សេអ៊ូល ៖ ស្ថានទូតចិននៅទីក្រុងសេអ៊ូលប្រកាសថា ខ្លួនបានផ្អាកការចេញទិដ្ឋាការរយៈពេលខ្លី សម្រាប់ប្រជាជនកូរ៉េខាងត្បូង ដែលធ្វើដំណើរទៅកាន់ប្រទេសចិន។

ស្ថានទូតចិនបានបញ្ជាក់នៅថ្ងៃអង្គារសប្តាហ៍នេះថា ចំណាត់ការនេះ គឺជាការសងសឹកចំពោះការសម្រេចចិត្តរបស់កូរ៉េខាងត្បូង ក្នុងការដាក់កំហិតលើការចូលរបស់ប្រជាជនដែលមកពីប្រទេសចិន។ រដ្ឋាភិបាលកូរ៉េខាងត្បូងកំណត់កាតព្វកិច្ចធ្វើតេស្ត PCR រកជំងឹកូវីដ១៩សម្រាប់អ្នកដំណើរ មុន និងក្រោយពេលមកដល់ពីប្រទេសចិន រហូតដល់ចុងខែកុម្ភៈខាងមុខ។

គោលនយោបាយនេះ គឺដោយសារតែករណីឆ្លងជំងឺកូវីដ១៩របស់ប្រទេសចិនកើនឡើងខ្លាំង។ បន្ថែមលើនេះ កូរ៉េខាងត្បូងក៏កំពុងកំណត់ការចេញទិដ្ឋាការរយៈពេលខ្លីរបស់ខ្លួនរហូតដល់ចុងខែមករានេះផងដែរ។ ជាការឆ្លើយតប ក្រសួងការបរទេសចិនបានលើកឡើងថា ខ្លួននឹងចាត់វិធានការប្រឆាំងនឹងការរឹតបន្តឹងការចូលប្រទេសដ៏តឹងរ៉ឹងហួសហេតុដោយប្រទេសដទៃទៀត៕