ព្យុងយ៉ាង៖ ទីភ្នាក់ងារសារព័ត៌មាន NK News ដែលមានមូលដ្ឋាននៅទីក្រុងសេអ៊ូល បានរាយការណ៍នាថ្ងៃពុធទី២៥ ខែមករានេះ ដោយលើកឡើងពីសេចក្តីជូនដំណឹងរបស់រដ្ឋាភិបាលថា អាជ្ញាធរនៅក្នុងរដ្ឋធានីព្យុងយ៉ាងរបស់កូរ៉េខាងជើងបានបញ្ជាឱ្យបិទរយៈពេលប្រាំថ្ងៃ ដោយសារតែការកើនឡើងករណីនៃជំងឺផ្លូវដង្ហើម ដែលមិនបានបញ្ជាក់ថា ជាជំងឺអ្វី។

សេចក្តីជូនដំណឹងនេះមិនបាននិយាយអំពី COVID-19 ទេ ប៉ុន្តែបាននិយាយថា អ្នករស់នៅក្នុងទីក្រុងតម្រូវឱ្យស្នាក់នៅផ្ទះរបស់ពួកគេរហូតដល់ចុងថ្ងៃអាទិត្យ ហើយត្រូវដាក់ឱ្យពិនិត្យសីតុណ្ហភាពច្រើនដង ក្នុងមួយថ្ងៃ នេះបើយោងតាម NK News ដែលតាមដានប្រទេសកូរ៉េខាងជើង។

កាលពីថ្ងៃអង្គារ គេហទំព័រនេះបានរាយការណ៍ថា អ្នកស្រុកក្រុងព្យុងយ៉ាងហាក់ដូចជាកំពុងស្តុកទុកទំនិញក្នុងការប្រមើលមើលវិធានការតឹងរ៉ឹង។ ប៉ុន្តែប្រភពមិនច្បាស់ទេថា តើតំបន់ផ្សេងទៀតនៃប្រទេសនេះបានដាក់ការចាក់សោរថ្មី ឬយ៉ាងណា។
កូរ៉េខាងជើងមិនដែរបានបញ្ជាក់ថា មានមនុស្សប៉ុន្មាននាក់ ដែលបានឆ្លង COVID-19 នោះទេ ជាក់ស្តែងដោយសារតែប្រទេសនេះខ្វះមធ្យោបាយធ្វើតេស្ដយ៉ាងទូលំទូលាយ។

ផ្ទុយទៅវិញ គេគ្រាន់តែរាយការណ៍ពីចំនួនប្រចាំថ្ងៃនៃអ្នកជំងឺដែលមានគ្រុនក្តៅ ដែលជាចំនួនកើនឡើងដល់ប្រហែល ៤.៧៧ លាននាក់ ក្នុងចំណោមប្រជាជនប្រហែល ២៥ លាននាក់។ ប៉ុន្តែមិនបានរាយការណ៍ពីករណីបែបនេះទេ ចាប់តាំងពីថ្ងៃទី ២៩ ខែកក្កដា៕ ប្រភពពី CAN ប្រែសម្រួលដោយ៖ សារ៉ាត