សណ្តាន់គេអាចប្រើបានទាំងបរិភោគ និងឱសថព្យាបាលរោគជំងឺ
ភ្នំពេញ៖ សណ្តាន់ (False mangosteen) គឺជារុក្ខជាតិគេអាចប្រើទាំង ស្លឹក ដើមមកធ្វើជាឱសថព្យាបាលរោគជំងឺ និងពិសេសផ្លែរបស់វាមកប្រើធ្វើជាគ្រឿងម្ជូរឆ្ងាញ់ពិសារទៀតផង។
បើតាមទំព័រហ្វេសប៊ុករបស់ក្រសួងបរិស្ថានបានឱ្យដឹងថា៖ ដើមសណ្តាន់មានកម្ពស់១០-១៥ម សម្បកក្រៅពណ៌ខ្មៅ ខាងក្នុងជ័រពណ៌លឿង។ មែករាងជ្រុងនៅពេលខ្ចី រាងមូលពេលចាស់។ ស្លឹកឈម រាងពងក្រពើក្រាស់ មានប្រវែង ៨-១៥ ស.ម ទទឹង ៣-៥ស.ម។
ផ្កាទ្វេភេទ ឬមានភេទតែមួយ (ផ្កាញី ឬផ្កាឈ្មោល) លើដើមខុសគ្នា ចេញនៅតាមប្រគាបស្លឹក ឬនៅចុងមែក ផ្ការាយឬកញ្ចុំមាន១-៥។ ត្របកផ្កា៤ ស្រទាប់ផ្កា៤-៥ ក្រាស់រឹងពណ៌ទឹកក្រូចលាយស្វាយ ឬស និងក្រហមនៅផ្ទៃក្នុង។ ផ្លែរាងមូលទ្រវែងដូចស៊ុត។ ស្លឹកមានរសជាតិជូរ ចត់ បន្តរពូជដោយគ្រាប់ ដុះក្នុងព្រៃរនាម ឬព្រៃក្រាស់លើដីទំនាប។
ចំពោះការប្រើប្រាស់បានជាគ្រឿងទេស និងឱសថ៖
គ្រឿងទេស ស្លឹកបុកសម្រាប់សម្លរគ្រឿង។ ផ្លែស្រស់ប្រើជាម្ជូរ សម្រាប់ប្រហុកឆៅចិញ្រ្ចាំ។ ឱសថ ស្លឹក និងផ្លែ ស្ងោរត្រាំព្យាបាលកើតពិស និងរោគលឿង៕ដោយ៖ម៉ាដេប៉ូ
