ចិន៖ សមយុទ្ធយោធាជុំវិញកោះតៃវ៉ាន់ ជាការព្រមានធ្ងន់ធ្ងរ
ប៉េកាំង៖ អ្នកនាំពាក្យគណៈរដ្ឋមន្រ្តីចិន លោកស្រី Zhu Fenglian បាននិយាយនៅថ្ងៃពុធទី ១២ ខែមេសា ថា សមយុទ្ធដែនអាកាស និងសមុទ្រថ្មីៗរបស់ចិនជុំវិញកោះតៃវ៉ាន់ គឺជា «ការព្រមានដ៏ធ្ងន់ធ្ងរ» ដោយអ្នកនយោបាយដែលគាំទ្រឯករាជ្យភាពតៃវ៉ាន់ និងអ្នកដែលគាំទ្របរទេស។
ការព្រមាននេះធ្វើឡើងបន្ទាប់ពីចិនបញ្ចប់សមយុទ្ធយោធារបស់ពេល៣ថ្ងៃរបស់ខ្លួនកាលពីថ្ងៃចន្ទ ដែលក្នុងសមយុទ្ធនោះរួមមានទាំងប្រតិបត្តិការ «ក្លែង» វាយប្រហារតៃវ៉ាន់។ សមយុទ្ធរបស់ចិន ធ្វើឡើងបន្ទាប់ពីមេដឹកនាំតៃវ៉ាន់ លោកស្រី សៃ អ៊ីនវិន ជួបជាមួយប្រធានសភាអាមេរិក លោក ខេវ៉ិន ម៉េកខាធី នៅរដ្ឋកាលីហ្វ័រញ៉ា កាលពីសប្ដាហ៍មុន។
លោកស្រី Zhu ថ្លែងយ៉ាងដូច្នេះថា៖ «កងទ័ពរំដោះប្រជាជនចិន(PLA)បានរៀបចំ និងអនុវត្តវិធានការត បតជាបន្តបន្ទាប់នៅច្រកសមុទ្រតៃវ៉ាន់ និងដែនទឹកជុំវិញ ដែលជាការព្រមានយ៉ាងធ្ងន់ធ្ងរប្រឆាំងនឹងការឃុបឃិត និងការញុះញង់របស់កងកម្លាំងផ្តាច់ខ្លួនឯករាជ្យតៃវ៉ាន់ និងកងកម្លាំងខាងក្រៅ»។
លោកស្រីបន្តថា៖ «វាគឺជាសកម្មភាពចាំបាច់មួយ ដើម្បីការពារអធិបតេយ្យភាពជាតិ និងបូរណភាពទឹកដី»។
គួរបញ្ជាក់ថា ចិនចាត់ទុកកោះតៃវ៉ាន់ថាជាទឹកដីរបស់ខ្លួន ហើយគំរាមថានឹងធ្វើការវាយយកដោយកម្លាំងទ័ពប្រសិនបើចាំបាច់។ កាលពីឆ្នាំមុន ភាពតានតឹងបានកើនឡើងខ្លាំង បន្ទាប់ពីចិនធ្វើសមយុទ្ធយោធាទ្រង់ទ្រាយធំមិនធ្លាប់មានពីមុនមកជុំវិញកោះតៃវ៉ាន់ ដើម្បីជាការឆ្លើយតបទៅនឹងការធ្វើដំណើរទស្សនកិច្ចទៅទីក្រុងតៃប៉ិរបស់អតីតប្រធានសភាអាមេរិក លោកស្រី ណាន់ស៊ី ប៉េឡូស៊ី។
គេសង្កេតឃើញថា សកម្មភាពយោធារបស់ចិនកាន់តែមានភាពញឹកញាប់ទៅៗក្នុងរយៈពេលប៉ុន្មានឆ្នាំចុងក្រោយនេះ ខណៈវោហាសាស្រ្តរបស់ចិនចំពោះកោះក៏កាន់តែក្លៀវក្លាឡើងៗ។ ជម្លោះណាមួយរវាងភាគីទាំង២ អាចអូសសហរដ្ឋអាមេរិកចូល ក្នុងនាមជាសម្ព័ន្ធមិត្តក្រៅផ្លូវការរបស់តៃវ៉ាន់ ដែលបដិសេធយ៉ាងដាច់អហង្ការរបស់ក្រុងប៉េកាំង។
ជុំវិញបញ្ហានេះផងដែរ លោកស្រី Zhu បានលើកឡើងថា៖ «កងកម្លាំងខាងក្រៅ កំពុងពង្រឹងកិច្ចខិតខំប្រឹងប្រែងរបស់ខ្លួនក្នុងការទប់ទល់ចិន ដោយយកតៃវ៉ាន់ប្រើជាឧបករណ៍»៕
ប្រែសម្រួល៖ហួន ឌីណា
