ភ្នំពេញ៖ ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន បានបញ្ជាក់ថា រដ្ឋមន្រ្តីក្រសួងកិច្ចការនារី និងរដ្ឋមន្រ្តីក្រសួងវប្បធ៌ម និងវិចិត្រសិល្បៈ នឹងរក្សាទុកដដែល នៅក្នុងរាជរដ្ឋាភិបាលថ្មី អាណត្តិទី៧។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងដូច្នេះ ក្នុងពិធីអបអរសាទរទិវានារី អន្តរជាតិ ៨ មីនា ខួបលើកទី១១២ នៅវិមានសន្តិភាព នាព្រឹកថ្ងៃទី០៧ ខែមីនា ឆ្នាំ២០២៣ ។

នៅក្នុងឱកាសនេះ សម្ដេចតេជោ នាយករដ្ឋមន្ត្រី បានប្រកាសឱ្យដឹងថា នៅក្នុងរាជរដ្ឋាភិបាលថ្មី អាណត្តិទី៧ គឺរដ្ឋមន្រ្តីក្រសួងកិច្ចការនារី និងរដ្ឋមន្រ្តីក្រសួងវប្បធម៌ និងវិចិត្រសិល្បៈ គឺនៅបន្តកាន់តំណែងដដែល ដោយមិនមានការផ្លាស់ប្តូរនោះឡើយ ។ ជាមួយនេះ សម្តេច ក៏បានថ្លែងការកោតសរ សើរចំពោះរដ្ឋមន្រ្តីក្រសួងកិច្ចការនារី ដែលបានខិតខំបំពេញការងារបានយ៉ាងល្អនាពេលកន្លងមក។

សម្តេចតេជោ ហ៊ុន សែន បានបន្តថា សម្តេចដឹកនាំរាជរដ្ឋាភិបាលរយៈពេល ៣៨ឆ្នាំ ។ បើនិយាយពីនៅក្នុងរាជរដ្ឋាភិបាលជាង៤០ឆ្នាំ សម្ដេចពិតជាមានមោទនភាពជាមួយនឹងរដ្ឋមន្ត្រីក្រសួងកិច្ចការនារី ដែលបានធ្វើកិច្ចការងារដ៏ល្អ ៕ អត្ថបទ៖ វណ្ណាលុក, រូបភាព វ៉េង លឹមហួត និង សួង ពិសិដ្ឋ