ភ្នំពេញ៖រាជរដ្ឋាភិបាលបានចេញសេចក្តីសម្រេចបង្កើតគណៈយុទ្ធមិត្តជំនាន់បម្រើកងទ័ពឆ្នាំ១៩៧៨ ដែល​​មានសម្ដេចតេជោ ហ៊ុន សែន នា​យ​ករដ្ឋមន្ត្រីកម្ពុជាជាប្រធានកិត្តិយសក្នុងគោលដៅរំឭកដល់ស្នាដៃដែលកងទ័ពជំនាន់នោះបានពលីជួ​យ​ជាតិមាតុភូមិរំដោះប្រជាជនពីរបបប្រល័យពូជសាសន៍ខ្មែរក្រហម ព្រមទាំងដើម្បីជួយជ្រោមជ្រែងជីវ​ភា​ព​​

រស់នៅរបស់កងទ័ពដែលនៅរស់រាន ពិសេសអ្នកមានជីវភាពទន់ខ្សោយ។​

តាមរយៈសេចក្តីសម្រេចរបស់រដ្ឋាភិបាលនៅថ្ងៃទី២២ ខែមីនា ឆ្នាំ២០២៣ ស្តីពី «ការបង្កើតគណៈយុទ្ធមិត្តជំនាន់បម្រើកងទ័ពឆ្នាំ១៩៧៨ ហៅកាត់ថា “យ.ជ.ប.ទ.» មានសម្ដេចតេជោ ហ៊ុន សែន នាយករដ្ឋមន្ត្រីកម្ពុជាជាប្រ​ធានកិត្តិយស, លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្តី រដ្ឋមន្ត្រីក្រសួងទំនាក់ទំនង ជាមួយរដ្ឋសភា-ព្រឹ​ទ្ធ​សភា និងអធិការកិច្ចជាប្រធាន និងឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ជាអនុប្រធាន។​

គោលដៅនៃការបង្កើត គណៈយុទ្ធមិត្តជំនាន់បម្រើកងទ័ពឆ្នាំ១៩៧៨ គឺមានតួនាទី និងភារកិច្ចសំខាន់បីយ៉ាង។ក្នុងនោះ​ គឺការ​ថែរក្សាប្រពៃណី ស្នេហាជាតិ ការពារស្នាដៃ និងសមិទ្ធផល ព្រមទាំងសច្ចធម៌ប្រវត្តិសាស្ត្រ, ជួយជ្រោមជ្រែងដល់ជីវភាពរស់នៅរបស់យុទ្ធមិត្ត ពិសេសអ្នកដែលមានជីវភាពទន់ខ្សោយ ជួបទុក្ខ លំបាក។

ចំណែកចំណុចចុងក្រោយគឺ ការរៀបចំសមាជិកដែលជាយុទ្ធជន យុទ្ធនារីបានបម្រើកងទ័ពឆ្នាំ១៩៧៨ ដែ​ល​ស្ថិតក្រោមការដឹកនាំបញ្ជារបស់សម្ដេចតេជោ ហ៊ុន សែន នៅជំនាន់ឆ្នាំនោះ។​ ​ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជា បានប្រាប់ឱ្យដឹងថា ​

ការបង្កើតគណៈយុទ្ធមិត្តនេះមានភាពចាំបាច់ណាស់ដើម្បីរំឭកដល់ស្នាដៃដែលយុទ្ធមិត្តបានលះបង់សាច់ស្រស់ ឈាមស្រស់ក្នុងកា​រនាំយកសន្តិភាព ​ឯកភាពជាតិ មកជូនមាតុភូមិកម្ពុជា ដែលជាការលះបង់ដ៏មានតម្លៃសម្រាប់ជាតិកត់ត្រាទុក។ មួយទៀតដើម្បីទ្រទ្រង់ជីវភាពដល់យុទ្ធមិត្តដែលនៅសេសសល់ ក្រុមគ្រួសារជាដើម ដែលជាការ​ដឹកគុណជូនអ្នកទាំងនោះ។​

ឯកឧត្តម សុខ ឥសាន មានប្រសាសន៍ថា ៖ «បើគ្មានយុទ្ធមិត្តយើងពលីកម្មដើម្បីប្តូរយកសន្តិភាពនោះទេ យើ​ងមិនមានថ្ងៃនេះទេ ហើយវាជាការគោរពដឹងគុណដល់អ្នកធ្វើពលីកម្មជូនជាតិទាំងអស់នោះ និងបើសិនជាក្រុមគ្រួសារពួកគាត់មានបញ្ហាលំបាក គណៈយុទ្ធមិត្តអាចជួយដោះស្រាយបាន»។​

ពាក់ព័ន្ធនឹងការបង្កើតនេះដែរ បណ្ឌិត​ យង់ ពៅ អគ្គលេខាធិការនៃរាជបណ្ឌិត្យសភាកម្ពុជា យល់ថា ការប​ង្កើតគណៈយុទ្ធមិត្តឆ្នាំ១៩៧៨ នេះមានភាពចាំបាច់ដើម្បីរំឭកដល់ការលះបង់របស់កងទ័ព និងជាការចងចាំ​សម្រាប់អ្នកជំនាន់ក្រោយលើតឹកតាងប្រវត្តិសាស្រ្ត ពាក់ព័ន្ធនឹងតស៊ូរំដោះជាតិខ្មែរចេញពីរណ្តៅនៃរបបកម្ពុជាប្រជាធិបតេយ្យដែលធ្វើឲ្យកម្ពុជាធ្លាក់ដល់ចំណុចសូន្យ និងប្រល័យពូជសាសន៍។​ លោក​ យង់ ពៅ ប្រាប់ថា៖ «ផ្អែកតាមទិដ្ឋភាពប្រវត្តិសាស្រ្ត រដ្ឋាភិបាលសម្រេចបង្កើតគណៈយុទ្ធមិត្តឆ្នាំ១៩​៧៨ ដើម្បីជាមេរៀនប្រវត្តិសាស្ត្រ ជាការចងចាំសម្រាប់ខ្មែរគ្រប់ជំនាន់ ​ពីចលនាតស៊ូ ជាមេរៀននៃចល​នាតស៊ូ ជាមេរៀននៃសង្គ្រាម ជាមេរៀននៃខ្មែរបែបបាក់។ បើសិនមិនមានការចងជាយុទ្ធមិត្តឆ្នាំ១៩​

៧​៨ ទេ​ អាចធ្វើឲ្យក្មេងជំនាន់ក្រោយមិនបានទទួល ចងចាំនូវស្នាដៃនៃការតស៊ូនេះ»។​

គួរបញ្ជាក់ថា កាលពីថ្ងៃទី១២ ខែឧសភា ឆ្នាំ១៩៧៨ សម្ដេចតេជោ ហ៊ុន សែន ជាអគ្គមគ្គុទេ្ទសក៍បានស្ថា​បនាបង្កើតកងកម្លាំងប្រដាប់អាវុធរណសិរ្សសាមគ្គីសង្គ្រោះជាតិកម្ពុជា ក្រោមជំនួយពីកងទ័ពវៀតណាមដែលមា​នគោលដៅឆ្ពោះទៅវាយផ្តួលរំលំរបបប្រល័យពូជសាសន៍ខ្មែរក្រហម រំដោះប្រទេសជាតិចេញពីការសម្លាប់រង្គាល។ ទាក់ទងនឹង​គណៈយុទ្ធមិត្តនេះសម្ដេចតេជោនាយករដ្ឋមន្រ្តី ​ហ៊ុន សែន កាលពី​ថ្ងៃទី២២ ខែមីនា ​ក៏​បានប្រកាសឧបត្ថម្ភថវិកាចំនួន ៣០ម៉ឺនដុល្លារ ដល់មូលនិធិតេជោ១២៥ នៃគណៈយុទ្ធមិត្តជំនាន់បម្រើកងទ័ព ឆ្នាំ១៩៧៨ផងដែរ

ហើយស្របជាមួយគ្នានោះដែរ ក្រុមហ៊ុនធំៗចំនួន​ពីរក៏បាន​បរិច្ចាគថវិកាសរុប​ចំនួន​មួយលានដុល្លារដល់​មូលនិធិនេះផងដែរ។​​​

​ក្រុម​ហ៊ុនទាំងពីរនោះមាន ក្រុមហ៊ុន LYP គ្រុប ដែលបាន​ឧបត្ថម្ភថវិកា ៥០ម៉ឺនដុល្លារ​ និង​ក្រុមហ៊ុន ជីបម៉ុងគ្រុប ឧបត្ថម្ភថវិកា ៥០ម៉ឺនដុល្លារ​​ដល់មូលនិធិតេជោ១២៥ នៃគណៈយុទ្ធមិត្តជំនាន់បម្រើកងទ័ពឆ្នាំ១៩៧៨ តាមរយៈលោកជំទាវ ម៉ែន សំអន៕

ដោយ៖សំបាន ច័ន្ទដារ៉ា