ភ្នំពេញ ៖ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានទទួលជួបសំណេះសំណាល និងសម្តែងការគួរសម ជាមួយឯកឧត្តម Jyri Järvaiaho ឯកអគ្គរដ្ឋទូតហ្វាំងឡង់ នៅទីស្នាក់ការកណ្តាល កាកបាទក្រហមកម្ពុជា នាល្ងាចថ្ងៃទី ១៦ ខែកុម្ភៈ ឆ្នាំ២០២៣ ។

ក្នុងឱកាសនោះ លោកជំទាវអគ្គលេខាធិការ បាននាំប្រសាស៍ផ្តាំផ្ញើសួរសុខទុក្ខ ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ចំពោះ ឯកឧត្តមឯកអគ្គរដ្ឋទូតហ្វាំងឡង់ ដែលបានអញ្ជើញមកទស្សនកិច្ចនៅកម្ពុជា ជាពិសេស បានឆ្លៀតឱកាស មកដល់ទីស្នាក់ការកណ្តាលកាកបាទក្រហមកម្ពុជានាពេលនេះ។

លោកជំទាវអគ្គលេខាធិការ បានបន្តថា ៖ “កាកបាទក្រហមកម្ពុជា មានកិច្ចសហប្រតិបត្តិការល្អជាមួយកាកបាទក្រហមហ្វាំងឡង់តាំងពីទស្សវត្ត៩០ ដែលមានឧបត្ថម្ភគាំទ្រក្នុងកម្មវិធីជាច្រើន ហើយនៅឆ្នាំ២០២២នេះ កាកបាទក្រហមហ្វាំងឡង់ បានជ្រើសរើសកាកបាទក្រហមកម្ពុជា ក្នុងចំណោមកាកបាទក្រហមតំបន់អាស៊ីអាគ្នេយ៍ ដែលមានរយៈពេល៣ឆ្នាំ កម្មវិធីលើកកម្ពស់សកម្មភាពមនុស្សធម៌ និងសុខភាពក្នុងមូលដ្ឋាន ដែលឧបត្ថម្ភដោយ DG-ECHO តាមរយៈសហព័ន្ធអន្តរជាតិ (IFRC)”។

ឯកឧត្តម ឯកអគ្គរដ្ឋទូតហ្វាំងឡង់ បានថ្លែងអំណរគុណ និងកោតសរសើរ ចំពោះកាកបាទក្រហមកម្ពុជា ជាដែលសមាគមជាតិមួយឈាមុខគេ ក្នុងវិស័យមនុស្សធម៌ និងមានកេរ្តិ៍ឈ្មោះនៅឆាកអន្តរជាតិ ។

ឯកឧត្តម ឯកអគ្គរដ្ឋទូតហ្វាំងឡង់ បានមានប្រសាសន៍ថា “ខ្ញុំនឹងមកកម្ពុជាម្តងទៀតនាពេលអនាគត ដើម្បីជួយជំរុញការងារ (កម្មវិធីលើកកម្ពស់សកម្មភាពមនុស្សធម៌ និងសុខភាពក្នុងមូលដ្ឋាន) ផ្តល់បទពិសោធន៍ ឲ្យមានប្រសិទ្ធភាព”៕ ដោយ / គ្រី សម្បត្តិ