អង្ករនាងអំ៖ ពូជអង្ករថ្មីដែលទទួលបានការចាប់អារម្មណ៍ និងមានតម្រូវការខ្ពស់
ភ្នំពេញ៖“នាងអំ” ជាឈ្មោះអង្ករមួយប្រភេទដែលមានប្រភពនិងបង្កាត់ពូជដាំដុះដោយលោកយាយម្នាក់ដែលមានឈ្មោះថា «អំ» នៅឃុំស្វាយជ្រះ ស្រុកស្នួល ខេត្តក្រចេះ។ បើយោងតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងពីប្រវត្តិអង្ករនាងអំថា ក្នុងអំឡុងទសវត្សរ៍ទី៨០ក្រោយការប្រមូលផលស្រូវចម្ការអស់ហើយ នាងអំ ឬយាយអំ បានឃើញស្រូវមួយគុម្ពនៅក្បែរចម្ការដោយមានគ្រាប់ប្លែកពីស្រូវដែលបានច្រូតហើយ
។យាយអំក៏បូតយកគ្រាប់ស្រូវនោះបានប្រមាណមួយទូកដៃ ខ្ចប់នឹងក្រណាត់តូចយ៉ាងស្អាតយកទៅរក្សាទុក។ លុះដល់រដូវសាបព្រោះក៏យកទៅដាំដុះលើដីដាច់ដោយឡែកក្រោយមកប្រមូលផលបានប្រមាណមួយល្អីតូច ហើយក៏សាបព្រោះបន្តទៀតដោយការបានយកអង្កនោះទៅដាំបាយសាកល្បង ក៏ឃើញថាពូជស្រូវនេះមានរសជាតិឆ្ងាញ់ហើយក្រអូបទៀត។ ក្រសួងបានបន្តថា យាយអំ តាំងពីថ្ងៃនោះមកក៏ផ្សព្វផ្សាយដោយខ្លួនឯងផ្ទាល់ ដោយចែករំលែកពូជជូនអ្នកស្រុកម្នាក់បន្តិចៗឲ្យធ្វើការសាកល្បង ដែលរហូតប្រមាណ ១០ឆ្នាំក្រោយមក អង្ករនាងអំត្រូវបានទទួលស្គាល់ស្ទើរគ្រប់មជ្ឈដ្ឋានក្នុងឃុំ ហើយក៏ល្បីសាយភាយមកដល់ទីរួមខេត្តទៀត ដែលមកទល់ពេលនេះ
លោកយាយចង់ឲ្យកូនចៅបន្តពូជស្រូវនេះដោយបន្សុទ្ធពូជឱ្យបានល្អកុំឲ្យបាត់គុណភាពដើមដែលគេបានយកឈ្មោះលោកយាយទៅដាក់ជាសម្គាល់ពូជនោះ។
មកទល់បច្ចុប្បន្ននេះ បើទោះមិនទាន់ល្បីល្បាញខ្លាំងដូចប្រភេទអង្ករល្បីៗ ដូចជាអង្ករ ផ្កាម្លិះ ឬរំដួលក្តី តែអង្ករនាងអំ កំពុងទទួលបានការចាប់អារម្មណ៍ និងមានតម្រូវការកើនឡើងខ្លាំង ហើយការដាំដុះទៀតសោ ត គឺមានភាពងាយស្រួល។ នេះបើតាមការឱ្យដឹងពី លោកស្រី ឈឺន សុភាសី (ហៅស្រី មុំ) ជាម្ចាស់ហាងអង្ករស្រីមុំកៅសិបប្រាំបួន។ លោកស្រី ស្រី មុំ ដែលជាអ្នកផលិតអង្ករនាងអំ លើផ្ទៃដីជាង ២០០ហិតា ហើយក៏ជាអ្នកលក់ផ្ទាល់ បានឱ្យដឹងថា៖ «ពាក់ព័ន្ធនឹងតម្រូវការអង្ករនាងអំ នាពេលបច្ចុប្បន្ននេះ សម្រាប់ហាងនាងអំរបស់ខ្ញុំ
និយាយរួមពេលដែលផ្តើមលក់អង្ករនាងអំ នេះនៅលើទីផ្សារ ខ្ញុំឃើញថាតម្រូវការរបស់អតិថិជនយើងចេះតែកើនឡើ ងបន្តបន្ទាប់តាមរយៈការផ្សព្វផ្សាយរបស់យើង តាមរយៈការទិញយកទៅសាកញុំា តាមរយៈបងប្អូនជួយណែនាំ យើងឃើញថាតម្រូវការនិងការគាំទ្រ ចេះតែបន្តកើនឡើង»។
លោកស្រី បានបន្តទៀតថា៖ «វាចាប់ផ្ដើមប្រសើរពីមួយថ្ងៃទៅមួយថ្ងៃ ព្រោះភាគច្រើនអតិថិជន មិនសូវស្គាល់ទេ ដូចយើងដឹងស្រាប់ហើយថាប្រហែល ១៦ទៅ ១៧ លាននាក់ ភាគច្រើនស្គាល់តែពូជ ម្លិះ រំដួល ផ្កាភ្ញីជាដើម។ចំណែកអង្ករនាងអំនេះអត់ទាន់មានអ្នកស្គាល់ច្រើនទេ…ពេលដែលខ្ញុំយកមកលក់ដំបូងក៏មានអ្នកឆ្ងល់ដែរ តែក្រោយពេលបានភ្លក់ហើយ គាត់ជាប់ចិត្ត ស្ទើរតែថា ១០នាក់គាត់ទិញទៅ មានតែម្នាក់អីទេដែលគាត់ញុំាមិនត្រូវមាត់មិនត្រូវចិត្ត»។
ដោយឡែកពូជស្រូវដែលមានប្រភពមកពីខេត្តក្រចេះនេះមានលក្ខណៈពិសេសប្លែកគេ គឺធន់នឹងអាកាសធាតុ ងាយស្រួលថែទាំ ដាំដុះ រីឯអង្ករពេលដាំទៅជាបាយហើយក៏ក្លិនឈ្ងុយ និងមានរសជាតិ ឆ្ងាញ់ផងដែរ។
ម្ចាស់អាជីវកម្មអង្ករ និងជាអ្នកដាំដុះដដែលនេះ បានឱ្យដឹងទៀតថា លោកស្រីចង់បញ្ជាក់ថាស្រូវនាងអំ គឺជាដើមស្រូវម្យ៉ាងដែលមានសុខភាពរឹងមាំពីកំណើត ដែលធន់នឹងអាកាសធាតុ បើទោះបីជាមេឃរាំង មេឃមិនមានភ្លៀង ខ្វះទឹក ១០ថ្ងៃ ឬ ២០ថ្ងៃក៏ដោយ ក៏ស្រូវនេះនៅតែធន់បានដែរ។
ថ្វីត្បិតថា រូបរាងរបស់អង្ករមួយនេះមិនស្អាតដូចអង្ករផ្សេងៗទៀត ដោយសារគ្រាប់អង្ករនាងអំខ្លីៗ ប៉ុន្តែគុណភាព និងរសជាតិវិញ ឆ្ងាញ់មិនចាញ់អង្ករល្បីៗប៉ុន្មាននោះទេ។
លោកស្រី ស្រី មុំ ថ្លែងបន្តថា លក្ខណៈពិសេសមួយទៀតរបស់អង្ករនាងអំ ពេលយើងដាំទៅវាទន់ តែវាអត់រអៀច គេហៅថាទន់ស្ងួតវាអត់ពិបាកដូចអង្ករខ្លះ បើយើងច្រោះទឹកវាទៅជាបាយរអៀច ញុំាមិនឆ្ងាញ់ទេ។តែអង្ករនាងអំនេះ ទន់ស្ងួត មានទម្ងន់គ្រាប់អង្ករធ្ងន់ជាងអង្ករផ្សេងៗ ពេលញុំាបាយអង្ករនាងអំវាធ្ងន់ពោះមិនងាយឃ្លានដូចអង្ករដទៃ ដូចថាវាឆ្អែតបានយូរ។ ជុំវិញការលក់ពូជស្រូវនាងអំនេះ លោកស្រីបានបញ្ជាក់ថា គឺជាប្រភេទស្រូវវស្សា តែក៏ប្រកាន់រដូវដែរ បើទោះកសិករព្រួសនៅក្នុងខែកក្កដាឬ
ដាំពីខែមេសាទៅក្តី ក៏នៅតែទទួលផលអំឡុងពាក់កណ្តាលខែវិច្ឆិកា ពីចន្លោះថ្ងៃ ១៥ ដល់ថ្ងៃ ២៥ ដូចគ្នា។
ចំណែកឯផលវិបាកវិញ ម្ចាស់ហាងអង្ករ ស្រីមុំ៩៩ បានឱ្យដឹងថា អ្វីដែលជាផលលំបាកនោះគឺ យើងអាចធ្វើបានតែម្តងគត់ក្នុងមួយឆ្នាំ ព្រោះវាជាប្រភេទស្រូវចម្ការ និងជាប្រភេទស្រូវវស្សាហើយ យើងមិនអាចយកវាទៅបង្កាត់ពូជផ្សេងដើម្បីអាចធ្វើមួយឆ្នាំលើសពីមួយដងបានទេ។
លោកស្រី ក៏បានឱ្យដឹងដែរថា អង្ករនាងអំនេះមានតម្លៃប្រហាក់ប្រហែលនឹងតម្លៃអង្ករដទៃទៀតនៅលើទីផ្សារដែរ ដោយមិនខ្ពស់ពេក ក៏មិនទាបពេកដែរ ។និយាយរួមគឺសមល្មម។ ក្រោយមានតម្រូវការកើនឡើងខ្លាំង អាជីវកររូបនេះបានបង្ហើបថាពីគម្រោងបន្ទាប់ថា លោកស្រីចង់បង្កើត ជា
សហគមន៍សម្រាប់ដាំដុះពូជស្រូវនេះតែម្ដង ដើម្បីពង្រីកទីផ្សារអង្គរប្រភេទនេះបន្ថែមទៀត៕
ដោយ៖កែវ បុស្បា
