អឺរ៉ុបព្រមានប្រឆាំងនឹងចំណាត់ការឯកតោភាគី បន្ទាប់ពីប៉ូឡូញ ហុងគ្រី បិទការនាំចូលគ្រាប់ធញ្ញជាតិពីអ៊ុយក្រែន
អឺរ៉ុប៖ សហភាពអឺរ៉ុបបានឱ្យដឹងកាលពីថ្ងៃអាទិត្យថា សកម្មភាពឯកតោភាគីលើពាណិជ្ជកម្មរបស់រដ្ឋជាសមាជិកគឺមិនអាចទទួលយកបាននោះទេ បន្ទាប់ពីប៉ូឡូញ និងហុងគ្រីបានប្រកាសពីការបិទការនាំចូលចូលគ្រាប់ធញ្ញជាតិនិងផលិតផលស្បៀងអាហារផ្សេងទៀតពីអ៊ុយក្រែន ដើម្បីការពារវិស័យកសិកម្មក្នុងស្រុករបស់ខ្លួន។
អ្នកនាំពាក្យរបស់គណៈកម្មការអឺរ៉ុបបាននិយាយនៅក្នុងសេចក្តីថ្លែងការណ៍ថា យើងដឹងពីសេចក្តីប្រកាសរបស់ប៉ូឡូញ និងហុងគ្រី ទាក់ទងនឹងការហាមឃាត់ការនាំចូលគ្រាប់ធញ្ញជាតិ និងផលិតផលកសិកម្មផ្សេងទៀតពីអ៊ុយក្រែន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
អ្នកនាំពាក្យបន្តថា នៅក្នុងបរិបទនេះ វាជាការសំខាន់ណាស់ដែលត្រូវគូសបញ្ជាក់ថា គោលនយោបាយពាណិជ្ជកម្មគឺជាបញ្ហារួមរបស់សហភាពអឺរ៉ុប ហើយដូច្នេះ សកម្មភាពឯកតោភាគីមិនអាចទទួលយកបាននោះទេ។ ក្នុងពេលវេលាដ៏លំបាកបែបនេះ វាមានសារៈសំខាន់ណាស់ក្នុងការសម្របសម្រួល និងធ្វើឱ្យស្របតាមការសម្រេចចិត្តទាំងអស់នៅក្នុងសហភាពអឺរ៉ុប។
គួររំឭកថា ក្រោយរុស្ស៊ីចូលលុកលុយអ៊ុយក្រែន ផលិតផលកសិកម្មដូចជាគ្រាប់ធញ្ញជាតិរបស់អ៊ុយក្រែនជាច្រើន ដែលមានតម្លៃថោកជាងផលិតផលដូចគ្នាក្នុងសហភាពអឺរ៉ុប ត្រូវនៅជាប់គាំងក្នុងបណ្ដារដ្ឋអឺរ៉ុបកណ្ដាលដោយសារតែបញ្ហាភស្តុភារនៅសមុទ្រខ្មៅក្រោមការបិទខ្ទប់របស់រុស្ស៊ី ដែលបន្ធូរបន្ថយវិញក្រោយមានកិច្ចព្រមព្រៀងរវាងអ៊ុយក្រែន-រុស្ស៊ី។ ការជាប់គាំង ធ្វើឱ្យប៉ះពាល់ដល់តម្លៃទីផ្សារនៃផលិតផលកសិកម្មរបស់ប្រជាកសិករនៅបណ្ដាប្រទេសទាំងអស់នោះ។
បញ្ហានេះ បានបង្កើតជាបញ្ហានយោបាយសម្រាប់គណបក្សច្បាប់ជាតិនិយម និងយុត្តិធម៌ (PiS) ដែលកំពុងកាន់អំណាចរបស់ប៉ូឡូញ សម្រាប់ការបោះឆ្នោតក្នុងឆ្នាំនេះ ខណៈវាធ្វើឱ្យប្រជាជននៅតំបន់ជនបទ ដែលជាទូទៅមានអត្រាគាំទ្របក្ស PiS ខ្ពស់ មានការខឹងសម្បារ។
អ្នកនាំពាក្យរដ្ឋាភិបាលប៉ូឡូញ លោក Piotr Muller បានប្រាប់ទីភ្នាក់ងារសារព័ត៌មានរដ្ឋ PAP ថា រដ្ឋាភិបាលកំពុងទាក់ទងជាមួយគណៈកម្មការអឺរ៉ុបអំពីបញ្ហានេះ ហើយថាការហាមឃាត់ ដែលនឹងបន្តរហូតដល់ចុងខែមិថុនានេះ អាចធ្វើទៅបានដោយសារតែសេចក្ដីប្រកាសសន្តិសុខ។
រដ្ឋមន្ត្រីក្រសួងកសិកម្មប៉ូឡូញ លោក Robert Telus និយាយនៅថ្ងៃអាទិត្យថា ការហាមឃាត់នេះគឺចាំបាច់ដើម្បី «បើកភ្នែករបស់សហភាពអឺរ៉ុប ចំពោះការពិតដែលថាការសម្រេចចិត្តបន្ថែមទៀតគឺចាំបាច់ដែលនឹងអនុញ្ញាតឱ្យផលិតផលពីអ៊ុយក្រែនចូលជ្រៅទៅក្នុងទ្វីបអឺរ៉ុប និងមិនជាប់ត្រឹមតែប្រទេសប៉ូឡូញតែប៉ុណ្ណោះទេ»។
គួរបញ្ជាក់ថា ប៉ូឡូញ និងហុងគ្រីមានជម្លោះដ៏រ៉ាំរ៉ៃជាមួយប្លុករបស់ខ្លួន ជុំវិញបញ្ហានានា រួមមានទាំងឯករាជ្យភាពរបស់តុលាការ សេរីភាពប្រព័ន្ធផ្សព្វផ្សាយ និងសិទ្ធិអ្នកស្រឡាញ់ភេទដូចគ្នា ហើយប្រទេសទាំង២ ត្រូវបានដកហូតមូលនិធិពីប្លុកដោយសារតែការព្រួយបារម្ភអំពីនីតិរដ្ឋ៕
ប្រែសម្រួល៖ហួន ឌីណា ប្រភព៖ EU warns against unilateral steps after Poland, Hungary ban Ukrainian grain
