ប្រធានសភាអាមេរិក ជួបមេដឹកនាំតៃវ៉ាន់ ដោយពិភាក្សាគ្នាពីការពន្លឿនការបញ្ជូនអាវុធ ទោះបីជាមានការគំរាមកំហែងពីចិន
អាមេរិក៖ប្រធានសភាសហរដ្ឋអាមេរិកលោក ខេវិន ម៉េកខាធី (Kevin McCarthy) បានរៀបចំកិច្ចប្រជុំជាមួយប្រធានាធិបតីតៃវ៉ាន់លោកស្រី សៃ អ៊ីងវិន(Tsai Ing-wen)កាលពីថ្ងៃពុធទី ៥ ខែមេសាដោយភាគីទាំងពីរពិភាក្សាគ្នាអំពីការពន្លឿនការបញ្ជូនអាវុធទៅតៃវ៉ាន់បើទោះបីជាមានការគំរាមកំហែងពីប្រទេសចិន។
លោក ម៉េកខាធី ដែលជាមន្រ្តីជាន់ខ្ពស់បំផុតទី៣ក្នុងប្រព័ន្ធអំណាចរបស់អាមេរិក និងសមាជិកសភាពីបក្សសាធារណរដ្ឋ ក៏ដូចជាបក្សប្រជាធិបតេយ្យជាច្រើនរូបទៀត បានជួបជាមួយលោកស្រី សៃ នៅ
បណ្ណាល័យប្រធានាធិបតី រ៉ូណាល់ រីហ្កេន ក្នុងទីក្រុងស៊ីមីវ៉ាលី នៃរដ្ឋកាលីហ្វ័រញ៉ា ខណៈចិន ដែលទាមទារកោះតៃវ៉ាន់ថាជារបស់ខ្លួនឯណោះវិញ បានគំរាមកំហែងពីវិធានការ «ឆ្លើយតប»។
លោក ម៉េកខាធី បានលើកឡើងពេលឈរជាមួយលោកស្រី សៃ នៅមុខយន្តហោះប៊ូអ៊ីង( Boeing) ខៀវស ដែលធ្លាប់ជាយានប្រចាំការរបស់លោកអតីតប្រធានាធិបតី រីហ្កេន ថា មិត្តភាពរវាងតៃវ៉ាន់ និងអាមេរិក គឺជាបញ្ហាសម្រាប់ពិភពលោកសេរី។
ថ្លែងក្នុងសន្និសីទសារព័ត៌មានក្រោយកិច្ចប្រជុំ ប្រធានសភាអាមេរិក បាននិយាយថា មន្រ្តីរវាងភាគីទាំងពីរបានពិភាក្សាអំពីរបៀបបង្កើនល្បឿននៃការបញ្ជូនអាវុធទៅតៃវ៉ាន់។ លោកថ្លែងយ៉ាងដូច្នេះថា៖ «យើងត្រូវតែបន្តការលក់អាវុធទៅឱ្យតៃវ៉ាន់និងធ្វើឱ្យប្រាកដថា ការលក់ឱ្យតៃវ៉ាន់ប្រព្រឹត្តទៅទាន់ពេលវេលា»។ លោកនិយាយថា លោកជឿថាមានកិច្ចព្រមព្រៀងទ្វេភាគីលើរឿងនេះហើយ «យើងត្រូវតែពង្រឹងកិច្ចសហប្រតិបត្តិការសេដ្ឋកិច្ចរបស់យើង ជាពិសេសលើវិស័យពាណិជ្ជកម្ម និងបច្ចេកវិទ្យា»។
បន្ថែមពីលើនេះ ប្រធានគណបក្សសាធារណរដ្ឋនៃគណៈកម្មាធិការជ្រើសរើសសភាទទួលបន្ទុកលើកិច្ចការអំពីបក្សកុម្មុយនីស្តចិន លោក Mike Gallagher បាននិយាយក្រោយកិច្ចប្រជុំរវាងមន្រ្តីអាមេរិក និងលោកស្រី សៃ ផងដែរថា លោកចង់មានមធ្យោបាយដើម្បីផ្គត់ផ្គង់មីស៊ីលប្រឆាំងនាវា Harpoon ទៅឱ្យកោះតៃវ៉ាន់។ កន្លងមក មន្រ្តីអាមេរិក បានលើកឡើងថា ប្រភេទសព្វាវុធដូចជាមីស៊ីល Harpoon មានសារៈសំខាន់ខ្លាំងសម្រាប់វិស័យការពារជាតិរបស់តៃវ៉ាន់ជាងអាវុធធន់ធ្ងន់ដទៃទៀត ដូចជារថក្រោះ និងយន្តហោះចម្បាំង ដែលកោះនេះតែងទិញពីសហរដ្ឋអាមេរិក។
ចំណែកឯលោកស្រី សៃ ឯណោះវិញ បានថ្លែងអំណរគុណដល់សភាសហរដ្ឋអាមេរិកសម្រាប់ការគាំទ្រតៃវ៉ាន់ នៅពេលកោះដែលស្វ័យគ្រប់គ្រងប្រកាន់លទ្ធិប្រជាធិបតេយ្យនេះ ស្ថិតនៅក្រោមការគំរាមកំហែង។ លោកស្រីបានលើកឡើងពីសម្ដីរបស់លោក រីហ្កេន ដែលថា «ដើម្បីសន្តិភាព យើងត្រូវរឹងមាំ»។
គួរគូសបញ្ជាក់ថា កិច្ចប្រជុំរវាងមន្រ្តីកំពូលអាមេរិក និងមេដឹកនាំតៃវ៉ាន់ ធ្វើឡើងខណៈដែលទំនាក់ទំនងរវាងសហរដ្ឋអាមេរិក និងចិន កាន់តែធ្លាក់ចុះផងដែរ។ កាលពីឆ្នាំមុន ភាពតានតឹងបានដោរឡើងខ្លាំង ក្រោយពេលចិនបង្កើនសកម្មភាពយោធាទ្រង់ទ្រាយធំជុំវិញកោះតៃវ៉ាន់ ដើម្បីឆ្លើយតបទៅនឹងដំណើរទស្សនកិច្ចទៅក្រុងតៃប៉ិរបស់អតីតប្រធានសភាអាមេរិក លោកស្រី ណាន់ស៊ី ប៉េឡូស៊ី ដែលមានៈនឹងការគំរាមកំហែងរបស់ចិន។
ជំនួបរវាងមន្រ្តីកំពូលៗចុងក្រោយនេះ ក៏រងនូវប្រតិកម្មខ្លាំងៗពីក្រុងប៉េកាំងផងដែរ។ អ្នកនាំពាក្យក្រសួងការបរទេសចិន បានថ្កោលទោសភ្លាមៗចំពោះកិច្ចប្រជុំក្នុងសេចក្ដីថ្លែងការណ៍នៅថ្ងៃព្រហស្បតិ៍ ដោយចោទប្រកាន់ជាថ្មីម្ដងទៀតថា សហរដ្ឋអាមេរិកបានឃុបឃិតជាមួយពួកបំបែកខ្លួន ដែលស្វែងរក «ឯករាជ្យភាពតៃវ៉ាន់» ហើយរំលោភលើគោលការណ៍ចិនតែមួយ។
សេចក្ដីថ្លែងការណ៍ដដែលបានបន្តថា បញ្ហាតៃវ៉ាន់ «គឺជាស្នូលនៃផលប្រយោជន៍ស្នូលរបស់ចិន និងជាបន្ទាត់ក្រហមទីមួយដែលមិនត្រូវរំលោភនៅក្នុងទំនាក់ទំនងចិន-អាមេរិក»។ ដើម្បីឆ្លើយតបនឹងសកម្មភាពខុសឆ្គងយ៉ាងធ្ងន់ធ្ងរ «ចិននឹងចាត់វិធានការខ្លាំងក្លា និងម៉ឺងម៉ាត់ ដើម្បីការពារអធិបតេយ្យភាព និងបូរណភាពទឹកដីរបស់យើង»។
ចំណែកឯក្រសួងការពារជាតិចិនវិញ ក៏បានថ្កោលទោសកិច្ចប្រជុំដូចគ្នា ដោយនិយាយក្នុងសេចក្ដីថ្លែងការណ៍ថា៖ «កងទ័ពរំដោះប្រជាជនចិន (PLA) ប្រកាន់ខ្ជាប់នូវភារកិច្ច និងបេសកកម្មរបស់ខ្លួន រក្សាការប្រុងប្រយ័ត្នគ្រប់ពេលវេលាឱ្យនៅកម្រិតខ្ពស់ ការពារអធិបតេយ្យភាពជាតិ និងបូរណភាពទឹកដីយ៉ាងម៉ឺងម៉ាត់ និងរក្សាសន្តិភាព និងស្ថិរភាពនៅច្រកសមុទ្រតៃវ៉ាន់»។
ជំនួបរវាងលោក ម៉េកខាធី និងលោកស្រី សៃ ដដែល ក៏ធ្វើឱ្យចិនបង្កើនសកម្មភាពសមយុទ្ធយោធាជាថ្មី ផងដែរ។ រដ្ឋមន្ត្រីការពារជាតិតៃវ៉ាន់ លោក Chiu Kuo-cheng បានប្រាប់អ្នកសារព័ត៌មានក្នុងសភាកាលពីថ្ងៃព្រហស្បតិ៍ថា នាវាផ្ទុកយន្តហោះចម្បាំងចិនបានធ្វើដំណើរនៅចម្ងាយប្រមាណជាង ៣៧០ គីឡូម៉ែត្រពីឆ្នេរភាគខាងកើតរបស់តៃវ៉ាន់ ហើយនាវាចម្បាំងតៃវ៉ាន់កំពុងតាមដានមើល។ កាលពីថ្ងៃពុធ Shandong ដែលជានាវាផ្ទុកយន្តហោះផលិតក្នុងស្រុកដំបូងគេរបស់ចិន បានធ្វើដំណើរកាត់តាមច្រក Bashi ភាគខាងត្បូងនៃកោះតៃវ៉ាន់ឆ្ពោះកាន់មហាសមុទ្រប៉ាស៊ីហ្វិក ទាំងអមដោយក្រុមកប៉ាល់ជាច្រើនទៀតរបស់កងទ័ពជើងទឹកចិន។ លោក Chiu បាននិយាយថា៖ «វាជាសមយុទ្ធ ប៉ុន្តែ(ចិន)ធ្វើឡើងចំពេលដែលមានភាពរសើប»។
ទោះយ៉ាងណាក៏ដោយ កាសែតរដ្ឋចិន Global Times បានផ្សាយថា ការដាក់ពង្រាយយានយោធាទាំងអស់នេះ បង្ហាញថា Shandong «បានត្រៀមខ្លួនរួចរាល់ហើយសម្រាប់ប្រតិបត្តិការសមុទ្រឆ្ងាយៗ» និងការពារអ្វីដែលជារបស់ចិន។ ប្រព័ន្ធផ្សព្វផ្សាយរដ្ឋបានឱ្យដឹងផងដែរថា PLA នៃបញ្ជាការកងទ័ពភាគខាងកើតចិន បាននិងកំពុងធ្វើសមយុទ្ធដ៏ស្វិតស្វាញ នៅលើដីគោក ដែនទឹក និងអាកាសចាប់តាំងពី
សប្ដាហ៍មុនមកម៉្លេះ៕
ប្រែសម្រួល៖ ហួន ឌីណា
ប្រភព៖ U.S. Speaker meets Taiwan leader and stresses need to speed up arms deliveries
China aircraft carrier in drills near Taiwan amid rising tension
Foreign Ministry Spokesperson’s Statement on Tsai Ing-wen’s “Transit” Through the United States
