹងចូលជាធរមាន ចាប់ពីថ្ងៃទី៩ ខែមករា ២០២៣។

នាយឧត្តមសេនីយ៍ Damrongsak Kittiprapas បានប្រាប់សន្និសីទសារព័ត៌មាន នៅទីស្នាក់ការប៉ូលិសភូមិន្ទថៃថា អ្នកបើកបរយានយន្តម្នាក់ៗដែលមានប័ណ្ណបើកបរ នឹងចាប់ផ្តើមដោយពិន្ទុ ១២ ហើយអ្នកបើកបរនឹងត្រូវពិន័យដោយការដកពិន្ទុ អាស្រ័យលើភាពធ្ងន់ធ្ងរនៃបទល្មើសចរាចរណ៍របស់ពួកគេ។

បើកបរហួសល្បឿនកំណត់ មិនពាក់ខ្សែក្រវ៉ាត់ ជិះម៉ូតូមិនពាក់មួកសុវត្ថិភាព មិនឈប់នៅផ្លូវបំបែកសេះបង្កង់ និងប្រើទូរស័ព្ទពេលបើកបរ ម្នាក់ៗត្រូវខាតបង់មួយពិន្ទុ។ បំពានភ្លើងក្រហម នឹងត្រូវខាតបង់ ពីរពិន្ទុ។ អ្នកបើកបរយានយន្តនឹងត្រូវបានដកចំនួន ៣ ពិន្ទុ សម្រាប់បទល្មើស បុកហើយរត់ ខណៈដែលបើកបរក្នុងពេលស្រវឹង ឬ ស្ថិតក្រោមឥទ្ធិពលនៃគ្រឿងញៀន និងពាក់ពន្ធ័នឹងការប្រណាំងលើផ្លូវខុសច្បាប់ ផ្សេងៗ នឹងត្រូវកាត់៤ពិន្ទុ។

មេប៉ូលិសរូបនេះបាននិយាយដែរថា អ្នកបើកបរដែលមិនបង់ប្រាក់ពិន័យចរាចរណ៍នឹងត្រូវបានកាត់បន្ថយពិន្ទុទៀត។ លោកបន្តថា ការកាត់បន្ថយពិន្ទុនឹងត្រូវអនុវត្តតាមប្រព័ន្ធអេឡិចត្រូនិកតាមប្រព័ន្ធ Police Ticket Management (PTM) ដែលកត់ត្រារាល់បទល្មើសចរាចរណ៍។ «ប្រសិនបើពិន្ទុរបស់អ្នកបើកបរគឺសូន្យ ប័ណ្ណបើកបរនឹងត្រូវផ្អាករយៈពេល ៩០ ថ្ងៃ»។

លោក Damrongsak បាននិយាយថា ពួកគេនឹងត្រូវបានជូនដំណឹងជាលាយលក្ខណ៍អក្សរដោយប៉ូលីស។ លោកបានបន្ថែមថា អ្នកដែលបើកបរក្នុងអំឡុងពេលព្យួរប័ណ្ណបើកបររបស់ពួកគេប្រឈមនឹងការផ្ដន្ទាទោសដាក់ពន្ធនាគារអតិបរមា ៣ ខែ និង/ឬពិន័យជាប្រាក់រហូតដល់ ១០.០០០បាត។

ពិន្ទុដែលបានដកនឹងត្រូវបានស្ដារឡើងវិញមួយឆ្នាំ បន្ទាប់ពីបទល្មើសត្រូវបានប្រព្រឹត្ត លើកលែងតែក្នុងករណីដែលពិន្ទុទាំង១២ ត្រូវបានដកចេញ។ អ្នកដែលមានពិន្ទុសូន្យ គឺតម្រូវឱ្យឆ្លងកាត់ ការបណ្តុះបណ្តាលពីនាយកដ្ឋានដឹកជញ្ជូនផ្លូវគោក ដើម្បីទទួលបានពិន្ទុទាំង ១២ ឡើងវិញ៕ ប្រភពពី The Nation , ដោយ៖ សារ៉ាត