ក្រុមហ៊ុនផលិតរថយន្តធំជាងគេរបស់ប្រទេសអាល្លឺម៉ង់ បានប្រកាសនៅថ្ងៃព្រហស្បតិ៍សប្តាហ៍នេះថា ដោយសារតែបញ្ហាស្ទះការផ្គត់ផ្គង់ និងការបញ្ឈប់ផលិតកម្មបណ្តោះអាសន្ន ធ្វើឱ្យការចែកចាយលក់របស់ក្រុមហ៊ុន Volkswagen Group ក្នុងឆ្នាំ២០២២ បានធ្លាក់ចុះរហូតដល់ ៧ភាគរយពីមួយឆ្នាំទៅមួយឆ្នាំមកនៅត្រឹមចំនួន ៨.២៦លានគ្រឿងនៅទូទាំងពិភពលោក។

ទោះបីជាយ៉ាងណាក៏ដោយ កាលពីចុងឆ្នាំមុន អាជីវកម្មមានស្ថេរភាពម្តងទៀត នៅពេលដែលក្រុមហ៊ុន Volkswagen បានកើនឡើងការលក់ទូទាំងពិភពលោកនៅក្នុងខែធ្នូចំនួន ១៨.១ភាគរយ។

សមាគមឧស្សាហកម្មរថយន្តអាល្លឺម៉ង់ (VDA) បាននិយាយកាលពីសប្តាហ៍មុនថា កង្វះផលិតផលកម្រិតមធ្យម តម្លៃថាមពល និងវត្ថុធាតុដើមខ្ពស់ រួមទាំងភាពមិនច្បាស់លាស់ដោយសារជម្លោះរុស្ស៊ី-អ៊ុយក្រែន គឺជាមូលហេតុធ្វើឱ្យទីផ្សារ និងផលិតកម្មរថយន្តធ្លាក់ចុះយ៉ាងខ្លាំងកាលពីឆ្នាំមុន។

សូមបញ្ជាក់ថា ប្រទេសចិន គឺជាអ្នករួមចំណែកដ៏ធំបំផុតចំពោះការកើនឡើងការលក់រថយន្តអគ្គិសនីជាសកលរបស់ក្រុមហ៊ុន Volkswagen ខណៈដែលការចែកចាយបានកើនឡើង ៦៨ភាគរយ ដល់ចំនួន ១៥៥,៧០០គ្រឿង។

ចំណែកនៅក្នុងឆ្នាំ២០២៣នេះ ក្រុមហ៊ុន Volkswagen មានគោលបំណងបង្កើនចំណែកទីផ្សារនៃប្រភេទរថយន្តអគ្គិសនី BEVs របស់ខ្លួន ដល់ប្រហែល ១១ភាគរយ ហើយនៅឆ្នាំ២០៣០ រាល់យានយន្តដែលចែកចាយដោយក្រុមហ៊ុននេះនៅទូទាំងពិភពលោក គឺជារថយន្តអគ្គិសនីទាំងអស់៕ ប្រភព៖ ស៊ីនហួរ ប្រែសម្រួលដោយ៖ ទីណា