ភ្នំពេញ៖ ប្រធានអង្គកា CAPDI បានលើកឡើងថា ពិធីស្រាយបួសខែរ៉ាម៉ាឌន នៃសាសនាឥស្លាម គឺជាសកម្មភាពសាមគ្គីភាពយ៉ាងល្អបំផុតរវាងសាសនា នៅក្នុងព្រះរាជាណាចក្រកម្ពុជា។ លោក Jusuf Kalla ប្រធានអង្គកា CAPDI និងជាសហប្រធានកិត្តិយសនៃក្រុមប្រឹក្សាវប្បធម៌អាស៊ី បានបញ្ជាក់ដូចនេះ ក្នុងជំនួបសម្តែងការគួរសម និងពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា នៅវិមានសន្តិភាព ទីស្ដីការគណៈរដ្ឋមន្ត្រី រាជធានីភ្នំពេញ នាព្រឹកថ្ងៃទី២៨ ខែមីនា ឆ្នាំ២០២៣ ។

ឯកឧត្តម អ៊ាង សុផល្លែត ជំនួយការសម្ដេចតេជោ បានឱ្យដឹងថា លោក Jusuf Kalla បានសម្តែងការគោរពសម្តេចតេជោចំពោះការដឹកនាំដ៏ឈ្លាសវៃ ដែលបាននាំកម្ពុជាមកនូវសុខសន្តិភាព ស្ថិរភាព និងជាពិសេស សុខដុមបនីយកម្មរវាងសាសនា និងសាសនា។

លោក Jusuf Kalla បានបញ្ជាក់ជូនសម្ដេចតេជោថា លោកបានដឹកនាំសាសនិកឥស្លាមជាង១០០នាក់ មកចូលរួមស្រាយបួសនៅកម្ពុជា ហើយអ្វីដែលលោកបានឃើញ គឺជាសកម្មភាពសាមគ្គីភាពយ៉ាងល្អបំផុតរវាងសាសនា នៅក្នុងព្រះរាជាណាចក្រកម្ពុជា ។

ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណជូនចំពោះលោក Jusuf Kalla ដែលបានដឹកនាំសាសនិកឥស្លាម មកចូលរួមស្រាយបួសនៅកម្ពុជា។

សម្តេចតេជោ បានបញ្ជាក់ជូនលោក Jusuf Kalla ថា កម្ពុជា បានរៀបចំកម្មវិធីស្រាយបួសនេះជារៀងរាល់ឆ្នាំ។សាសនានៅកម្ពុជា គឺមានសុខដុមភាពណាស់ ទាំងរវាងសាសនាឥស្លាម សាសនាគ្រិស្ត និងសាសនាព្រះពុទ្ធ ។

សូមជម្រាបថា កាលពីល្ងាចថ្ងៃទី២៧មីនាពិធីស្រាយបួសខែរ៉ាម៉ាឌន នៃសាសនាឥស្លាមកម្ពុជា បានប្រារព្ធធ្វើឡើងនៅមជ្ឍមណ្ឌលជ្រោយចង្វារ រាជធានីភ្នំពេញ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្រ្តីកម្ពុជា និង ឯកឧត្តម ដាតុ ស៊េរី អាន់វ៉ា ប៊ីន អ៊ីប្រាហ៊ីម នាយករដ្ឋមន្រ្តីនៃប្រទេសម៉ាឡេស៊ី និងមានសាសនិកអ៊ិស្លាមចូលរួម ជាង ៦ពាន់នាក់ផងដែរ ៕

អត្ថបទ៖ វណ្ណលុក, រូបភាព៖ វ៉េង លីមហួត និង សួង ពិសិដ្ឋ