បាងកក៖ ការស្ទង់មតិថ្មីមួយបង្ហាញថា កូនស្រីរបស់អតីតនាយករដ្ឋមន្ត្រីថៃ លោក ថាក់ស៊ីន បាននាំមុខលើសលុបលើលោកនាយករដ្ឋមន្ត្រី ប្រាយុទ្ធ ចាន់អូចា ខណៈដែលការបោះឆ្នោតគ្រោងនឹងធ្វើឡើង នាប៉ុន្មានខែខាងមុខ។

កូនស្រីពៅអតីតនាយករដ្ឋមន្រ្តីថៃ ថាក់ស៉ីន នាំមុខដាច់លើលោក ប្រាយុទ្ធ ក្នុងការស្ទង់មតិថ្មីមួយ សម្រាប់តំណែងនាយករដ្ឋមន្ត្រី។ អ្នកនាង ផែថងថាន ស៉ីនណាវ៉ាត់ (Paetongtarn Shinawatra) ដែលជាកូនស្រី របស់ លោក ថាក់ស៊ីន ស៊ីណាវ៉ាត់ (Thaksin Shinawatra) បាននាំមុខដាច់ លើនាយករដ្ឋមន្ត្រីថៃបច្ចុប្បន្ន លោក បា្រយុទ្ធ ចាន់អូចា នៅក្នុងការស្ទង់មតិថ្មីមួយស្ដីពីជម្រើសកំពូលសម្រាប់តំណែងជានាយករដ្ឋមន្ត្រី។

វិទ្យាស្ថានជាតិអភិវឌ្ឍរដ្ឋបាល នីដា (NIDA) ជាអ្នកដឹកនាំការស្ទង់មតិខាងលើ បានឱ្យដឹងទៀតថាអ្នកនាង ផែថងថាន នៅតែបន្តជាជម្រើសកំពូលក្នុងការកាន់តំណែងជានាយករដ្ឋមន្ត្រីថ្មីរបស់ថៃ សម្រាប់ អ្នកចូលរួមស្ទង់មតិជាង ២,០០០នាក់ ដោយអ្នកនាងទទួលបានសំឡេងគាំទ្រ ៣៨.២ភាគរយ។ អត្រាគាំទ្រនេះមានការកើនឡើង ធៀបទៅនឹងការស្ទង់មតិកាលពីខែធ្នូ ឆ្នាំ២០២២ ដែលអ្នកនាង ទទួលបានសំឡេងគាំទ្រ ៣៤ភាគរយ។

ចំណែកឯ លោក ប្រាយុទ្ធ ចាន់អូចា វិញ ទទួលបានសំឡេងគាំទ្រ ១៥.៤ភាគរយ តែនេះជាអត្រាកើនឡើងបើធៀបទៅនឹងការស្ទង់មតិកាលពីខែធ្នូ ដោយលោកទទួលបាន ១៤ភាគរយ។

គួរបញ្ជាក់ថា ការបោះឆ្នោតសកលនៅក្នុងប្រទេសថៃ ត្រូវបានគេរំពឹងថានឹងប្រព្រឹត្តទៅនៅខែឧសភាខាងមុខ៕ ប្រភពពី AFP ប្រែសម្រួលដោយ៖ សារ៉ាត