ចំនួនអ្នកស្លាប់ដោយសារខ្យល់ព្យុះនៅសហរដ្ឋអាមេរិក មានការកើនឡើង
អាមេរិក៖ យោងតាមរបាយការណ៍របស់រដ្ឋមន្ត្រីអាមេរិកបានឱ្យដឹងថា ចំនួនអ្នកស្លាប់ដោយសារខ្យល់ព្យុះដែលបានវាយប្រហារនៅក្នុងទីក្រុងមួយចំនួននៃតំបន់ភាគខាងត្បូង និងភាគកណ្តាលសហរដ្ឋអាមេរិកបានកើនឡើងទៅដល់ ៣២នាក់។ នេះបើយោងតាមសារព័ត៌មាន CNA នៅព្រឹកថ្ងៃទី៣ ខែមេសានេះ។
នាវេលាពាក់កណ្តាលអធ្រាត្រឈានចូលថ្ងៃទី១ ខែមេសា ខ្យល់ព្យុះកំបុតត្បូងមួយបានវាយលុករដ្ឋចំនួនប្រាំបីនៃសហរដ្ឋអាមេរិក ដែលបង្កឱ្យមនុស្សជាច្រើនអ្នករងរបួស រាប់សិបនាក់បាត់បង់ជីវិត អគារនិងផ្ទះសម្បែងជាច្រើនខ្នងទទួលរងការខូចខាត។
មន្ត្រីប្រចាំការនៃទីក្រុង Memphis នៃរដ្ឋTennessee បានឱ្យដឹងថា មនុស្សបីនាក់បានបាត់បង់ជីវិត បន្ទាប់ពីដើមឈើបានបាក់ទៅលើផ្ទះរបស់ពួកគេ ហើយមនុស្សពីរនាក់ផ្សេងទៀតបានស្លាប់ និងបីនាក់របួស។ ចំណែកក្នុងសង្កាត់ Owen នៃរដ្ឋ Indiana ប្តីប្រពន្ធមួយគូត្រូវបានគេប្រទះឃើញស្លាប់នៅទីតាំងបោះជុំរំមួយនាកន្លែងកម្សាន្ត McCormick’s Creek State Park។ ចំណែកអ្នកបាត់បង់ជីវិតចំនួន ១៥ នាក់ផ្សេងទៀត ត្រូវបានរាយការណ៍ពីរដ្ឋ Arkansas, Illinois, Delaware , Mississippi និងរដ្ឋAlabama។
ប្រធានាធិបតីសហរដ្ឋអាមេរិក លោក ចូ បៃដិន និងភរិយាបានរំលែកទុក្ខទៅកាន់គ្រួសារសព និងគ្រួសារជនរងគ្រោះទាំងអស់ កាលពីថ្ងៃអាទិត្យ រួមទាំងផ្តល់នូវជំនួយផ្សេងៗដើម្បីការស្តាឡើងវិញពីការខូខាតនេះផងដែរ។
លោកបៃដិន បាននិយាយថា ៖ «យើងដឹងថាគ្រួសារនៅទូទាំងអាមេរិកកំពុងកាន់ទុក្ខចំពោះការបាត់បង់មនុស្សជាទីស្រលាញ់ និងរង់ចាំព័ត៌មានពីអ្នកនៅរស់ ដែលកំពុងតស៊ូចេញពីគំនរបាក់បែក និងកន្លែងអាជីវកម្មរបស់ពួកគេ»។
បើយោងតាមមជ្ឈមណ្ឌលព្យាករណ៍ព្យុះជាតិបានឱ្យដឹងថា កាលពីថ្ងៃទី២ ខែមេសា នៅតំបន់ភាគខាងជើង និងភាគឦសាននៃរដ្ឋតិចសាស ជុំវិញទីក្រុង ដាឡាស និង ហ្វត វូត បានទទួលរងផលប៉ះពាល់យ៉ាងធ្ងន់ធ្ងន់ពីសំណាក់ភ្លៀងធ្លាក់ខ្លាំង ខ្យល់បក់ខ្លាំង ឬហៅថា ខ្យល់ព្យុះកំបុតត្បូងខ្លាំងទីពីរ បង្កឱ្យអាកាសយានដ្ឋានអន្តរជាតិ Dallas Fort Worth ផ្អាកដំណើរការក្នុងការហោះហើរ។
សូមបញ្ជាក់ថា មជ្ឈមណ្ឌលអាកាសធាតុ ក៏បានព្រមានផងដែរ បន្ទាប់ពីការព្យាករណ៍អាកាសធាតុសម្រាប់ថ្ងៃអង្គារសប្តាហ៍នេះ នៅទីក្រុងឈីកាហ្គោ និង លីថល រ៉ក នៃរដ្ឋ អាកាន់សា អាចនឹងទទួលរងនៅការវាយប្រាហារ ពីខ្យល់ព្យុះ និងផ្គររន្ទះក្នុងកម្រិតធ្ងន់ផងដែរ៕
ប្រែសម្រួល៖ឡេង អារីតា
