ភ្នំពេញ៖អង្គការសុខភាពពិភពលោក (WHO) បានផ្តល់ឱសថ ឈ្មោះ Tamiflu (oseltamivir Capsules) សម្រាប់ព្យាបាល និងបង្ការជំងឺផ្តាសាយបក្សី ដល់ក្រសួងសុខាភិបាលកម្ពុជា ចំនួន ៣ ០០០ ដូសតាមរយៈនាយកដ្ឋានប្រយុទ្ធនឹងជំងឺឆ្លង (CDC)នៃក្រសួង សុខាភិបាល។

យោងតាមនាយកដ្ឋានប្រយុទ្ធនឹងជំងឺឆ្លង (CDC) នៅថ្ងៃទី២៨ ខែកុម្ភៈ បានឱ្យដឹងថា ក្រសួងសុខាភិបាលតំណាងដោយនាយក ដ្នានប្រយុទ្ធនិងជំងឺឆ្លងបានទទួលឱសថឈ្មោះ Tamiflu សម្រាប់ ព្យាបាលនិងបង្ការជំងឺផ្តាសាយបក្សី ចំនួនបីពាន់ដូស។
នាយកដ្ឋាន ប្រយុទ្ធនឹងជំងឺឆ្លងបានបញ្ជាក់ថា ៖ «ឱសថនេះ ទទួលបានជំនួយពីអង្គការសុខភាពពិភពលោក នឹងប្រើសម្រាប់ ឆ្លើយតបការរាតត្បាតផ្តាសាយបក្សី H5N1 នៅខេត្តព្រៃវែង និងខេត្តដទៃទៀតក្នុងព្រះរាជាណាចក្រកម្ពុជា ដែលអាចកើតមាន រាតត្បាតជាយថាហេតុ»។
ប្រភពដដែលបានឱ្យដឹងដែរថា រហូតដល់ពេលនេះ នៅក្នុងប្រទេស កម្ពុជាមានជំងឺផ្តាសាយចំនួនពីរករណីប៉ុណ្ណោះ ដែលករណីទី១ ជាកុមារីអាយុ១១ឆ្នាំបានស្លាប់ និងករណីទី២ ជាឪពុកកុមារី ដែលបានជាសះស្បើយ និងចេញពីមន្ទីរពេទ្យ នៅថ្ងៃទី២៨ ខែកុម្ភៈនេះដែរ។
នាយកដ្ឋានប្រយុទ្ធនឹងជំងឺឆ្លង បានបញ្ជាក់ថា ៖ «តាមលទ្ធផល អង្កេតស្រាវជ្រាវ រកឃើញថា ពួកគេទាំងពីរនាក់ឆ្លងមកពីសត្វបក្ សីក្នុងភូមិ។ មិនមានការរកឃើញឆ្លងពីឪពុកនិងកូនទេ»។
លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល បានឱ្យដឹងថា បុរសដែលជាឪពុករបស់កុមារីដែលបានផ្ដាសាយបក្សី H5N1 ត្រូវបានក្រុមគ្រូពេទ្យអនុញ្ញាតឱ្យចាកចេញពីមន្ទីរពេទ្យ បន្ទាប់ពីលទ្ធផលតេស្ដ វិជ្ជមាន ជាលើកទី៣ ។ ប៉ុន្តែទោះជាយ៉ាង ណាក៏គ្រូពេទ្យតម្រូវឱ្យបន្ដនៅដាច់ដោយឡែកពីសមាជិកគ្រួសាររយៈពេល ២ ទៅ៣ថ្ងៃទៀតដែរ។
អ្នកនាំពាក្យក្រសួងសុខាភិបាល លោកជំទាវ ឱ វណ្ណឌីន កាលពីថ្ងៃ ទី២៧ ខែកុម្ភៈបានអំពាវនាវដល់ប្រជាពលរដ្ឋទាំងអស់ ត្រូវប្រុង ប្រយ័ត្ន ខ្ពស់ចំពោះជំងឺផ្តាសាយបក្សី H5N1 ដែលអត្រាមរណភាព របស់បុគ្គលដែលបានឆ្លងជំងឺនេះពីបសុបក្សី គឺខ្ពស់ជាងការឆ្លង មេរោគកូវីដ១៩។

សូមរំឮកផងដែរថា កាលពីថ្ងៃទី២២ ខែកុម្ភៈកន្លងទៅនេះ ក្រសួងបានរកឃើញមានករណីឆ្លងជំងឺផ្តាសាយបក្សីH5N1 នៅក្នុងខេត្តព្រៃវែង ដែលបានបណ្តាលឱ្យកុមារីអាយុ១១ឆ្នាំ ៦ខែម្នាក់បានបាត់បង់ជីវិត ហើយជំងឺនេះបានឆ្លងទៅដល់ឪពុករ បស់ ក្មេងស្រីនេះ។ ឪពុកក្មេងនេះត្រូវបានដាក់ឱ្យសម្រាកព្យាបាល និងបានធ្វើតេស្តអវិជ្ជមានកាលពីថ្ងៃទី២៧ ខែកុម្ភៈ ប៉ុន្តែគាត់ត្រូវ ស្ថិនៅតក្នុងមន្ទីរពេទ្យដើម្បីបញ្ចប់វគ្គព្យាបាលតាមការប្រើប្រាស់ថ្នាំ។
យោងតាមសេចក្តីប្រកាសព័ត៌មានរបស់ក្រសួងសុខាភិបាល កាលពី ថ្ងៃទី២៤ ខែកុម្ភៈ បានឱ្យដឹងថា កម្ពុជាបានរកឃើញ២ករណីនៃជំងឺ ផ្តាសាយ បក្សីH5N1 ក្នុងខែកុម្ភៈ បន្ទាប់ពីមិនបានរកឃើញវីរុសនេះ លើខ្លួនមនុស្សអស់រយៈពេល៩ឆ្នាំកន្លងមកហើយ ដែលករណីចុង ក្រោយនេះជាករណីលើកទី៥៨ ដែលក្នុងនោះមាន៤៥ករណីកើត លើកុមារអាយុក្រោម១៤ឆ្នាំ និង៣១ករណីក្នុងចំណោមករណី ទាំង៥៨ ជានារី៕
ដោយ៖នាង សុគន្ធា