ប្រមុខការទូតកម្ពុជា ៖ ការទូតបែបឌីជីថល គឺជាមធ្យោបាយដ៏សំខាន់មួយនៃការអនុវត្តនយោបាយការបរទេស របស់ក្រសួងការបរទេសក៏ដូចជារបស់ស្ថានតំណាងកម្ពុជា

ភ្នំពេញៈ ប្រុខការទូតកម្ពុជា ឯកឧត្តមឧបនាយករដ្ឋមន្ត្រី ប្រាក់ សុខុន បានបញ្ជាក់ថា ការទូតបែបឌីជីថល គឺជា​មធ្យោបាយ​ដ៏សំខាន់មួយ នៃការអនុវត្តនយោបាយការបរទេស របស់ក្រសួងការបរទេស និងសហប្រតិបត្តិការអន្តរជាតិ ក៏ដូចជារបស់ស្ថានតំណាងកម្ពុជា។ ការទូតបែបឌីជីថលនេះ តែងត្រូវបានគេអនុវត្ត ដោយប្រើប្រាស់ប្រព័ន្ធបច្ចេកវិទ្យាថ្មីៗ រួមមាន៖ គេហទំព័រ និងប្រព័ន្ធបណ្តាញសង្គមនានា ជាឧបករណ៍ក្នុងការផ្សព្វផ្សាយពីសកម្មភាពរបស់រាជរដ្ឋាភិបាល និងប្រយុទ្ធប្រឆាំងនឹងព័ត៌មានក្លែងក្លាយ។ ការបញ្ជាក់នេះ ក្នុងពិធីបើកសិក្ខាសាលាស្តីពី “ការពង្រឹងសមត្ថភាព​ជំនាញឌីជីថលសម្រាប់មន្រ្តីការទូតកម្ពុជា”នៅព្រឹកថ្ងៃទី២៨ ខែកុម្ភៈ ឆ្នាំ២០២៣ ។

ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស

ឯកឧត្តមបានបន្តថា តាមការអនុវត្តកន្លងមកនេះ ស្ថានតំណាងកម្ពុជានៅបរទេសសុទ្ធសឹងតែមានគេហទំព័រ និង​បណ្តាញសង្គម ( ឧទាហរណ៍៖Facebook និង Telegram ជាដើម) រៀងៗខ្លួន ដើម្បីចែករំលែក ព័ត៌មាន សកម្មភាព និង​ទំនាក់ទំនងជាមួយសាធារណៈជន។ ហេតុនេះ ការពង្រឹងសមត្ថភាពជំនាញឌីជីថលនឹងចូលរួមចំណែក​ពង្រីក​វិសាលភាព នៃកិច្ចខិតខំប្រឹងប្រែងរបស់ស្ថានតំណាងជូនសាធារណជន បានយល់ដឹង និងជួយលើកតម្កើនកិត្យានុភាព​ជាតិលើ​ឆាកអន្តរជាតិ។

ឯកឧត្តមរដ្ឋមន្ត្រីការបរទេសកម្ពុជា បានថ្លែងថា បដិវត្តន៍ឧស្សាហកម្មទី៤ កំពុងបង្ហាញ​ពីការរីកចម្រើននៃបច្ចេកវិទ្យា​នៅក្នុងពិភពលោក ដែលជះឥទ្ធិពលយ៉ាងខ្លាំងលើការកំណត់ទ្បើងវិញនូវផែនផលិតកម្ម ទំនាក់ទំនងផលិតកម្ម ឥរិយាបថ​ការប្រើប្រាស់ និងរចនាសម្ព័ន្ធសេដ្ឋកិច្ច ដូចជាការប្រើប្រាស់បច្ចេកវិទ្យាបញ្ញាសិប្បនិមិត្ត(AI) ការប្រើប្រាស់មនុស្ស​យន្ត​​​(Robot), ការបោះពុម្ព 3D, ការប្រើប្រាស់ ជីវបច្ចេកវិទ្យា (Biotech)។ល។ ការរីកចម្រើន និងការវិវត្តយ៉ាងឆាប់រហ័ស​របស់បច្ចេកវិទ្យាព័ត៌មានវិទ្យា បានធ្វើឱ្យជីវិតប្រចាំថ្ងៃរបស់ប្រជាជនទូទាំងសកលលោកមានការផ្លាស់ប្ដូរយ៉ាងគំហុក ទាំងក្នុងវិស័យ ផលិតកម្ម អប់រំ សុខាភិបាល ទីផ្សារការងារ ពាណិជ្ជកម្ម ធុរកិច្ច និងរដ្ឋបាលសាធារណៈ និងបច្ចេកវិទ្យា ជាដើម។ ទម្លាប់ចាស់ៗរបស់មនុស្សជាតិក៏ត្រូវបានកែប្រែ រាប់ចាប់ពីវិធីសាស្ត្រនៃការប្រាស្រ័យទាក់ទងគ្នា ការទទួលយក​ព័ត៌មាន និងរបៀបរបបធ្វើការប្រចាំថ្ងៃ។

ឯកឧត្តមរដ្ឋមន្ត្រីបានបន្តថា មិនតែប៉ុណ្ណោះ បច្ចេកវិទ្យា ឬប្រព័ន្ធឌីជីថលត្រូវបានប្រទេសជាច្រើនលើ សកលលោក ប្រើប្រាស់យ៉ាងទូលំទូលាយ ដើម្បីទាញយកផលប្រយោជន៍​​ផ្នែកនយោបាយ សេដ្ឋកិច្ច សង្គម ព្រមទាំងក្នុងវិស័យ​ការទូត​ផងដែរ។ បច្ចុប្បន្ននេះ អ្នកនយោបាយ និងអ្នកការទូតក៏បានប្រើប្រាស់ប្រព័ន្ធអ៊ីនធឺណិត និងបណ្តាញសង្គមនានា ដើម្បី​ចែករំលែកព័ត៌មាន និងប្រាស្រ័យទាក់ទងជាមួយសាធារណជន ក្នុងគោលបំណងផ្សព្វផ្សាយ និងពង្រឹងកិត្យានុភាព​ជាតិ​លើឆាកអន្តរជាតិ ដែលវិធីសាស្ត្រនេះត្រូវបានគេស្គាល់ថាជា “ការទូតបែបឌីជីថល”។

ឯកឧត្តមរដ្ឋមន្ត្រីបានបន្តទៀតថា ប្រទេសដែលទទួលបានជោគជ័យក្នុងការអនុវត្តការទូតបែបឌីជីថលនេះ តែងតែ​ប្រមូលផ្ដុំបាននូវអំណាចទន់ ឬ Soft Power ដែលជាគន្លឹះមួយដ៏សំខាន់ ក្នុងការទាញយកផលប្រយោជន៍ជូនជាតិ និង​ប្រជាជនរបស់គេ។ ហេតុនេះហើយ ទើបបច្ចេកវិទ្យាបានក្លាយជាសមរភូមិមួយ ក្នុងជម្លោះភូមិសាស្ត្រនយោបាយ​រវាង​ប្រទេសមហាអំណាច ជាពិសេសសហរដ្ឋអាមេរិក និងចិន ដើម្បីក្លាយជាអ្នកនាំមុខក្នុងបច្ចេកវិទ្យាស្នូលដូចជា ប្រព័ន្ធ5G, បញ្ញាសិប្បនិម្មិត (AI) និងការផលិត semiconductors។ ជាលទ្ធផល ទីក្រុងវ៉ាស៊ីនតោនបានចាប់ផ្តើមរារាំងការនាំចេញ semiconductor ទៅកាន់ប្រទេសចិន ដែលជាបច្ចេកវិទ្យាស្នូលគ្រប់គ្រងដោយសហរដ្ឋ​អាមេរិក រីឯទីក្រុងប៉េកាំងក៏បានដាក់​ចេញគោលនយោបាយវាយបក តាមរយៈការកាត់ផ្តាច់អាមេរិក ចេញពីខ្សែច្រវ៉ាក់ផ្គត់ផ្គង់របស់ខ្លួន ដោយកំណត់ការនាំ​ចេញ​វត្ថុធាតុកម្រសំខាន់ៗ ក្នុងការផលិតគ្រឿងបច្ចេកវិទ្យារបស់សហរដ្ឋអាមេរិក។

ឯកឧត្តមបានបន្តថា យុគសម័យឌីជីថលនេះស្តែងបញ្ជាក់ថា បច្ចេកវិទ្យាបានក្លាយជាក្បាលម៉ាស៊ីន នៃកំណើនសេដ្ឋកិច្ច។ ការចាប់យកបច្ចេកវិទ្យា​នៅពេលនេះ នឹងអនុញ្ញាត​ឱ្យយើងអាចប្រើប្រាស់វាជាឧបករណ៍មួយ​សម្រាប់ការទាញ​យក​កំណើន​សេដ្ឋកិច្ច តាមរយៈការ​ជ្រៀតចូលទីផ្សារថ្មី ក្នុងពាណិជ្ជកម្មអេឡិចត្រូនិក និងការស្តារកិត្យានុភាពជាតិ តាមប្រព័ន្ធ​អ៊ីនធឺណិត​។ ជាក់ស្ដែងប្រទេសជិតខាងយើងដូចជាប្រទេសថៃ សិង្ហបុរី និង​វៀតណាម បានប្រើប្រាស់បណ្ដាញសង្គម​ប្រកបដោយប្រសិទ្ធភាពខ្ពស់ ដើម្បីទាក់ទាញ​វិនិយោគគិន ដោយប្រើប្រាស់ប្រព័ន្ធបច្ចេកវិទ្យាក្នុងការផ្តល់ព័ត៌មាន និងការប្រឹក្សាយោបល់ជូនវិនិយោគិន ការចុះបញ្ជីគម្រោងវិនិយោគ ក៏ដូចជាផ្សព្វផ្សាយពីសក្តានុពល ពិសេស​លើវិស័យអេឡិចត្រូនិកទេសចរណ៍ វប្បធម៌ និងម្ហូបអាហារ។

ឯកឧត្តមបានសង្កត់ធ្ងន់ថា ស្របតាមនិន្នាការពិភពលោក រាជរដ្ឋាភិបាលកម្ពុជាបាននឹងកំពុងជំរុញ និងពន្លឿន​ការ​ប្រើប្រាស់បច្ចេកវិទ្យាឌីជីថល ជាគំនាស់សម្រាប់អភិវឌ្ឍ ធានាអភិបាលកិច្ចល្អ និងបម្រើសេវាសាធារណៈឱ្យកាន់​តែល្អប្រសើរ។ កំណែទម្រង់នេះមិនត្រឹមតែជំរុញការអភិវឌ្ឍ និងការពង្រឹងសមត្ថភាពរបស់កម្ពុជាប៉ុណ្ណោះទេ ប៉ុន្តែក៏ឆ្លើយតបនឹងបរិបទ​នៃការអភិវឌ្ឍនៅក្នុងពិភពលោក ដែលបើកឱកាសដល់ការលើកកម្ពស់ផលិតភាពសេដ្ឋកិច្ច ការធ្វើពិពិធកម្មសេដ្ឋកិច្ច ពង្រឹងភាពប្រកួតប្រជែង និងការធ្វើសមាហរណកម្មទៅកាន់ទីផ្សារក្នុងតំបន់ និងអន្តរជាតិ។ កាលពីឆ្នាំ២០២២នេះ សម្តេចអគ្គមហាសេនាបតីតេជោ ហ៊ុន សែន បានដាក់ចេញនូវគោលនយោបាយរាជរដ្ឋាភិបាល​ឌីជីថលកម្ពុជា ២០២២-២០៣៥ ដែលមានចក្ខុវិស័យកសាងរដ្ឋាភិបាលឌីជីថល ដើម្បីលើកកម្ពស់គុណភាពជីវិត និងទំនុកចិត្តប្រជាពលរដ្ឋ តាមរយៈការបម្រើសេវាសាធារណៈឱ្យកាន់តែល្អប្រសើរ។ គោលនយោបាយនេះមានគោលដៅ ១). អភិវឌ្ឍហេដ្ឋារចនាសម្ព័ន្ធ​រដ្ឋាភិបាលឌីជីថល ២).កសាងអភិបាលកិច្ចនិងសេវាសាធារណៈឌីជីថល ៣) កសាងសមត្ថភាពនិងនវានុវត្តន៍ឌីជីថល និង ៤). លើកកម្ពស់កិច្ចសហការនិងភាពជាដៃគូរវាងរដ្ឋនិងឯកជន ដែលនឹងឆ្លើយតបទៅនឹងបញ្ហាប្រឈមផ្សេងៗ របស់រាជ​រដ្ឋាភិបាលដូចជា៖ ភាពមានកម្រិតនៃការចែករំលែកព័ត៌មាន និងទិន្នន័យរវាងក្រសួងស្ថាប័ន គម្លាតនៃគោលនយោបាយ និងការអនុវត្តគោលនយោបាយ និងយន្តការតាមដាន និងវាយតម្លៃជាដើម៕ដោយ៖ពលជ័យ

ទាវ សារៈមុនិន្ទ
ទាវ សារៈមុនិន្ទ
ជាការីនិពន្ធគេហទំព័រ ដែលទទួលខុសត្រូវលើការផ្សាយអត្ថបទ ខ្លឹមសាររូបភាព កែសម្រួលទម្រង់អត្ថបទ កែអក្ខរាវិរុទ្ធលើគេហទំព័រអប្សរាសង់ត្រាល់ ផ្នែក Politico360 ។ លោកក៏មាននាទីជាអ្នកអង្កេត និងតាមដានអំពីព័ត៌មានជាតិ និងអន្តរជាតិ ដែលចុះផ្សាយទាក់ទងនឹងនយោបាយកម្ពុជាផងដែរ៕
ads banner
ads banner
ads banner