រីយ៉ាដ៖ ទីភ្នាក់ងារសារព័ត៌មាន SPA បានរាយការណ៍ថា ប្រទេសអារ៉ាប៊ីសាអូឌីត ក្នុងថ្ងៃអង្គារសប្តាហ៍នេះ បានប្រកាសពីការបញ្ជាទិញយន្តហោះ Boeing 787 ចំនួន ១២១គ្រឿងសម្រាប់ក្រុមហ៊ុនអាកាសចរណ៍ជាតិចំនួនពីរ។

ក្រុមហ៊ុនអាកាសចរណ៍ Riyadh Air ដែលទើបបង្កើតថ្មីបាននិយាយថា ខ្លួននឹងទិញយន្តហោះ Boeing 787 Dreamliners ចំនួន ៣៩គ្រឿង ជាមួយនឹងជម្រើសក្នុងការបញ្ជាទិញ ៣៣បន្ថែមទៀត។ ទន្ទឹមនឹងនេះ ក្រុមហ៊ុនអាកាសចរណ៍អារ៉ាប៊ីសាអូឌីត (SAUDIA) ក៏បាននិយាយដែរថា ខ្លួននឹងបញ្ជាទិញយន្តហោះធុន 787-9 និង 787-10 ដែលសន្សំសំចៃប្រេងចំនួន ៣៩គ្រឿង ជាមួយនឹងជម្រើសបញ្ជាទិញ ១០បន្ថែមទៀត។

ស្ថានទូតអារ៉ាប៊ីសាអូឌីតប្រចាំនៅសហរដ្ឋអាមេរិកបានបញ្ជាក់ថា កិច្ចព្រមព្រៀងនេះ បង្កើតបានជាលំដាប់ពាណិជ្ជកម្មធំជាងគេទី ៥ នៅក្នុងប្រវត្តិសាស្រ្តរបស់ក្រុមហ៊ុន Boeing។ កិច្ចព្រមព្រៀងនេះដែរ នឹងគាំទ្រដល់គោលដៅរបស់ព្រះរាជាណាចក្រអារ៉ាប៊ីសាអូឌីត ក្នុងការបម្រើអ្នកដំណើរចំនួន ៣៣០លាននាក់ និងទាក់ទាញអ្នកទស្សនាចំនួន ១០០លាននាក់នៅឆ្នាំ ២០៣០៕ ប្រភព៖ ស៊ីនហួរ ប្រែសម្រួលដោយ៖ ឈឹម ទីណា