ប៉េកាំង៖ ថ្ងៃទី១៣ ខែមីនា ឆ្នាំ២០២៣ ប្រធានាធិបតីចិនលោក ស៊ី ជីនពីង (Xi Jinping) កំពុងរៀបចំគម្រោងធ្វើដំណើរទ​ស្សនកិច្ចទៅកាន់ប្រទេសរុស្ស៊ី ដើម្បីជួបជាមួយសមភាគីលោក វ៉្លាឌីមៀ ពូទីន (Vladimir Putin) នៅសប្តាហ៍ក្រោយនេះ​។ប៉ុន្តែមនុស្សមួយចំនួនដែលបានដឹង និងតាមដានពីបញ្ហានេះបានលើកឡើងថា ដំណើរទស្សនកិច្ចនេះអាចប្រព្រឹត្តទៅលឿនជាងការរំពឹងទុក។​

ផែនការដំណើរទស្សនកិច្ចនេះបានកើតឡើងនៅពេលដែលប្រទេសចិនបាននិងកំពុងត្រូវបានគេមើលឃើញថាជាប្រ​ទេ​សមួយដែលព្យាយាមប្រកាន់ជំហរអព្យាក្រឹតជុំវិញបញ្ហាសង្គ្រាមនៅអ៊ុយក្រែន។ យ៉ាងណាក៏ដោយ កិច្ចខិតខំប្រឹងប្រែងរ​បស់ចិនតែងត្រូវបានប្រឈមមុខជាមួយនឹងការដាក់ការសង្ស័យពីសំណាក់បណ្ដាប្រទេសលោកខាងលិច ដោយចោទប្រ​កាន់ថារដ្ឋាភិបាលទីក្រុងប៉េកាំងបានផ្តល់ការគាំទ្រផ្នែកការទូតដល់ប្រទេសរុស្ស៊ី។​

សូមរម្លឹកថា កាលពីខែមុន លោក ពូទីន បានលើកឡើងថា ដំណើរទស្សនកិច្ចរបស់លោក ស៊ី មកកាន់ប្រទេសរុស្ស៊ីត្រូវបា​នព្រមព្រៀងគ្នារួចស្រេចហើយ បើទោះបីប្រមុខដឹកនាំវិមានក្រឹមឡាំងមួយនេះមិនបានបញ្ជាក់ប្រាប់ពីកាលបរិច្ឆេទនៃដំ​ណើរទស្សនកិច្ចនេះជាក់លាក់ក៏ដោយ។ កាលពីខែមុនកាសែត The Wall Street Journal បានរាយការណ៍ថា ដំណើរទស្សនកិច្ចទៅកាន់ទីក្រុងមូស្គូអាចនឹងប្រព្រឹត្តទៅនៅខែមេសា ឬដើមខែឧសភា ខាងមុខនេះ។​

ចំណែកក្រសួងការបរទេសចិនមិនបានផ្ដល់ការឆ្លើយតបភ្លាមៗ ចំពោះសំណើសុំការអត្ថាធិប្បាយអំពីលទ្ធភាពដែលលោក ស៊ី នឹងធ្វើដំណើរទៅកាន់ទីក្រុងមូស្គូនៅពេលណានោះទេ។ បន្ថែមលើនេះ នៅពេលដែលមានការសាក​សួ​រពីការរាយការណ៍របស់សារព័ត៌មាន Reuters វិមានក្រឹមឡាំងបានឱ្យដឹងថា ខ្លួនមិនមានអ្វីត្រូវនិយាយនោះទេជុំវិញប​ញ្ហានេះ។​

អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បានប្រាប់អ្នកសារព័ត៌មាននៅទីក្រុងមូស្គូថា «បើតាមក្បួនច្បាប់កន្លងមក ការប្រកាសអំពីដំណើរទស្សនកិច្ចផ្លូវការរបស់ប្រទេសនីមួយៗ តែងតែត្រូវបានសម្របស​ម្រួ​លគ្នាដោយកិច្ចព្រមព្រៀងរវាងគ្នាទៅវិញទៅមករបស់គូភាគីទាំងពីរជាមុនសិន»។​

លោកបន្តថា ៖ «នៅពេល​ដែលមាន​ការ​ត្រៀម​ខ្លួន​រួចរាល់ យើង​នឹងប្រកាស​ប្រាប់​អ្នក​ទាំងអស់​គ្នា»។ រហូតមកទល់ពេ​លនេះ គេមិនទាន់ទទួលបានព័ត៌មានលម្អិតផ្សេងទៀតនោះទេ។ ប្រភព​មួយដែលបានរាយការណ៍ប្រាប់អំពីបញ្ហា​នេះ​ បា​នបដិសេធ​មិនបញ្ចេញ​​អត្តសញ្ញាណ​ជាសាធារណៈ ដោយ​សារតែបញ្ហា​នេះជាបញ្ហាដែលមានភាពរសើបខ្លាំង។​

គួររម្លឹកថា​ កាល​ពី​ខែ​មុន លោក​ពូទីនធ្លាប់​បាន​រៀបចំទទួល​ភ្ញៀវ​ការទូត​កំពូល​របស់ប្រទេស​ចិនរួចម្ដងមកហើយ គឺលោ​ក វ៉ាង យី (Wang Yi) ទីប្រឹក្សារដ្ឋចិន ក្នុង​ដំណើរ​ទស្សនកិច្ច​ផ្លូវការទៅកាន់​ទីក្រុង​មូស្គូ។ ប្រភព​មួយ​បានឱ្យដឹង​ថា កា​រ​ធ្វើដំណើររបស់​លោក វ៉ាង ទៅ​កាន់​ទីក្រុង​ម៉ូស្គូនាពេលនោះ គឺធ្វើឡើង​ដើម្បី​ជួយ​រៀបចំ​ជាមុនសម្រាប់​ដំណើរ​ទស្សនកិ​ច្ចផ្លូវការ​របស់​លោក ស៊ី នាពេលក្រោយនេះ។​

សូមកត់សម្គាល់ផងដែរថា ទំនាក់ទំនងរវាងប្រទេសចិន និងរុស្ស៊ីបានឈានដល់ដំណាក់កាលភាពជាដៃគូ​មួយដែលគ្មា​នដែនកំណត់ ចាប់តាំងពីខែកុម្ភៈ ឆ្នាំ២០២២ ពោលគឺនៅពេលដែលលោក ពូទីន បានបំពេញទស្សនកិច្ចនៅទីក្រុងប៉េកាំ​ងដើម្បីបើកព្រឹត្តិការណ៍កីឡាអូឡាំពិករដូវរងា ត្រឹមតែប៉ុន្មានសប្តាហ៍ប៉ុណ្ណោះមុនពេលដែលរុស្ស៊ីចូលឈ្លានពានអ៊ុយក្រែ​ន។ ភាគីទាំងពីរតែងតែបន្តអះអាងជាច្រើនលើកច្រើនសារ អំពីភាពរឹងមាំនៃទំនាក់ទំនងរបស់ពួកគេ។​

ចាប់តាំងពីបានឡើងកាន់តំណែងជាប្រធានាធិបតីចិន លោក ស៊ី បានមានកិច្ចជំនួបជាមួយលោក ពូទីន ដោយផ្ទាល់ចំ​នួន ៣៩ ដងឯណោះ ដែលជំនួបថ្មីៗបំផុតគឺត្រូវបានធ្វើឡើងកាលពីខែកញ្ញា អំឡុងពេលកិច្ចប្រជុំកំពូលមួយបានប្រ​ព្រឹ​ត្ត​ទៅនៅតំបន់អាស៊ីកណ្តាល។ កាលពីថ្ងៃចន្ទ លោក ស៊ី បានបិទបញ្ចប់សម័យប្រជុំប្រចាំឆ្នាំនៃសភាប្រជាជនចិនដ៏ធំមួយ ដោយលោកបានទទួលការគាំទ្រជាឯកច្ឆន្ទនៅក្នុងការដឹកនាំក្នុងអាណត្តិទី៣ ដែលនេះគឺជាព្រឹត្តិការណ៍មួយមិនធ្លាប់មានពីមុនមកនោះឡើយ ក្នុងនាមជាប្រធានាធិបតីចិន៕​

ប្រែសម្រួល៖ធា សុណា

ប្រភព៖ https://www.reuters.com/world/chinas-xi-plans-russia-visit-soon-next-week-sources-2023-03-13/