ប្រមុខការទូតហុងគ្រី ៖ មានតែបទឈប់បាញ់ប៉ុណ្ណោះ ដែលអាចបញ្ឈប់សង្គ្រាមនៅអ៊ុយក្រែនបាន
ប៊ុយដាប៉ែស៖ រដ្ឋមន្រ្តីការបរទេសហុងគ្រី លោក ភីធើ ស៊ីចាតូ បានប្រាប់ក្នុងបទសម្ភាសន៍មួយរបស់បណ្តាញទូរទស្សន៍ SVT ថា ដំណោះស្រាយដែលអឺរ៉ុបកំពុងព្យាយាមរក ដើម្បីដោះស្រាយវិបត្តិនៅអ៊ុយក្រែនមិនដំណើរការទេ ហើយជម្លោះអាចត្រូវបានបញ្ចប់ នោះគឺតាមរយៈបទឈប់បាញ់តែមួយគត់។
ប្រមុខការទូតហុងគ្រីរូបនេះបន្តថា គោលដៅទីមួយគឺបញ្ឈប់ការសម្លាប់មនុស្ស ដែលមានន័យថា កិច្ចព្រមព្រៀងបទឈប់បាញ់ ហើយគ្មានអ្វីទៀតទេ។ បើតាមលោក ស៊ីចាតូ ការដាក់ទណ្ឌកម្មរបស់សហភាពអឺរ៉ុបបានបរាជ័យក្នុងការបញ្ឈប់ជម្លោះមួយនេះ។
លោក ស៊ីចាតូ បានបញ្ជាក់យ៉ាងដូច្នេះថា ពួកយើងបានណែនាំកញ្ចប់ទណ្ឌកម្មចំនួន ១០លើករួចហើយ តើវាបាននាំយើងឱ្យខិតទៅជិតដំណោះស្រាយនៃជម្លោះដែរឬទេ? ចម្លើយគឺ “ទេ”។ តើវាបានធ្វើឱ្យរុស្ស៊ីលុតជង្គង់ដែរឬទេ? ចម្លើយគឺ “ទេ”។
តើវាធ្វើឱ្យយើងឈឺចាប់ដែរឬទេ? ចម្លើយគឺ “ត្រឹមត្រូវ” ដូច្នេះខ្ញុំគិតថា ដំណោះស្រាយដែលយើងកំពុងតែព្យាយាមរកនៅអឺរ៉ុបមិនដំណើរការទេ ពីព្រោះយើងវង្វេងស្មារតីសង្គ្រាមពេក។
នៅពេលត្រូវបានសាកសួរថាតើហេតុអ្វីបានជាហុងគ្រីមិនបញ្ជូនអាវុធទៅឱ្យអ៊ុយក្រែន? លោក ស៊ីចាតូ បាននិយាយថា យើងជារដ្ឋដែលនៅជិតខាងអ៊ុយក្រែន ហើយយើងមិនចង់ឱ្យមានមនុស្សស្លាប់បន្ថែមទៀតទេ នេះជាមូលហេតុដែលយើងកំពុងធ្វើដើម្បីបញ្ឈប់ជម្លោះ… យើងមិនបញ្ជូនអាវុធ ហើយយើងបន្តតស៊ូមតិដើម្បីសន្តិភាព៕ ប្រភព៖ Tass ប្រែសម្រួលដោយ៖ ទីណា
![](https://asset.ams.com.kh/central/media/2023/03/photo_2023-03-07_08-06-31-1024x683.jpg)