​​អ.ស.ប៖ សកម្មជន​​សិទ្ធិ​មនុស្ស​កំពុង​ជំរុញ​ឱ្យ​ក្រុម​ប្រឹក្សា​សន្តិសុខ​អង្គការ​សហប្រជាជាតិ (UNSC)​ បញ្ជូន​​​យោធា​មីយ៉ាន់ម៉ា​ទៅ​កាន់​តុលាការ​ឧក្រិដ្ឋកម្ម​អន្តរជាតិ​ដោយ​លើក​ឡើង​​ពី​ការ​រំលោភ​បំពាន និង​អំពើ​ហិង្សា​​ដែល​កំពុង​បន្ត​នៅ​ក្នុង​ប្រទេស​មួយ​នេះ​។ ការ​ជំរុញ​នេះ​ធ្វើ​ឡើង​ស្រប​ពេល​​ដែល​​​​​ក្រុម​​ប្រឹក្សា​​សន្តិសុខ ​រៀប​ចំ​កិច្ច​ប្រជុំ​មួយ​កាល​ពី​ថ្ងៃ​​ចន្ទ​​​ស្តី​​ពី​​វិបត្តិ​​មីយ៉ាន់ម៉ា​។​

នាយិកា​បណ្តាញ​សមភាព​យេនឌ័រ​​ ដែល​ជា​សម្ព័ន្ធ​នៃ​អង្គការ​លើក​កម្ពស់​សិទ្ធិ​ស្ត្រី​ក្នុង​ប្រទេស​មីយ៉ាន់ម៉ា​ លោក​ស្រី May Sabe Phyu ​បាន​ចោទ​ប្រកាន់​យោធា​មីយ៉ាន់ម៉ា​ថា​បាន​ធ្វើ​ «​យុទ្ធនាការ​ភេរវកម្ម»​ និង​ប្រព្រឹត្ត​ «​អំពើ​ដ៏​សាហាវ​ឃោរឃៅ»​ ដែល​បង្កើត​ជា​ឧក្រិដ្ឋកម្ម​ប្រឆាំង​មនុស្ស​ជាតិ​។​ នេះ​បើ​តាម​ការ​ស្រង់​សម្ដី​របស់​ទីភ្នាក់ងារ​សារព័ត៌មាន​ AP។

លោក​ស្រី​​បាន​​និយាយ​​​ថា​ ក្រុម​ប្រឹក្សា​​សន្តិសុខ​​គួរ​តែ​​បញ្ជូន​​​សំណុំ​រឿង​នេះ​​​ទៅ​​តុលាការ​​ឧក្រិដ្ឋកម្ម​​អន្តរជាតិ​​ដើម្បី​​កាត់​ទោស​។​លោក​ស្រី​ Phyu ​ដែល​និរទេស​ខ្លួន​ទៅ​​សហរដ្ឋ​អាមេរិក​ក្រោយ​រដ្ឋ​ប្រហារ​ បាន​ស្នើ​ឱ្យ​ក្រុម​ប្រឹក្សា​សន្តិសុខ​ដាក់​សម្ពាធ​ប្រទេស​ជិត​ខាង​របស់​មីយ៉ាន់ម៉ា​កុំ​ឱ្យ​គាំទ្រ​រដ្ឋាភិបាល​ ប៉ុន្តែ​ត្រូវ​គាំទ្រ​ជា​សាធារណៈ​ចំពោះ​កង​កម្លាំង​ប្រជាធិបតេយ្យ​ រួម​ទាំង​រដ្ឋាភិបា​ល​​​ឯក​ភាព​ជាតិ (NUG) ​  ដែល​នៅ​ក្រៅស្រុក​ និង​​​បង្កើត​ឡើង​ដោយ​ក្រុម​អ្នក​នយោបាយ​នៃ​រដ្ឋា​បាល​ចាស់​។

ចំណែក​ឯ​អង្គការ​ឃ្លាំ​មើល​សិទ្ធិ​មនុស្ស​បាន​និយាយ​​ក្នុង​សេចក្តី​ថ្លែងការណ៍​​ថា​ ត្រូវ​តែ​ចាត់​វិធានការ​ជាក់​ស្តែង​បន្ថែម​ទៀត​ប្រឆាំង​នឹង​របប​យោធា​ដែល​​ធ្វើ​រដ្ឋ​ប្រហារ​ដណ្ដើម​អំណាច​ពី​រដ្ឋាភិបាល​ជាប់​ឆ្នោត​តាម​បែប​ប្រជាធិបតេយ្យ​របស់​លោក​ស្រី ​អ៊ុងសាន ​ស៊ូជី​​។

​​គួរ​រំឭក​ថា​ រដ្ឋ​​ប្រហារ​យោធា​ដែល​​ធ្វើ​ឡើង​កាល​ពី​រ​ឆ្នាំ​មុន​នោះ​ បាន​បង្ក​ឱ្យ​មាន​ចលាចល និង​អំពើ​ហិង្សា​​ដ៏​ធំ ​​រវាង​​កង​កម្លាំង​ប្រដាប់​អាវុធ​របស់​ប្រទេស​ ​និង​​ចលនា​តស៊ូ​​បង្កើត​ឡើង​ដោយ​ក្រុម​បាតុករ​ សកម្មជន​ ​ក៏​ដូច​ជា​​ក្រុម​ប្រដាប់​អាវុធ​។​

​យោង​តាម​ទិន្នន័យ​ចុង​ក្រោយ​ពី​ក្រុម​ឃ្លាំ​មើល​ដែល​មាន​មូលដ្ឋាន​នៅ​ប្រទេស​ថៃ​ ​មនុស្ស​រាប់​ពាន់​នាក់​ត្រូវ​បាន​ចាប់​ខ្លួន​ ឬ​សម្លាប់​នៅ​ក្នុង​ការ​បង្ក្រាប​​​លើ​ក្រុម​ប្រឆាំង​របស់​ពួក​យោធា​។​​ ​អង្គការ​ឃ្លាំ​មើល​សិទ្ធិ​មនុស្ស​កំពុង​ជំរុញ​ឱ្យ​ក្រុម​ប្រឹក្សា​សន្តិសុខ​​​ប្រើ​ប្រាស់​​​សេចក្ដីសម្រេច​​កាល​ពី​ខែ​​ធ្នូ​ ​ ​ដែល​ទាមទារ​ឱ្យ​បញ្ចប់​អំពើ​ហិង្សា​ជា​បន្ទាន់​ ហើយ​ឱ្យ​របប​យោធា​ដោះ​លែង​អ្នក​ទោស​នយោបាយ​ទាំង​អស់​។

​នាយក​​​អង្គការ​ឃ្លាំ​មើល​សិទ្ធិ​មនុស្ស​របស់​អ.ស.ប  លោក Louis Charbonneau បាន​ថ្លែង​ថា​៖ ​​«​របប​​យោធា​​មីយ៉ាន់ម៉ា​​បាន​​បង្ហាញ​​ថា​ វា​​មិន​​អាច​​ខ្វះ​​បាន​​ចំពោះ​​ការ​​ថ្លែង​​ថ្កោល​ទោស ​ឬ​​ការ​​ព្រួយ​​បារម្ភ​»។ លោក​បន្ត​ថា​ ​ការ​មិន​យក​ចិត្ត​ទុក​ដាក់​លើ​សេចក្តី​សម្រេច​កាល​ពី​ខែ​ធ្នូ​របស់​ក្រុម​ប្រឹក្សា​សន្តិសុខ​​ ​បង្ហាញ​ពី​តម្រូវ​ការ​សម្រាប់​សេចក្ដី​សម្រេច​ថ្មី​​មួយ​ ដែល​ដាក់​វិធានការ​ខ្លាំង​ដូច​ជា​ការ​ហាម​ឃាត់​អាវុធ​ និង​ការ​ដាក់​ទណ្ឌកម្ម​ជា​គោលដៅ​សម្រាប់​មន្ត្រី​យោធា​ជាន់​ខ្ពស់​ និង​ក្រុម​ហ៊ុន​ដែល​ពាក់​ព័ន្ធ​នឹង​ក្រុម​យោធា​៕

ដោយ៖ហួន ឌីណា

ប្រភព​៖ UN Security Council Urged to Refer Myanmar to International Criminal Court  https://www.voanews.com/amp/un-security-council-urged-to-refer-myanmar-to-international-criminal-court-/7005371.html