ភ្នំពេញ៖ លោកវរៈសេនីយ៍ឯក ហ៊ាង ថារ៉េត អធិការនគរបាលខណ្ឌឬស្សីកែវ បានប្រាប់អ្នកយកព័ត៌មានឲ្យដឹងថា កម្លាំងនគរបាលខណ្ឌ បានបង្ក្រាបករណីលួចរថយន្តម៉ាកសាំយ៉ុង ឃាត់ខ្លួនជនសង្ស័យម្នាក់ រួមនឹងវត្ថុតាង នៅថ្ងៃទី០៤ ខែ មករា ឆ្នាំ ២០២៣ វេលាម៉ោង ១៤ និង ៣០នាទី ត្រង់ចំណុចមុខផ្ទះលាងម៉ូតូ ផ្លូវជាតិលេខ៥ ក្រុមទី៥ ភូមិ លូ សង្កាត់ស្វាយប៉ាក ខណ្ឌឫស្សីកែវ ។

សមត្ថកិច្ចបានឲ្យដឹងថា ជនរងគ្រោះឈ្មោះ លាង សុខា ភេទប្រុស អាយុ៣៥ឆ្នាំ ជនជាតិខ្មែរ មានទីលំនៅ កន្លែងកើតហេតុ មុខរបរលក់ដូរ។ ចំណែកជនសង្ស័យ ឈ្មោះ មឿន ចំរើន ភេទប្រុស អាយុ ៣៩ឆ្នាំ ជនជាតិខ្មែរ ទីលំនៅនិង មុខរបរមិនពិតប្រាកដ(មានសារធាតុញៀន) ឃាត់ខ្លួន។ សម្ភារដកហូតរួមមាន៖ រថយន្ត ០១គ្រឿង ម៉ាកសាំយ៉ុងពណ៌ ស ពាក់ស្លាកលេខភ្នំពេញ ២BN៩៧៩៤ (ជារបស់ជនរងគ្រោះ) និងបានប្រគល់ជូនជនរងគ្រោះវិញ។

សមត្ថកិច្ចបានបន្តថា មុនពេលកើតហេតុ នៅ វេលាម៉ោងកើតហេតុខាងលើ ជនរងគ្រោះមកលេងផ្ទះ ឪពុក ម្តាយ ដោយមិនដកសោរចេញពីរថយន្ត កំពុងតែអង្គុយលេង ស្រាប់តែជនសង្ស័យ មកធ្វើសកម្មភាពលួចយករថយន្តតែម្តង ហើយបានស្រែកផ្អើលឆោឡោដេញតាម ដោយមានការអន្តរាគមន៍ពីសមត្ថកិច្ចប៉ុស្តិ៍ និងអ្នកជិតខាង ក៏ឃាត់ខ្លួនបានភ្លាមៗ។

បច្ចុប្បន្ន កំលាំងជំនាញខណ្ឌ និងប៉ុស្តិ៍ បានកសាងសំណុំរឿង បញ្ជូនជនសង្ស័យទៅសាលាដំបូងរាជធានីភ្នំពេញ ដើម្បីអនុវត្តតាមនីតិវិធី ៕ ដោយ ស៊ូ ប៊ុនធី