តូក្យូ៖ នាយករដ្ឋមន្ត្រីជប៉ុន លោក ហ៊្វូមីអូ គីស៊ីដា បានចាកចេញទៅកាន់ប្រទេសឥណ្ឌាហើយ ដើម្បីជួបជាមួយសមភាគីឥណ្ឌា លោក ណារិនដ្រា ម៉ូឌី។ បច្ចុប្បន្នជប៉ុនកាន់តំណែងជាប្រធានក្រុមប្រទេស G7 ខណៈដែលឥណ្ឌាជាប្រធានក្រុមប្រទេស G20។

លោក គីស៊ីដា បានចាកចេញពីអាកាសយានដ្ឋាន ហាណេដា ទីក្រុងតូក្យូ តាមយន្តហោះរដ្ឋាភិបាលនៅថ្ងៃអាទិត្យទី១៩ ខែមីនា ឆ្នាំ២០២៣។ គាត់នឹងទៅដល់ប្រទេសឥណ្ឌានៅព្រឹកថ្ងៃចន្ទទី២០ ខែមីនានេះ (ម៉ោងក្នុងតំបន់) ហើយត្រឡប់មកប្រទេសជប៉ុនវិញនៅថ្ងៃពុធទី២២ ខែមីនានេះ។

នៅមុនការចាកចេញពីប្រទេស នាយករដ្ឋមន្រ្តីជប៉ុនរូបនេះបានប្រាប់អ្នកយកព័ត៌មានថា គាត់ចង់ពិភាក្សាយ៉ាងពេញលេញជាមួយមេដឹកនាំឥណ្ឌា អំពីតួនាទីដែលប្រទេសរបស់ពួកគេគួរតែដើរតួក្នុងសហគមន៍អន្តរជាតិ។ ជាមួយគ្នានេះ លោក គីស៊ីដា ក៏សង្ឃឹមផងដែរថា ប្រទេសទាំងពីរនឹងធ្វើឱ្យទំនាក់ទំនងទ្វេភាគីកាន់តែស៊ីជម្រៅថែមទៀត។

លោក គីស៊ីដា ក៏ត្រូវបានគេរំពឹងដែរថា នឹងថ្លែងសុន្ទរកថាទៅកាន់ក្រុមអ្នកនយោបាយក្នុងប្រទេសឥណ្ឌា ដើម្បីបង្ហាញពីផែនការជាក់ស្តែង ក្នុងការលើកកម្ពស់តំបន់ឥណ្ឌូ-ប៉ាស៊ីហ្វិកដែលសេរី និងបើកចំហ ដែលជាគោលគំនិតចម្បងរបស់ប្រទេសជប៉ុន៕ ប្រភព៖ NHK ប្រែសម្រួលដោយ៖ ឈឹម ទីណា