បុរសជនជាតិបែលហ្ស៊ិកម្នាក់ ដំណើរការអាជីវកម្មនៅកម្ពុជាទាំងត្រដាបត្រដួសក្រោយកូវីដ១៩ តែចាប់ផ្តើមឃើញភាពជោគជ័យ
ភ្នំពេញ៖បើត្រលប់ទៅក្រោយបន្តិចចន្លោះពីចុងឆ្នាំ ២០១៩ ដល់ឆ្នាំ ២០២១ គ្រប់បណ្តាប្រទេសទាំងអស់ រួមទាំងកម្ពុជាសុទ្ធតែរងផលប៉ះពាល់ផ្នែកសេដ្ឋកិច្ចធ្ងន់ធ្ងរ។ ចំណែកឯអាជីវកម្មវិញ មិនថាខ្នាតតូច ឬខ្នាតកណ្តាឡ ឬខ្នាតធំនោះទេ សុទ្ធតែព្យាយាមបើកដំណើរការឡើងវិញទាំងត្រដរក្រោយកូវីដ១៩ ស្រាកស្រាន្តបន្តិចទៅ។ ឯអាជីកម្មមួយចំនួនត្រូវបង្ខំចិត្តបិទទ្វារ។ ប៉ុន្តែមានបុរសជនជាតិបែលហ្ស៊ិកម្នាក់ បែរជាផ្តើមបើកអាជីវកម្មថ្មីរបស់ខ្លួននៅក្រុងភ្នំពេញ
ខណៈពេលស្ថានភាពកូវីដ១៩ ស្ថិតក្នុងភាពស្រពេចស្រពិល នោះគឺលោក Stephane Munster ដែលមានជំនាញផ្នែកចំណីអាហារ អាជីវកម្មបង្កើតថ្មី និងអាជីវកម្មនវានុវត្តន៍។
លោក Stephane Munster បានមករស់នៅ និងធ្វើការក្នុងប្រទេសកម្ពុជាតាំងពីឆ្នាំ ២០១៩ ពោលគឺមុនការមកដល់នៃជំងឺកូវីដ១៩ បន្តិច។ លោក Stephane បានឱ្យដឹងថា បានប្រាប់ឱ្យដឹងថា មកដល់កម្ពុជាដំបូង លោកបានសិក្សាស្រាវជ្រាវបន្តិចពីវិស័យកសិ-ចំណីអាហារនៅក្នុងខេត្តកំពត ដោយសារតែលោកធ្លាប់ធ្វើការក្នុងវិស័យនេះ ក៏ដូចជាផ្នែកកែច្នៃចំណីអាហារផងដែរ។ ក្រោយមកលោកបានចូលបម្រើការងារបានរយៈពេល
ប្រាំបួនខែជាអ្នកប្រឹក្សាដល់សាកលវិទ្យាធិការព្រឹទ្ធបុរស និងនាយកដ្ឋានស្រាវជ្រាវ ដើម្បីបង្កើតកម្មវិធីឲ្យវិទ្យាស្ថានបច្ចេកវិទ្យាកម្ពុជា ឬហៅកាត់ថា Techno។
បន្ទាប់មកទៀត កូវីដ១៩ក៏បានមកដល់ កម្មវិធីរបស់សាលាក៏ត្រូវបានផ្អាក លោកបានទៅបើកកម្មវិធីមួយប្រយុទ្ធប្រឆាំងនឹងជំងឺកូវីដ១៩ មួយរយៈ ប៉ុន្តែដោយសារគ្មានថវិកាគាំទ្រ ទើបលោកសម្រេចបញ្ចប់កម្មវិធីនោះទៀត។ ក្រោយមក លោក Stephane Munster ដោយសម្លឹងឃើញឱកាសក្នុងវិស័យម្ហូបអាហារ និងកម្សាន្តនៅតែបន្តមានទើបលោកបានចាប់ផ្តើមបើកបារមួយនៅលើ
ផ្លូវ៣០៨ ឬតំបន់បាសាក់ឡែន ដែលជាតំបន់ពេញនិយមសម្រាប់អ្នកទេសចរបរទេស និងជនបរទេសដែលរស់នៅក្រុងភ្នំពេញ។
ធ្លាប់ធ្វើការលើវិស័យមួយចំនួនតូចនៅកម្ពុជាលោក Stephane បានរៀបរាប់ឱ្យដឹងពីមូលហេតុដែលលោកងាកទៅបើកអាជីវកម្មបារថា ៖ «ពេលនេះ វិធីងាយស្រួលបំផុតដើម្បីបន្តដើរលើវិស័យម្ហូបអាហារគឺការបង្កើតបារដោយសារវាជាផ្លូវមួយដែលមានឱកាសជួបមនុស្ស»។
លោកបន្តឱ្យដឹងថា៖ «យើងមានបារ វាជាវិធីដ៏ល្អដែលអនុញ្ញាតឱ្យខ្ញុំរក្សាទំនាក់ទំនងជាមួយអតិថិជនជាច្រើនរបស់ខ្ញុំឱ្យបានល្អ ។អតិថិជនដែលមកពីប្រភពផ្សេងទៀត អ្នកទេសចរកម្ពុជា និងអ្នកទេសចរអាជីវកម្មបរទេសជាដើម»។
ដោយឡែក ពេលដែលដំណើរការអាជីវកម្មបារដែលមានឈ្មោះថា Pixel ដំបូងៗបន្ទាប់ពីជំងឺកូវីដ១៩ លោកបានបញ្ជាក់ថាលោកក៏មានក្តីបារម្ភខ្លះដែរនាពេលនោះ តែមកទល់បច្ចុប្បន្ននេះលោកបានឱ្យដឹងថាអាជីវកម្មរបស់ខ្លួនកំពុងរីកចម្រើន និងទាក់ទាញទេសចរបានច្រើនផងដែរ។
លោកបានបញ្ជាក់ថា លោកមិនចង់ឱ្យតំបន់នេះក្លាយជាតំបន់សម្រាប់តែទេសចរទាំងស្រុងនោះទេ លោកចង់ឱ្យមានតុល្យភាពរវាងអ្នកទេសចរបរទេសដែលរស់នៅកម្ពុជា និងប្រជាជនខ្មែរផ្ទាល់ ដោយយល់ថានៅកម្ពុជាភ្ញៀវទេសចរមិនទៀងទាត់ពេកនោះទេ បើពឹងផ្អែកលើអ្នកទេសចរទាំងស្រុងនោះអាជីវកម្មនឹងគ្មានលំនឹង។
លោក Stephane បញ្ជាក់ថា ៖ «ទី១ យើងនៅកម្ពុជាស្រាប់។ ដូច្នេះខ្ញុំចង់បានភ្ញៀវជាជនជាតិខ្មែរ ហើយវាប្រសើរបើភ្ញៀវបីប្រភេទនេះមានតុល្យភាពដូច ភ្ញៀវខ្មែរ៣៣ភាគរយ ភ្ញៀវបរទេសនៅកម្ពុជា ៣៣ភាគរយ និងទេសចរបរទេស ៣៣ភាគរយ នោះអាជីវកម្មនឹងមានលំនឹងគ្រប់រដូវកាល»។
លើសពីនេះបុរសជនជាតិបែលហ្ស៊ិករូបនេះក៏បានរំលេចពីគោលដៅសម្រាប់អាជីកម្មថ្មីរបស់ខ្លួនពោលគឺលោកចង់បាររបស់ខ្លួនជាបារចម្រុះជាតិសាសន៍ ជាបារសកលដែលមានមនុស្សគ្រប់វ័យ គ្រប់ជាតិសាសន៍ និងវប្បធម៌ផ្សេងៗគ្នាផងដែរ៕ ដោយ៖កែវ បុស្បា