សម្ព័ន្ធអង្គការអូប៉ិច ប្រកាសពីការកាត់បន្ថយផលិតកម្មប្រេងដ៏គួរឱ្យភ្ញាក់ផ្អើលចាប់ពីខែក្រោយ
រីយ៉ាដ៖ អារ៉ាប៊ីសាអូឌីត និងក្រុមប្រទេសអ្នកនាំចេញប្រេងដែលជាសម្ព័ន្ធមិត្តអង្គការនាំចេញប្រេងអូប៉ិចបូក (OPEC +) ផ្សេងទៀត បានប្រកាសកាលពីថ្ងៃទី២ ខែមេសា ពីការកាត់បន្ថយផលិតកម្មប្រេងដោយស្ម័គ្រចិត្តឱ្យនៅត្រឹម ១,១៥ លានបារ៉ែលក្នុងមួយថ្ងៃ ដោយហៅវាថាជា «វិធានការប្រុងប្រយ័ត្ន» ដើម្បីរក្សាស្ថិរភាពទីផ្សារ។
ការប្រកាសដ៏គួរឱ្យភ្ញាក់ផ្អើលនេះ ធ្វើឡើង ខណៈ OPEC+ ត្រូវបានគេរំពឹងកន្លងមកថា នឹងប្រកាន់ខ្ជាប់នូវការកាត់បន្ថយផលិតកម្មប្រេងត្រឹម ២ លានបារ៉ែលក្នុងមួយថ្ងៃ ដែលព្រមព្រៀងគ្នាកាលពីខែតុលាឆ្នាំមុន។
ការព្រមព្រៀងក្នុងប្លុក ដែលរួមមានប្រទេសនៃអង្គការអូប៉ិចចំនួន ១៣ និងប្រទេសសម្ព័ន្ធចំនួន ១០ ផ្សេងទៀតដឹកនាំដោយរុស្ស៊ី កាលពីលើកនោះ បានរងការខឹងសម្បារយ៉ាងខ្លាំងពីសហរដ្ឋអាមេរិក ដែលលើកឡើងថា ការកាត់បន្ថយអាចធ្វើឱ្យប្រេងឡើងថ្លៃកាន់តែខ្លាំង ហើយពិភពលោកត្រូវការតម្លៃប្រេងទាប ដើម្បីគាំទ្រដល់កំណើនសេដ្ឋកិច្ច និងទប់ទល់កុំឱ្យរុស្ស៊ីអាចរកប្រាក់ចំណូលបានច្រើនពីការនាំចេញប្រេង ដើម្បីយកទៅប្រើជាមូលនិធិជួយដល់សង្រ្គាមឈ្លានពាននៅអ៊ុយក្រែន។
ការប្រកាសនៅថ្ងៃអាទិត្យ ដែលនឹងចូលជាធរមានតាមការស្ម័គ្រចិត្តរបស់ប្រទេសសមាជិកនីមួយៗ គឺជាការកាត់បន្ថយបន្ថែមកាលពីខែតុលា។
យោងតាមសេចក្ដីថ្លែងការណ៍ផ្លូវការអារ៉ាប់ប៊ីសាអូឌីត បាននិយាយថា ខ្លួននឹងកាត់បន្ថយទិន្នផលប្រេងមកត្រឹម ៥០០ ០០០ បារ៉ែលក្នុងមួយថ្ងៃ ខណៈអ៊ីរ៉ាក់ថានឹងកាត់បន្ថយមកត្រឹម ២២១ ០០០ បារ៉ែលក្នុងមួយថ្ងៃ។
ប្រទេសផ្សេងទៀត ដែលស្ម័គ្រចិត្តកាត់បន្ថយផលិតកម្មរួមមានអេមីរ៉ាត់អារ៉ាប់រួម កូវ៉ែត អូម៉ង់ អាល់ហ្សេរី និងកាហ្សាក់ស្ថាន។ ចំណែកឯរុស្ស៊ីវិញនិយាយថា ទីក្រុងមូស្គូក៏នឹងកាត់បន្ថយផលិតកម្មប្រេងមកត្រឹម ៥០០ ០០០ បារ៉ែលក្នុងមួយថ្ងៃ រហូតដល់ដំណាច់ឆ្នាំ ២០២៣ ផងដែរ។
អ្វីដែលគួរឱ្យកត់សម្គាល់នោះគឺថា រុស្ស៊ីធ្លាប់បានប្រកាសពីការកាត់បន្ថយផលិតកម្មក្នុងខែកុម្ភៈជាឯកតោភាគីម្ដងរួចមកហើយ។ ក្រោយការប្រកាសកាលពីលើកនោះ មន្ត្រីអាមេរិកបាននិយាយថា សម្ព័ន្ធភាពរបស់រុស្ស៊ីជាមួយសមាជិក OPEC+ ផ្សេងទៀតកំពុងចុះខ្សោយ ប៉ុន្តែការប្រកាសរួមកាលពីថ្ងៃអាទិត្យ បង្ហាញថា កិច្ចសហប្រតិបត្តិការរបស់រុស្ស៊ីនៅតែរឹងមាំ។
ជុំវិញវិធានការចុងក្រោយនេះផងដែរ ទីភ្នាក់ងារសារព័ត៌មានផ្លូវការរបស់អារ៉ាប៊ីសាអូឌីត បានរាយការណ៍ថា មន្ត្រីក្រសួងថាមពលអារ៉ាប៊ីសាអូឌីត បានសង្កត់ធ្ងន់ថា វាគឺជាវិធានការប្រុងប្រយ័ត្នមួយក្នុងគោលបំណងគាំទ្រដល់ស្ថិរភាពនៃទីផ្សារប្រេង។
គួរបញ្ជាក់ថា តម្លៃប្រេងបានធ្លាក់ចុះដល់កម្រិតទាបក្នុងរយៈពេល ១៥ ខែ កាលពីខែមុន បន្ទាប់ពីវិបត្តិធនាគារនៅអាមេរិក។ ស្ថាបនិក និងជានាយកនៃក្រុមហ៊ុនទិន្នន័យ Energy Aspects លោក Amrita Sen បាននិយាយកាលពីថ្ងៃអាទិត្យថា «អង្គការ OPEC កំពុងចាត់វិធានការទប់ស្កាត់ជាមុន ក្នុងករណីមានការថយចុះតម្រូវការណាមួយ»៕
ប្រែសម្រួល៖ ហួន ឌីណា
ប្រភព៖ OPEC+ oil alliance announces surprise production cuts from May
